Адуней апсуа-абаза конгресс Гагра къала апны хъвшара шIыц гIаннаршатI йгьи Апсны ашIыпIа хъвшараква рпхьадзара йаланархIатI.
МартI а 5 атшын Гагра район абзазагIвчва рынйара апны АААК ашIыпIа хъвшара гIандыршатI. А-Конгресс анхара, уыжвласыла ауи хачIвыта апахь йаргылуа абзазагIвчва ахадыргIвазатI АААК ауысхагIвчва Гицба Инар, Торчуа Леван, Алшундба Инвер.
А-Конгресс архъйагIв секретарь Гицба Инар анйара йгIадгылыз йшрайхIвызла, ашIыпIа хъвшараква ргIаныршара мурад хъадата йамапI – ашIыпIаква рпны ауагIа рбзазара аъаща агъьызчIвуа апроектква ацрыдынхалра.
«ЗымгIва рапхъа йгылата ауагIа йгIаргвынхIыргIвырныс хIтахъыпI дзачIв гIвычIвгIвысызлакIгьи сабап гIайгырныс шйылшуш. Апхъапхъа йунагIва апны, уадыргIвана дызтабзазауа акъала апны, ауасамцара а-Республика апныдза. Ауыс бзиква рырхъйара йазгIашыкъу ауагIа хIзадкIылуазтын хIмурад гIахIыдахIвта йхIпхьадзуштI», – йхIватI Гицба.
Ауи ацынхара ауысла абзазагIвчва джьгарра гIадырбарныс йаквгIазшIиттI.
«Йзапш проектызлакIгьи абзазара йалауыжьра ахъазла ауи апхъапхъа йгIащтIухта уаквчважвара атахъыпI. Кытипхьадза, районипхьадза рбаргвыраква апшыпI, абаргвыраква йырхъазымкIва ауат лшарата йрымугьи гIапхьадзара атахъыпI. УызлагIалагара атахъу рыцIа йхвыцу апроектква ракIвпI, уадыргIвана рыцIа йпхатшакву урыдгыл йауаштI. АгIвагвана ауыра джвыквызцIауа йапхъахауа ачIвырхъа акIвпI», – йгIаликIгIатI Гицба Инар.
Анйара йалаз Агрба Эланна йшылпхьадзауала, абаргвыраквагьи зымгIва рапхъа йырхъйара атахъу апроектквагьи агвы йыквпI, згвы цхIауа абзазагIвчва рыхъазла йнахвапI.
«А-Конгресс анхагIвчва съадзарыздзыргIвуаз йапшым анархараквала апроектква рыхъазла хъвыцра щарда схъа йгIаташватI. Аурам уанбжьалгIвацара йырхъйачIву уыс щарда уыла йгIацIашвитI, згвы цхIауа дзачIв бзазагIвызлакIгьи йымачв аквкIта йуйырбуштI ауат», – лхIватI Агрба «апсахра дуква злагIаджвыквылуа ауыс тшытмытква рырхъйара шакIву» гIацылцIахуата.
Ауи лгвы йасуата йылхIватI зынзаман культура къала хъадата йырпхьадзуз Гагра абзазара уахьчIвала швабыж йшщаквысыз.
«Апсны ахъазла Гагра район амагIны Россия ахъазла Санкт-Петербург магIныта йаму йашIуырпшы йауашта йаъан зынзаман. Ужвы хIара тшгьауацIыхIхуам, хIуыс рыцIа-рыцIа йтахшваххитI. Гагра гIащаквыргылхра атахъыта йспхьадзитI. ЦIабыргыта зуыс баргву анахьанат аштаква йгIарыквухырквын Гагра район алшараква агалагьи рыцIа йдупI. Гагра апны акультура гIацарпахра атахъыпI, араъа йакIвыршалара атахъыпI афестивальква, арт-проектква», – йылпхьадзитI Агрба.
Акъала абзазагIв Барцыц Наталья ари йапхъахауа анйара апны зынла йгIалрахатI акъала акультури атурыхи ргIахчара йгьи арыпхьара знархару апроектква.
«Гагра сара сыхъазла Ницца чкIвынкI йагIвызапI. Йара араса дхъвыцуазапI араъа сквшщарда йтабзазауа дзачIвызлакIгьи. Сара Европа бзи йызбитI, ауаса Европа апны ухъызхуи хIпны ухъызхуи гьазакIым. Сара сапсыуапI, сара сыхъазла магIны ду амапI хIуагIахъа культура абайара агIахчара. ЙхIвара атахъыпI хIкультура шбайу йгьи йшпшдзу. Швабыж йстахъыпI Гагра амузей гIаншарныс – дзачIв сабийызлакIгьи йцри къала атурых йдырныс ахъазла. ЙырдырргIатI асабиква Гагра ахьыз дута йшаргауа, ажва ахъазла, араъа асквш 1903 агIан йдыргылыз аклимат станция, йырдырргIатI йапхъахауата йырчпаз Гагра акарта Венеция йтагылу Марк ших йхрам апны йшынкъвыргауа. ХIхъа злахIырдууаш ари апш швапха щардапI», – лхIвитI Барцыц.
Ауи датшагьи йшгIалылкIгIазла, йцIыхъвахауа азаман рхабарква лгIитI АААК анхара шакIвшауа, ареспублика арайонква рпны ауи апроектква дахIврала йшхъйауа. Ауат рырхъйара збзиру ауысхагIвчва гвып «рамайчри ргвапари» ракIвта йылпхьадзитI.
«А-Конгресс апны тшадызкIылыз хIкъраль апхыцIа йазхъвыцуа уагIапI. Гагра абзазагIвчва баргвырата йзынйауа ррыдзра апны ауат ъагIахIыцIагылуа швабыж йсгвапапI. Ауат рапш уагIа хIыцIагылата, сшхъвыцуала, уыс щарда хIзычпуштI, ауат ауысква рырхъйарагьи агала йласхуштI, рхIагIара нардзазлуштI», – лхIватI ауи багъьата.
Анйара ацIыхъва акъала абзазагIвчва Адуней апсуа-абаза конгресс йшалалуала ахIвара швъаква ргIвытI.
Гагра ашIыпIа хъвшара даунашвачпагIвхатI Агрба Эланна. Ауи йалалтI Багателиа Давид, Аристава Астамур, Бутба Анри, Барцыц Наталья. Гагра апны АААК ашIыпIа хъвшара агIахътIрала Апсны йгьи Трыквшта рпны йгIандыршаз ахъвшараква рпхьадзара 35 йнадзатI.
швталра йа тшаншвцIара атахъыпI.