АгIвыраква зымгIва
Рхъвыхрата йакIвдыршаз амдара йалан Джьырхви Хвапи кытква рапхьагIвчва. Абагъьата апны атеориягьи йбзу атурыхгьи адыркIылын чкIвыныргIа йауацIыху экскурсия рзадыргалтI.
АГУ апны чкIвыныргIа р-Апсуа-россия форум анхара джвыквнацIатI. Ауи йагIаншара хъадата йалтI СогIвым дуней информация-технология форум (СМИТФ). Айззара чкIвыныргIи спорти руысквала АкъральыгIва комитети Апсны Республика Киберспортла Ассоциации (АКРА) йадыргалтI, ауыс йацнакIтI Адуней апсуа-абаза конгресс.
«Гәыкала» дасаспI Джонуа Саид – агенетика рхъвыхраква радгалагIвчва йрыуазаджву йгьи AA DNA рпроект йалу. Ари рхъвыхрала апроект заджвы йазыгIальаматракIгьи гьынкъвнацум, ДНК-тест акIвыршарала апсуа-адыгьа уагIахъаква ргенетика турых гIардырра йазынархапI.
«Абаза» культура-спорт фестиваль апхъанчIви цIаскви ауыжвгIанчIвири адызкIылуа, апсуа-абаза уагIахъа рацзакIыра гIазырбауа гIаншарапI. КIара гIаныцIуата йаъапI афестиваль июль а 23 – Апсны АкъральыгIва баракъ андрыбагъьа амш – йъаджвыквырцIауагьи.
Амшын КвайчIва йту рапана антахьгьыт йызларапшымйа? Биология наука зладжьащахъвайа? Апхьартаква рпны экология атахъума, Апсны апны арыпхьаща ргIапсрагьи лкIгIарата йамайа? Абаратква, датшагьи щарда дгIарыквчважвуштI «Гәыкала» лгIачважвара апны Цыбулевская Майя – абиолог, арыпхьагIв, Апсны арыпхьарала а-Министерства апны аквтанай йгьи ъачIвагIа дырраквала аунашвахъцIарта аунашвачпагIв.
Апсны акъральыгIва университет апны йбергьльу акIавкIаздырыгIв, афилология наукаква ркандидат ПIаз Сергей йюбилей дыртлапIатI. Апхьахьа абаза фразеология архъвыхра дащатащтIацIагIвпI, ауи анархарала йхIаракIу апхьартаква рыхъазла апхьагаква йгIвытI йгьи акъральыгIва стандартква лихтI.