Лента событий ВААК
«Ирӡтәым»: СогIвым 5-хауа апхьарта апны апсуаква йырцIасу атшгIвычаща йазынархаз айчважвара акIвшатI
АААК агвыпи АГУ апны апсуа бызшва акафедра арыпхьагIв Джугелиа Инни «Ирӡтәым» проект апкъ йтата адырра тшауацIнарыхра йазынарху айчважвараква адыргалыркIвитI. АпхьагIвчва лекция дрызгIапхьатI Апсны акъральыгIва музеей этнологияла ахъвшара анаука нхагIв ахIба Шамба Инга.
Анйара ззынархаз апсуаква йырцIасу атшгIвычаща акIвын. Шамба апсуа фаша злалу, ауи йаларцIалауа арыпшдзагаква шгIаншаз, ауат рыхьызква йгIарныцIуа апхьагIвчва йралхIвтI.
Ауи дызквчважвауа аздзыргIвчва рыцIа бзита рыла йгIацIаржьра ахъазла амузей йрыму ачгIвычаква лыцгIалгтI. ЧкIвыныргIа ауат йырпшра йахъазымкIва апхъанчIви пкъыгIваква напIыла йыркIырнысгьи рылшатI, ауи гIальаматдзата йырбатI.
Анйара айчважвара квпшыра аман. АпхьагIвчва разцIгIараква щардан, алекция йаназдзыргIвы амщтахь ауат Апсны акъральыгIва музей йцата руагIахъа ртурыхи ргвбайари рыцIа аргваныта тшрыхадыргIвазара ртахъхатI.
А-НКО-ква цхърагIара драдзара ахъазла абзазага йгьи агIвычIвгIвыс гIалцIыртаква ргIарысабапра йаквчважватI АААК апресс-квта апны
АжвчIвкви аныкъвадыкъвакви цхърагIара рзадгалрала социал нархара зму хъахIарагIагра змурадым адкIылара (СОНКО) «Ажвра гвыргъьарапI» Адуней апсуа-абаза конгресс СогIвым йаъу ауысхарта апны Апсны ажвлара адкIылараква йрынйатI.
«Ажвра гвыргъьарапI» СОНКО аунашвачпагIв, апаллиатив психолог, аконфликтолог Васильева Татьяна «А-НКО-ква рапхъагылагIвчва йрыцкIра» россия социал проект даквчважватI, Россия Федерация йапшым аштаква рпны жвлара нархара зму апроектква дахIврала йдырхъйауата йдырхIахьаз ашвапха Апсны а-НКО-ква ргIащтийыгIвчва йралхIвтI.
Анйара апны апроектква йа аорганизацияква уырцхърагIара ахъазла ахча, абзазага йгьи агIвычIвгIвыс гIалцIыртаква шгIаурысабапуашла тшыбжьарагьи акIвдыршатI.
Ари анйара ъачIвагIала адырраква йрылархIара, ацацхърагIара рыбагъьара, а-НКО-ква рунашвахъцагIвчви рджьгарыгIвчви руыс ргвы шаквымдзуаш йазыбжьара йырзынарху «А-НКО-ква рапхъагылагIвчва йрыцкIра» социал проект йахъвыкIпI. Анйара России Апсни р-НКО-ква агIаджвыквцIара шIыцква йрыквыргвышхвара, швапха амдырдара, акъралькви ажвларакви рацынхара аквпшыра шIыцква гIаура йырзынархан.
Апроект Россия апрезидент грантква р-Фонд ацхърагIарала йдырхъйитI.
