АААК а-Дискуссия клуб апны йгIандыршаз Ан-абачва рклуб асабиква бжьарала аъачIвагIагIвчва рынйараква аднагалитI. Февраль а 8 йакIвшаз йызкьазууыз анйара апны дсасын абжьагIвы Садзба Астанда, йызлачважвуз апхъагылагIвчва шгIадзынуыргылуаш акIвын.
Барганджиа Саид
Асаби апхъагылагIв хIаль йылата дшгIадзынуыргылуаш АААК Ан-абачва рклуб апны йгIалхIватI акоуч, апедагог, Апсны къральыгIва университет арыпхьагIв Садзба Астанда.
Коучинг – бжьага амальпI, йазалхта ауи йазыбжьу аъачIвагIагIв (акоуч) датша гIвычIвгIвыскI абзазара йа йынхара апны йхъа йазйыргылыз амурад дазынадзарныс дицхърагIитI. Ауи аничпауагьи абжьагIвы дыздынхалуа агIвычIвгIвыс йуыс шйырхъйушла амаль хIазыркIгьи гьйайхIвуам: агIвычIвгIвыс дхъвыцуамца йара-йара ауи гIайаура атахъыпI.Садзба ауи абжьаща жвасквшакI цIуашта йыллырдаруа далагатI. Ауаса, лара йшылхIвауала, коучинг йащату амальква рыцIа пасата – лсабиква анлыгIзуз – йгIалрысабапуан.
Аклуб алачIвара шабгу АААК YouTube канал апны швапшы йауаштI>>
«Сара йапхъахуз ссаби сквш 21 сыртата дсаутI, ауи агIан сара йыздыруан ауи сквш 30 даннадзара ймагIнызларныс йстахъу. Йаргьи уахьчIва ауи дызбара шстахъыз апшта даъапI. СынцIра шабгу ауаса йсчпитI, ауаса ужвы ауи датшагьи зджьакIы сзазыбжьитI», – лхIватI Садзба Астанда.
Анйара агIан аъачIвагIагIв абжьара апны рахIа хъадата йылпхьадзауа ауысква гIахъылтIытI. АжвапIта, зсабиква апхъагылагIв хIаль рылата йызбжьара зтахъу дзачIвызлакIгьи йгIайгвынгIвра атахъыпI «апхъагылагIв ззырхIвауа йыншауа зызгIаджвыквцIата ауи ахъазла джьауап ззыкIхуа шйакIву. Ауи йчпащаква гIазлыцIуа йара хвы змата йпхьадзауа йгIаквхта щаквыргылрата йлихуа акIвпI – дызлашваз аъащаква гьракIвым».
«Айшыста йухIвушызтан, сара асаби уипырамсуата йхъахв йдырхуата, дгIакIвзыршаквауа йара дрымпсахуата йара ауат шизыпсахуаш апшта дшгIадзынуыргылуаш саквчважватI. Сара ауат йрасхIвтI ан-абачви асабикви анамальынтшахара асхъан ауи аъаща йгIатыцIныс йгIарыхъвуш амальква», – араса йгIалырбатI аъачIвагIагIв Ан-абачва рклуб апны йылхаз ауыс.
Садзба Астанда лгIачважвара азцIгIара щарда гIанарыцIстI. Ан-абачва йрымагIальаматын ауи дшапшуа: асаби асабигIзарта друтра атахъума момкIва упны даъата дубжьарыквын рыцIа йагъьума? асабии ан-абачви разазаъащаква щаквгылазара шпатахъу? асаби йбжьара апны андучви абадучви уыста йаларцIара атахъыйа? – датшагьи щарда.
Ан-абачва рклуб аунашвачпагIв Квициниа Кама йшгIалылкIгIазла, февраль а 8 аклуб апны йакIвшаз йапхъахауа гьанйарамызтIта – ауи йалакваз рыцIа пасата йырдырхьаз гIарыхъвун азцIгIараква йрызхъвыцта тамамта йгIадыргылырныс ахъазла. Датшагьи ауи гвы алттI акоуч йылхIвуз ащарда аклуб ауи апхъала сасыта йгIайкваз йырхIваз йшаквшвуз. Аклуб аунашвачпагIв йшылпхьадзауала, ауатква зымгIва рбзирала анйара йалаз ан-абачва йгIарархIвыз цIолата йрыларкIтI.
«Анйара апны хIара йазалхта ауысква хIрыквчважватI. Ажва ахъазла, асаби йылу акъару тамата йгIаугвынгIвыта йахьъатахъула йнауырхауа штшазубжьуш. АъачIвагIагIв анйара йалакваз ргватра магIны зму щарда йырзыналырхатI. ЙгIахIахвпIта – абагвынгIвра: зынзамыза хIара асабиква хIгIаргвынгIвуазшва йыгIбитI, йара йрахIхIвуа гьхIзырзынардзум. Чва зхъауымбауа, ауаса асаби йбжьара апны щарда зпщылу атшытмытква гватра рзыбачIвпI», – лхIватI Квициниа Кама.
Делба Мрамза АААК Ан-абачва рклуб далапI, араъа йакIвшаз анйаракIгьи гьагIвлымщтстI. Ауи дшапшуала, ари йапшу анйарипхьадза амщтахь ан-абачва «рыцIа йагъьхауата тшырпсахитI».
«Ари анйара хъадата йгIалскIгIаз асаби йкъару тамамта йнархара шатахъу акIвпI, – лгвгIанаграква хIыцагIвылшатI Делба йгьи дукI мцIуата дзынйаз швапхакI гIалгтI: –ЙахьчIва ссаби йара уыста дскIыта сйыцхъвмарырныс йтахъхатI, сара арыла сгIайырныс тшадызгалуан. СайгвыгIвра дазпшуан, сара дукI дгьгIатасымрышвтI. Ужвы йгIасгвынгIвитI ауи йгватра датша закIы йазынасырхара шатахъыз».
Анйара апны магIны ззубуш датшагьи уыста ауи йгIалылкIгIатI ан-абачви асабикви разазхъацIара.
Ан-абачва рклуб Адуней апсуа-абаза конгресс а-Дискуссия клуб апны йазалху проекта ноябрь а 30 анхара джвыквнацIатI. Аклуб гIари дызму дзачIвызлакIгьи далал йауитI. АдгалагIвчва йшырхIвуала, ауи ахъазла йатахъу закIзаджвыкIпI – «азыгIальаматри гвышхвари».
швталра йа тшаншвцIара атахъыпI.