Апсны апны октябрь а 16-18 руацIа йапхъахауата йакIвшаз «Абаза» культура-спорт фестиваль Согъвым апны концерт дула йалгатI.
Барганджиа Саид
Адуней апсуа-абаза конгресс йапхъахауата Апсны апны йакIвнаршаз «Абаза» культура-спорт фестиваль октябрь а 18 Согъвым АмхIаджьырква рдзытшпурам апны гвыргъьахъв дула йалгатI.
АРИ АГIАНШАРА АСУРАТЛЕНТА АПШРА>>
Апсны акъральыгIва драмтеатр апахь сцена дыргылтI. Щыбжьан араъа акъала абзазагIвчви афестиваль асасчви айззауа йалагатI. ЗымгIвагьи ргвква гIащтIырхуа йгIагун ауагIахъа макъымква. ТIакIв анцIы асцена йгIаквылтI агвыргъьахъв программа акIвзыршуз Апсни Къарча-Черкеси рпны йбергьльу артистква Хагба Кьасоуи Напщ Аминати. Ауат асасчва сальам анрарх амщтахь асцена дхъалтI Адуней апсуа-абаза конгресс ЙхIаракIу асовет аунашвачпагIв Эгьзакь Мусса. Ауи агвыргъьахъв асасчва тшырзынайырхауата апсуа-абаза уагIахъа ртурых даквчважватI афестиваль ацIасква рыбагъьара шатахъугьи йхIватI.
«ХIара Апсны акультура йацхIкIра, Апсны зымгIвагьи чва бзила йшгIапшуаш хIазынхара атахъыпI. ЙгIахIгвынгIвра атахъыпI тIакIв хIачвыхъарата хIбзазаргьи ауи хIащтаныкъвара пырхагата йазал йшамуаш. Ужвы йнанаркIыта рыцIагьи аргваныта хIащтаныкъвуштI. ХIара хIацыта йхIзымчпуш закIгьи гьаъам. Ауи йаквшахIатхитI хIара хIтурых. ХIапхъахьыла ауи атурых шцуш зпщылу хIара хIакIвпI, азаджв азаджв хIшизаъазлуш, хIшацацхърагIуш акIвпI. УахьчIва хIара хIацыпI йгьи йхIзыгIарбатI багъьата апхъала хIшзычIвырхъуш», – йхIватI АААК ЙхIаракIу асовет ахъада.
Азаджв йцIыхъв азаджв дтагыла ауатыкв йгIаталуан апсуа йгьи абаза гIахIвчва гвыпква, ашвахIвагIвчва, амакъымасчва. Аконцерт анакIвшуз зымгIвагьи зызпшуаз ауысгьи ншатI: ауи апхъала атшын йалгаз хвитта абакIрала VIII адуней анкъвакъвраква рпны асогIа хъада – Эгьзакь Мусса йазалху йкубок зквнадыргаз йыхьыз гIархIватI. Ауи Къарча-Черкес йауу Тобыль Алан йакIвта йгIацIцIтI.
Афестиваль алгамта асасчва аконцерт йахъазымкIва датшагьи джьащахъвара щарда рызпшуан. Агвыргъьахъв ъакIвшуз ауатыкв шта-штата йшан: араъа абазаква гIазырбауа апхъа заман агIан йхъырхыз суратква йыргIарбартапI, арахьараъа алингвист картаква йыртыппI, мачIкI унаскIьата Апсны акъральыгIва музей акъачIвахыртаква йгIарыгIвнырхыз апкъыгIвакви АлбыргIан кыт аэтнография музей апны йазкIкIу апкъыгIвакви ргIарбарта адгалапI.
Йызтахъыз дзачIвызлакIгьи агвыргъьахъв ъадзакIвшуз ботон алапащи (схьа мачвыла йшаларпауа – аредакция ррытаразга) хьапщ рахъвала тадзахри тшырзырбжьа йауашын. «Йынджьыгь» ауагIа ртеатри ГIахIврала КъЧР акъральыгIва театри рартистква хIапхъанчIвиква атаца дшгIадыргалуаз ацIас гIадырбатI.
«Ари йузыджьамщуш ларпшрапI. СайгвыргъьахитI асабиква ъагIаздыз. УахьчIва Согъвым цIабыргдзата гвыргъьахъв ду йалапI. Анчва дырзыразхатI ауи адызгалыз зымгIва», – лразыра ажваква гIахIалхIвтI Согъвым абзазагIв АгIвдза Мадина.
ГвынгIвырапI асасчва щардагIв афачIвква йырзалхыз, «Алашара» жвлара адкIылара йалу апхIвысква рсовет йалакву йдрыхIазырыз абаза рызкъкви ахъагIаракви ъалагылаз ашта ахьыла йшахъуаз.
«Зынгьи абазаква ррызкъы гьсымфасызтI. Мамырса рымапI, ауаса ауат ауи рххитIта хьшвашвата йгIаквдыргылитI. Арызкъква хIчIвква йрапшызшвагьи йаъапI, ауаса кIара агIвыргитI. ЙалкIгIата йсгвапхатI абаза хъагIараква. Афестиваль швабыж йуыс бзипI. ЙанбакIвыз хIара Согъвым аквта апны абаза рызкъыла тшанхIрытхаджьуашыз!» – ллахIвараква хIыцагIвылшатI ажурналистка Кове Наала.
«Абаза» культура-спорт фестиваль йгIадгылтI акъраль аунашвачпагIвчвагьи а-Президент ХIаджьымба Рауль рапхъа дгылата. А-Президентгьи афестиваль аштаква зымгIва дгIарыкIвшатI абаза шарабзараквагьи дырпшытI.
Апсны Республика авице-президент Барцыц Аслан йгIаликIгIатI афестиваль гIвымшкIла апсуа йгьи абаза швкIыгIвпхьадзараква айззартата, зымгIвагьи акультури аспорти йыргвыргъьахъвта йшырзалыз.
«ХIуагIахъа разазаъаща атурых апны ари магIын ду зму гIаншарапI. ХIара йхIгвапапI араъа, Апсны апны, хIайщчви хIахщчви ъагIбауа. Багъьата йхъасцIитI: «Абаза» фестиваль цIаста йщаквгылуаштIта ужвыгьи сквшщарда зымгIвагьи хIаргвыргъьалуштI», – йхIватI авице-президент.
Афестиваль дасузлакIгьи йгвы рыцIа йазгIайуа уыскI шйызгIалхуаш, йгвы чIвауата штшпсищуш апшта йадгалан. Ауи апшта асабиква бзи йырбауа амультфильмква рфырква ъагIарыцхъвмаруаз шта кIьыда рзалхын.
«Сара йыздырхитI Асабиква рхчара амш йазынархаз агвыргъьахъв (ауыгьи июнь агIан АААК йаднагалын – аредакция ррытаразга). Ауи аналга уыжвласыла ужвыгьи ауи апш закI адыргалпI-хIва хIгвыгъун. Сара араъа швабыж йсгвапхитI», – йгвыргъьара хIыцагIвишатI быжьсквша йырту Барцыц Марат.
АААК йаднагалуа агвыргъьахъвква ауат рысасчва уагIахъа фаша ршвырцIарныс швхIаусыгIвата йырзалитI. «Абаза» культура-спорт фестивальгьи ауат йрапшхатI. ЙъакIвызлакIгьи апсуаква йырцIасыз ачгIвычаква зшву дугьи хвыцгьи урыквпшуан. Ауат афашаква афестиваль швабыж йдрыпшдзатI.
«Сара араъа сани сыгIвзачви сыцта сгIайтI. Швабыж йсгвапхитI. Сара кIвымжвы ахъасцIарныс бзи йызбитI, йауа ухIварыквын сара сапсыуапI», – йхIватI Гвынба Арсоу – афестиваль кIвымжвы зышвата йгIайыз ачкIвынхвыц.
Адуней апсуа-абаза конгресс йаланакIуа апхIвысква рсовет аунашвачпагIв Ардзынба Гета агьагьара йахъадзгылу ахIауа даквчважвауата йгIалылкIгIатI афестиваль адгалагIвчва йшайгвгъуз апшта йшцаз.
«ЗымгIва рацкIыс хIыззпшуаз ншатI: хIара апсуа йгьи абаза чкIвыныргIа йрыуата щардагIвы абахIырдыртI. Йацы араъа ауатыкв апны апсуа йгьи абаза бзихагIвчва ацынхун. ХIара ауи апхъала йабамдыруаз [аршIыйагIвчва] гвыпквагьи абахIырбатI. Ажва гьалам, хIара йанакIвызлакIгьи хIапщылан, ауаса афестиваль ацзакIыра йауатыкв духатI. ЗымгIва аквшватI, хIаргьи хIгвыргъьитI [Апсны апны] йапхъахауа «Абаза» культура-спорт фестиваль ъагIахIрайгваз», – лхIватI Ардзынба.
Ауи йылхIватI афестиваль адгалра уыс щарда шапщылаз.
«ХIара ари амш щарда хIазпшытI, швабыжта ауи тшазхIрыхIазыруан, хIыхъвда йыквыз амагIны гIахIгвынгIвуан. Апсны ауыжвгIанчIви турых апны хIайщчва абазаква йапхъахауата абари апш гвып дута рыжвла ъану рпсадгьыл йгIайтI: ауат рпхьадзара 100 йнаднацалитI. ХIара хIыхъаз магIын ду аман турыхла, щала, бызшвала хIшазакIу гIахIырбарныс», – лгвгIанаграква хIыцагIвылшатI Ардзынба Гета.
Афестиваль йгIайыз ауагIа джьасыдза ахъвмарра йалан.
Апсны апны йапхъахауата йакIвшаз «Абаза» культура-спорт фестиваль октябрь а 16 атшын Адуней апсуа-абаза конгресс ЙхIаракIу асовет аунашвачпагIв йкубок ахъазла хвитта абакIрала адуней анкъвакъвраквала йгIалаган хымшкI йнайтI.
швталра йа тшаншвцIара атахъыпI.