АААК ЙхIаракIу асовети а-Президиуми йрылакву декабрь а 24 йанйан асквш 2020 агIан нхарата йакIвшаз йаквчважватI йаргвану азаман ауацIа уыста йхара атахъугьи лырхтI.
Барганджиа Саид
Адуней апсуа-абаза конгресс асквш 2020 агIан нхарата йакIвнаршаз йаквчважватI декабрь а 24 атшын йакIвшаз ЙхIаракIу асовет а-Президиум алачIвара апны. АлачIвара онлайн амальла йадыргалтI. Ауи йалан Апсны, Германия, Трыквшта, Аджария, Россия (КъЧР, КъБР, Москва, Санкт-Петербург, Ставропольшта) йауата а-Президиуми ЙхIаракIу асовети йрылакву. Йапхъахауата а-Президиум алачIвара далан Апсны Республика репатриацияла акъральыгIва акомитет аунашвачпагIв Харазиа Вадим. Ауи аъанатIа ъанкъвигауа йгIалцIла Харазиа далрымхуата а-Конгресс а-Президиум далалитI, йауа ухIварыквын, АААК а-Уставла Апсны Республика репатриацияла акъральыгIва акомитет аунашвачпагIв а-Президиум далашвитI.
Асквш 2020 агIан анхара: агвчIагIв уысква, пандемия, абаза уагIа ртшадкIылра
АААК аппарат аунашвачпагIв Таниа Кан йшгIайхIвазла, уахьчIвала а-Конгресс йаланакIуа а 14 шта хъвшаракI уагIата 1500-гIв райхIа рылапI.
АлачIвара йалаз рпахь дгIачважвауата Таниа Кан асквш ауацIа ашIыпIа хъвшара шIыцква шгIаншуз гIаликIгIатI: ауи апшта Апсны апны йаъаз ашIыпIа хъвшараква 31 гIарылахIатI, Трыквшта апны – 8.
А-Конгресс агвып асквш 2020 ауацIа уыста 28 адыргалтI.
АААК анхагIвчва коронавирус апшIагылра джьгарта йалан: а-Конгресс тшгIазыназырхаз абашталагIвчва-репатриантква зымгIва – ауат 126-гIв йнадзун – цхърагIара радзатI.
«ХIара ауат карантин ъадзащаквгылаз йрызхъушыз фачIвыла йадыгIгалтI», – йхIватI Таниа Кан.
Ауи алачIвара йалаз йгIаргвалайыршвахтI Эгьзакь Мусса Апсны згIвадарахчарала а-Министерства апны йгIандыршаз коронавирус апшIагылрала аштаб йарыхIазырыз ашвъа йаныз аргIапсгакви амедицина ъамапсымакви шихвгIаз.
Трыквшта апны йгIаныршу ашта хъвшара карантин ъадзаныз Трыквшта апны йапхьауа апсуа студентква ахчала йырцхърагIатI.
Таниа Кан анахьанат ауысквалагьи агIарбараква дрыквгIашIастI. Ауи апшта, КIавкIаз айсра йаладзкваз рхъмаштылра мшы агIан апхъала йцIасыз «Ащамака» джьабара чвамза аркIра гIащаквдыргылхтI. Согъвым, Атара, ПакIваща рпны асабиква рыхъазла агвыргъьахъвква адыргалтI. «Апсышвала хIчважвитI/абаза бызшвала хIчважвитI» проект апкъ йтата цри бызшва ъаддырдыруа онлайн апхьара сахIат 80 урышв, ангьльыз, гIарып, трыкв бызшваквала асубтитрква рыцта йадыргалтI.
АААК агвып Абаракъ амш йазынархаз агвыргъьахъв джьгарта йалан. Ауи амш йадахIвуата Эгьзакь Мусса ЦIулукIьиа Анри йхIвауата Гвынба Анри йаницIаз «Апсны абаракъ» ашва Апсны ауагIа согIата йрыйттI.
Асквш 2020 агIан чкIвыныргIа рыжвлара адкIылара «АМЧ» рыцта «Ащтра» проект гIаларгатI – ауи апкъ йтата акытква рапхьагIвчваква рыхъазла Апсны ауацIала амдараква адыргалитI. Апроект асквш 2021 агIангьи йакIвшуштI.
Адырраква рымш йадахIвуата а-Конгресс агвып апсуа бызшвала кIара рныта йазалхта йддрычпаз атетрадква Апсны апхьарта 76 йырзыршатI, ауат ракIвымкIвагьи Трыквшта ашта хъвшара ахьыла йгIарщтийыз топ 650-и волейбол хъвмарра ахъазла 15 харкIи апхьартаква йрырттI.
Асквш ауацIа джьгарта йынхун АААК а-Дискуссия клуб, ауаъа апсабара ахчара, ани асабии рызгIвадара рыбагъьара йырзынархаз, психология нархара змаз ауысква йрыквчважвауата анйара 20 акIвшатI.
Баслахв ашIыпIа совет агIаджвыквцIарала акыт абзазагIвчва ркъарула акыт апхьарта йынхауа арыпхьагIв дъабзазуш тдзы дыргылитI. Ауыхвага пкъыгIваква ауат а-Конгресс агIвзачви йызцынхауа ауагIи хвыдъа йгIарырттI. Йара ауи апшта, акытква рбзазагIвчва ркъарули а-Конгресс агвып рцхърагIарали Джьырхва кыт апны апхьарта аспорт пещ дырчIаджьитI.
Таниа Кан нхара уысла агIвыма къральква рпны ацараквагьи дрыдсылтI. Асквш 2020 агIан АААК архъйагIв секретарь Гьыцба Инари ЙхIаракIу асовет йалу Алшундба Инвери Сирия апны апсуа-абаза йгьи агвхъауа диаспораква йрынйан ауаъа АААК ашта хъвшара гIаныршара ауысла йрачважватI, Сирия апны йгIаныршу агвхъауа гвчIагIвчпагIв адкIылара ацынхара уысла ангIалра рыдырчпалтI.
ЙтыцIуа асквш агIан АААКи «Алашари» апсуа-абаза уагIахъа ргвбайара тынха гIахчари тшауацIнарыхри йырзынарху «Амазара» проект джвыквырцIатI. Ауи йаланакIуата ауагIахъа гIахIвыщаква, амакъымква, ахIваспаква йгIарыквчважвауа авидеоква хъырхтI.
ЙгIачважвара алйыргауата Таниа Кан ЙхIаракIу асовет аунашвачпагIв Эгьзакь Мусса щарда мцIуата Санкт-Петербург йтагылу Абнатехника къральыгIва университет ангIалра шрыдичпалызгьи гIацицIахтI. Ауи абзирала Апсны йахъазымкIва апсуа-абаза диаспора ъану, а-Конгрессгьи ъанхауа акъральква зымгIва йрыуу чкIвыныргIа Россия йагъьу ауниверситетква йрыуазакIу апны дырра гIацIыргарныс лшара раутI.
«А-Конгресс ахабарргарта портал апны ауи ахабар йампхьаз йшвсырдыритI: ауаъа йапхьарныс зтахъу аджвырагIв аъазтын райша тшгIахIзынашвырха», – йхIватI АААК аппарат аунашвачпагIв.
Ауи асквш 2020 ауацIа йакIвшаз ауысква, нхара уысла аныла-арыла ацараква, апроектква рырхъйара, анхагIвчва рынхаша хIакъ рытра агьиква ахчата йрыквдрыдзызгьи гIарылайхIватI – сом 13 312 000.
«Эгьзакь Мусса ХIабальа йпа йалайцIаз асом 13 312 000 акIвпI ауи ахча гIазлыцIыз», – йхIватI Таниа Кан.
Асквш 2021 йауыс хъадазлуш
А-Конгресс архъйагIв секретарь Гьыцба Инар йкьазу ангIадза асквш 2021 агIан а-Конгресс анхара АААК ЙхIаракIу асовет аунашвачпагIв Эгьзакь Мусса йрыбагъьаз ахачIвква йшрыквыргIапсызлуш гIайхIватI. Гьыцба йгIаликIгIатI анхара аэпидемия аъаща шцуш йгIаквхта йадгалра шатахъхуш.
Гьыцба Инар йшихIвазла, асквш 2021 агIан акъаруква хъадата йыззынархазлуш Апсны акытква рпны а-Конгресс ашIыпIа хъвшараква ргIаныршара акIвызлуштI. Ауи анхара йгIалцIла ашIыпIаква рпны абзазагIвчва рахIа йыззыбжу ауысква зырхъйуш йджьгару агвыпква гIаншитI.
АшIыпIа хъвшараква шгIаншауи ауат уыста йдырхъйауи йгIаквхта йгIайуа асквш адзынквакI рапш ауат ахъвшараква рхъадаква йауацIыху ранйара адыргалырныс йаквдырпшитI.
Гватра ду азалхызлуштI чкIвыныргIа рыдынхалра.
«Адуней апсуа-абаза конгресс чкIвыныргIа АААК анхара йгIаланаркIра магIын ду азнабитI. Ауи йгIалцIла хIара ашIара йрымагIальаматхуш абадырга амальква хIырзыпшгIитI», – йхIватI ауи йгьи йгIацицIахтI Апсны апны акъыль рыпшгIара йгьи ршIыйара нархара зму «Дюна» клуб шынхауа. Ауи йалакву рбзирала Апсны апны тшауацIырхитI акъыльла анкъвакъвраква «ЧГК», «Брейнринг», «Дасу йхъвмарра». Гьыцба йшихIвауала, АААК ауат радгалрала ашвапха гIанарысабапта «Изакуи? Иаба? Ианба?» (апсуа бызшвала – «ЙачIвыйа? ЙабакIву? ЙанбакIву?» – гIаныцIитI – аредакция ррытаразга) телебара хъвмарра аднагалра агвыгъапI.
«Ауи апроект хIычкIвынчви хIыхIвссакви йхъвмаруамцара апсуа-абаза уагIахъа ртурых, рэтнография, ршIалахIвара йырзынарху адырраква йшрыланахIвуш йазынхуштI», – йхIватI АААК архъйагIв секретарь.
Ауи датша хабаркIгьи гIарылайхIватI: АААКи Санкт-Петербург йтагылу Абнатехника къральыгIва университети шангIалыз апшта асквш 2021 мартI-апрель мызква рагIан ауниверситет арыпхьагIвчва Апсны йгIайта араъа йауата ауаъа йыцIалырныс зтахъкву архъвыхраква рзадыргалуаштI.
ЙхIаракIу асовет аунашвачпагIв Эгьзакь Мусса апсышвала йгIвыта йгIацIырщтыз атетрадкви амшгIвыракви йгIайуа асквш агIан сентябрь а 1 йадахIвуата Апсны апхьартаква зымгIва рпны йапхъахауа акласс йцауа йшрыларшуш йрыбагъьатI.
Москва, Санкт-Петербург, Къарча-Черкес, Къабард-Балкъар рпны йгIаныршу ашта хъвшараква рпны уагIахъа гIахIврала атшыбжьаракви апсуа йгьи абаза бызшваквала апхьаракви йшакIвшуз апшта йакIвшуштI.
«А-Конгресс КIавкIаз ауагIахъаква ркультура афестиваль, йапшым алитература анйараква йрылазлуштI. Адуней апны аэпидемия аъаща бзихузтын йапшым акъральква рпны адиаспора рыцынхара джвыквхIцIахуаштI», – йхIватI Гьыцба Инар.
Ахъвыцракви агвгIанагракви. АААК ЙхIаракIу асовет йалакву ражва
АлачIвара апны дгIачважватI ЙхIаракIу асовет йалу Кобахиа Беслан. Йажва джвыквицIауата ауи асквш 2020 агIан адуней зхIваджьыз а-Конгресс йапхъахуз апрезидент Шамба Тарас дгIайгвалашвахтI. Шамба Тарас йцIыхъвахуз йымшдза АААК чIахIра зму дапрезидентын.
«Ахабар нашхыйа анга Шамба Тарас йыхьыз ауагIа йшгIарылахуш апшта закIы йахьцIара шатахъу ауысла зажва зхIваз Эгьзакь Мусса, Чагва Армида, Этлыхв Олег, Ашба Роберт датшагьи хIайщчва абазаква йрыуата щардагIвы сшырзыразу схIвара стахъыпI. Йшыжвдыруа апшта, Къарча-Черкес апны ауи йыхьыз спорт адкIыларакI йшахьырцIушла щаквыргылра нарахвхьатI. Апсны апынгьи ауи йыхьыз анцIрала йшгIанхуш апшта щаквыргылра лырхтI», – йхIватI Кобахиа.
Эгьзакь Муссагьи а-Конгресс агвып шабгугьи асквш 2020 ауацIа нхарата йакIвдыршаз ахъазла дшырзыразу йхIватI АААК ЙхIаракIу асовет йалу ХIапIатI АхIмад. Ауи Трыквшта апны йгIаныршу АААК ашта хъвшара анхара даквгIашIастI.
«ХIара хIкъарула йдучвам бюджет лыхIхтI. Ари асквш ауацIа лира зкьы 20 аъара азхIкIкIын ауи ахча азъарагIвшара Апсны йауата Трыквшта апны йапхьауа астудентква цхърагIагата йырзалхIхтI, азбжагьи Апсны акытква рапхьартаква йрыларшуш аспорт ъамапсымаква рылахIхвгIатI. Ажва гьалам, ауи ахча йхIтахъу зымгIва йгьазхъум, ауаса йхIылшауа тшыткI шхIчпуш хIащтапI», – йхIватI ХIапIатI АхIмад.
Датшагьи ауи йгIаликIгIатI къарута йаъу адкIылта арепатриантква рыжвла ъану рпсадгьыл йшгIацапахуашла проекткI лыхра шатахъу.
АААК ЙхIаракIу асовет йалу Чагва Армида, ага йбаргвызтынгьи, асквш 2020 агIан Ставропольшта апны йбзазауа абазаква йгIарыквчважвауа абзазара йгIахъыху фильм хъырхныс шрылшаз гIалхIватI.
«Ари йбаргвыз асквш ауацIа хIара ауагIа рыхъазла бзиракI шхIхуш хIащтан. РыцIа йхъаду уыста йхIчпаз – Ставрополь край йту абазаква йгIарыквчважвауа фильм хъыхIхтI. ПщсахIаткI гIазлухуаш ахъыхIхын сахIаткI йнадзауа фильм хIрыхIазыртI. Ауи абазаква Ставропольшта йшгIатанагаз, йшгIабзазаз, уахьчIва уыста йыздкIылу гIанахIвитI. Ставропольшта йауу йбергьльу абазаква зымгIва хIрынйатI йгьи хIгIарыквчважватI», – лхIватI Чагва Армида.
Ауи йгIацылцIахтI афильм абаза бызшвалагьи йатаркIта Трыквшта апынгьи ауагIа запшуата йырчпарныс шыргвыгъу.
Армида Ставрополь къала апны йгIахъыртIыз абаза бызшва йъадрыпхьауа апхьарта адахIвраквагьи дрыквгIашIастI. УахьчIвала ауаъа 30-гIв абызшва ддырдыритI.
«ХIара арыпхьарала хIамальква лыхIхын йхIымапI, ужвы, апандемия агIангьи, хIара Дагъстан йауу Россия а-КъральыгIва Дума адепутат Каджаев Мурат йгIанйыршаз Ацри йгьи акъральыгIва бызшваква радкIылара «Ажва» ауысхагIвчва хIхабар ргIан Интернет апны арыпхьарта тып гIахIырттI, техника нархарала апхьара сахIатква радгалра ахъазла йатахъу зымгIва хIзагвындыргIвитIта онлайн амальла асабиква ахIрыпхьитI. Ауи абзирала Москва, Нарцана, Невинномысск, Ставропольшта йбзазауатагьи апхьагIвчва гIахIылахIатI», – лхIватI ауи.
ХIара йхIчIву агIарысабапыгIвчва зкьышвкIыгIв
Адуней апсуа-абаза конгресс ахабарргарта портал анхара айшыста дгIаквчважватI ауи аредактор Хагба Изольда. Ауи йгIалгвалашвахтI асквш ахъа АААК ахабарргарта портал анхара «йанакIвызлакIгьи апшта» йшджвыквнацIаз.
«ХIара АААК ацхърагIарала шIыцрата йыншуз зымгIва хIгIарыквчважвун – апандемия ъадзагIахIыламылсыз. УацIыхъвангьи апортал анхара мшкIылагьи йгьашIамстI. АгIвыраква рформат хIпсахтI. ЙгIатахIцIуз хабаргIвацан, айхIарала Апсны апны коронавирус апандемия ауыс зкву агIвыма къральква рпны йту хIдиаспора йдхIырдыруан. ХIсайт атыпкI КIавкIаз шабгугьи, кIьыдата Апсни Къарча-Черкеси рпнынгьи азгIва йапщылу апхьадзараква гIанарбауата йхIчпатI», – йгIалылкIгIатI Хагба.
Ауи йшылхIвазла, ага акъраль апны уыста йакIвдыршушыз, а-Конгресс йаднагалуашызгьи рылата, райхIара ахъыргазтынгьи, асквш 2020 ауацIа асайт гIвыра 155 гIаталтI, ауат хвбызшвакIлагьи йшатаркIуа гIаупхьадзарыквын гIвыра, видео, сурат формат зму материал 930 йнадзитI.
«Асквш 2019 йгIаквухырквын асайт уагIата йталуа рпхьадзара процент 90-ла йалахIатI. ХIара хIа йхIчIву гIарысабапыгIвчвата зкьы 100-гIв райхIа хIымапI. ЙхIвара атахъыпI хIгеографиягьи щарда шгIацIанакIуа. ГвынгIвырапI хIара хIгIвыраква Россия, Апсны, Трыквшта рпны йбзазауа ауагIа шрыпхьауа, ауаса ауат йырхъазымкIва апхьагIвчва хIымапI США, Ирландия датшагьи къраль 150 рпны», – лхIватI Хагба.
«Абзазара йалагIжьуаштI»
АгIачважвараква зымгIва данрыздзыргIвы амщтахь Адуней апсуа-абаза конгресс ЙхIаракIу асовет аунашвачпагIв Эгьзакь Мусса йгIаликIгIатI ауат ажвата йгIаргыз зымгIва АААК агвып гватшныта йшрылапшуаш.
«ЙшвхIваз зымгIва гIгIвытI. ЙалхIыргата гватшныта хIрылапшуаштI. Шваргьи швалата ауат абзазара йалагIжьуаштI», – дацIачIвагъватI Эгьзакь Мусса.
Шамба Тарас йзынархаз Кобахиа Беслан йгIачважвара кIьыдата даквгIашIасуата Эгьзакь Мусса йгIаликIгIатI а-Конгресс йапхъахуз апрезидент «Адуней апсуа-абаза конгресс йахауа ауысипхьадза, йакIвнаршауа акциипхьадза, йылнахуа хъвыцрипхьадза дшрылазлуш».
Анхара агIарбараква йъарыквчважвауа ахачIвквагьи ъалырхуа Адуней апсуа-абаза конгресс ЙхIаракIу асовет а-Президиум алачIвараква йазалху гIамта рызбжьата йакIвшалитI.
швталра йа тшаншвцIара атахъыпI.