АААК Апсны йапхъахауа акласс апхьагIвчва йапхъахауа апхьара мшыла йрайхIвахIвын согIата апхьара тетрадква рзыршатI.
Барганджиа Саид
Адырра амш йадахIвуата АААК Апсны йапхъахауа акласс апхьагIвчва апхьара тетрадта хвынзыкь рзыршатI. Атетрадква рхъкъьа апны апсуа алфавити акъральыгIва дамыгъаква рсураткви аныпI.
Ари агIаншара даквчважвата а-Конгресс апхIвысква рсоветква рунашвачпагIв Ардзынба Гета йшылхIвазла, АААК джьгарта агуманитар йгьи агвчIагIвчпара акцияква йрыцыркIитI.
«Адырра амш знархару хIара хIакция «Агвы апхара» зхьзу акция (асквшква 2018-2019 рагIан Апсны йгьи Къарча-Черкес рпны йакIвшуз АААК акция, ауи агIан цхърагIара йазыбжаз атгIачваква чгIвыча комплект рзыршун – аредакция ррытаразга) йаланакIуата йакIвшатI. ХIара а-Республика арыпхьара аминистерства апхьартаква тетрадла радгалра ауысла хIырцхърагIарныс хIащтан. А-Министрества тетрадь 4000 рыхIттI. Ауи акIвымкIва БОО «Киараз» апхьагIвчва рыхъазла тетрадь 300 хIщтитI. Адресла йалыхта атетрадква рщтиуаштI Лыхны, Бедиа йгьи Бзыпта апхьартаква рпны. Абараса АААК йапхъахауа акласс йыцIалыз асабиква йрайхIвахIвтI», – лхIватI Ардзынба Гета.
Апсны арыпхьари анауки р-Министерства апресс-секретарь Кутелиа Аслан АААК дшырзыразу йхIватI йгьи абари йапшу акцияква радгалра магIны шаму гIаликIгIатI.
«А-Министерства йрыртыз атетрадква зымгIвагьи а-Республика йапхъахауа акласс апхьагIвчва йырзыршуштI. УахьчIвала атетрадква рыртхьатI Гвдауыта район, Согъвым йапхъахауа апхьарта йгьи Очамчыра апхьарта-интернат. ГIамта айшысла атетрадква Апсны анахьанат апхьартаква рпны йапхъахауа акласс йапхьауа асабиквагьи йырнапIыцIашвуштI», – йхIватI апресс-секретарь.
БОО «Киараз» ауысхагIв Аргвын Кадыргьи Адуней апсуа-абаза конгресс разыра ажвала тшазынайырхатI. Ауи йшихIвазла, «Киараз» йцIыхъвахауа ахвысквша рурала дара рхъаталагьи рыцIа йкъвльейсызу атгIачваква рсабиква апхьарта йазадыргалырнысла йырцхърагIитI, аканцелярия пкъыгIваква рзырхвгIитI.
«А-Конгресс йгьызным хIара хIадкIылара йъадзацхърагIахьу. Швабыж йхIгвапапI хIабашталагIвчва, хIайщчва ангIахIыцIагылуа. Зтахъыраква намхъауа атгIачваква рыхъазла ауи цхърагIара дупI», – йгIаликIгIатI Аргвын Кадыр.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса апхьагIвчва драйхIвахIвуата йшгIаликIгIазла, Адырра амш йазалху гвыргъьарамшыпI: ауи «йджьащахъву адуней шIыц йазцауа амгIва гIахънатIитI», ауи амгIва уаныкву «адырри айгвара цкьи удыргвыргъьауа» уымгIвайситI.
«УахьчIва азджьакI йапхъахаута апхьарта апарта йадзхъачIвуштI, азджьакI йапхъахауата йстудентхуштI. Сара Адырра амшла апхьагIвчви арыпхьагIвчви йырхъазымкIва зымгIвагьи срайхIвахIвитI. ЙшпакIву ухIварыквын адырра агIвычIвгIвыс йщаквгылра апны магIны ду зму уыспI. Ауи йанакIвызлакIгьи хвы амапI, агIвычIвгIвара рапхъаламгIвайсра йагIалцIыртапI, ажвлари акъральыгIви йрыщатапI», – йхIватI Эгьзакь Мусса.
Асквш 2019 агIан Апсны апхьартаква рпны саби 27000 апхьуштI, ауат йрыуата йапхъахауа акласс йапхьуштI 3000-гIв раъара.
швталра йа тшаншвцIара атахъыпI.