Апсны апны 10.04.2020 21:55 14907

Апсны аунашвачпагIвчва акоронавирус шIкIгIара абакIра йазынархата амаль шIыцква нарахвтI.

Апсны Республика апрезидент йхъвдаквцIараква зырхъйауа Бганба Валерий Апсны Республика ашта апны ашIакIра амаль шIыцква йгьи амыгIвхъгараква йырзынарху администрация джьауапкIра шщаквйыргылуала а-Декрет мачвы ацIайцIатI.

Апрель а 11 асахIат а 00.00 йгIашIарышвта АгвжважвагIва аъаща ъадзащаквгылу агIамта аурала Апсны ашта шабгу апны акъральгIвчва аурамква, адзтшпурамква, апаркква, аскверква йа анахьанат ажвлара тыпква рпны йаъазларныс йгьахвитым.

Адекрет апны йгIарбапI йщаквдыргылыз ашIакIра амальква ззынархам акъральыгIвчва: азгIвадарахчара нхартаква, акъральыгIва нхартаква, апхаста-агIахчара, амцарычвра, акоммунал къвырльыкъвхартаква рынхагIвчва, ахабзахчара къвырльыкъвхартаква йгьи абанкква рынхара адгалра зхъвдаквцIару аъачIвагIагIвчва.

АшIакIра амаль шIыцква гьырзынархам рынцIри рызгIвадари йшварагIвару аъаща йташвата айъазара цхърагIара йазыбжата ауи райдзарныс ахъазла аурам йгIабжьалуа абзазагIвчва.

МыгIвхъгарата йгьырпхьадзум абзазагIвчва афачIвпкъыгIваква, амедицина пкъыгIваква, анышвкъвара агIаджвылгара рыхъазла йгьи зхъа ззынкъвымгауа йа сквшы 60 райхIа зныбжьу йырхьпшырныс агваны йгIаджвылцIра анатахъхара.

Арат ашIакIра амальква йгIарыцIанакIуата ажвлара тыпква рпны гIвыджь райхIа йнамдзауата йаъазларныс йахвитпI акъральгIвчва йара бзазартакI апны йацтазтын. АбзазагIвчва акытмлыкврхIара нхараква ъадырхъйауа ашIыпIа йцузтын ауыгьи мгIвхъгарата йгьырпхьадзум.

COVID-19 тшауацIнамхырныс ахъазла йщаквдыргылыз ашIакIра амальква йапхъахауата ймыгIвхъызгауа акъральыгIв амыгIвхъгара йгватра азынадырхитI. ЙгIванхауа ймыгIвхъигузтын сом хынзыкь къвадыта йыквшвитI. АхъаркIьыдара ацIасква мгIвхъызгауа къвадыта сом хвынзыкь йыквшвитI. АшIкIгIара згIва здырбалыз абзазагIв йгьи йырзахвата COVID-19 згIва зхьуа ачымазагIв йа ашIкIгIара гIалцIырта йанкъвгагIвыта йщаквдыргылыз акъральгIв ахъаркIьыдара цIасква мгIвхъыргазтын ауат къвадыта йрыквшвитI йахъыхацIыхта сом жванзыкь йгьи сом зыкь 20.

Адекрет атекст абгата араъа тшахашвыргIвазарныс швылшуштI >>

COVID-19 знархару аоперштаб ансимш тшазынархара

Амедицина уысквала аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас Апсны абзазагIвчва йрызцауа йансимш тшазынархара апны йшихIвазла, Апсны апны йагIвсыз ауахъи атшыни руацIа COVID-19 ауысла гIаншара шIыцкIгьи гьгIадымрыбергьыльтI.

Ауи акIвпIта, Апсны апны уахьчIвала COVID-19 згIва гIазахвта йаъу гIвыджь ракIвпI. АгIвчымазагIвчвагьи Гагра йбзазитI, тгIачвакI йрыуапI.

«Акоронавирус шIкIгIара зхьуа ачымазагIвчва Гвдауыта аквта чымазагIвтара апны йрайъазитI, йашIамсуата йырхъпшылитI, ауат раъаща гьайчвахум. ЙагIвсыз ауахъи атшыни руацIа ужвыгьи жвизыгIв коронавирус ауысла атестква йыркIылстI. Ауат зымгIвагьи ргIарбараква удрыразитI», – йхIватI Конджариа.

Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, апхьартаква амцIырщттI, акъральыгIва нхартаква рынхаразаман ахъадрыстI, афачIвтйыртаква, йхъаду абзазага пкъыгIва тйыртаква, аптакьква ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, ауасамцара.

Асквш 2020 мартI а 28 йгIашIарышвта ГвжважвагIва аъаща хабза щата амата араса йщаквдыргылтI: гIамтакIла Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI ареспублика ахьыла йгIацапахуа Апсны акъральгIвчва рыхъазла.

Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.