АААК а-Дискуссия клуб апны йынхауа Ан-абачва рклуб психология нархара зъачIвагIу аэкспертква йрынйитI. Февраль а 22 атшын анйара дасасын апсихолог Кортуа Элана, темата ауатыкв йтан – ан-абачва ргвкIахIара гIазлыцIуа.
Барганджиа Саид
Асабша февраль а 22 атшын АААК а-Дискуссия йаланакIуа Ан-абачва рклуб анйара апны ан-абачва ргвкIахIара гIазлыцIуа, ауи ауыс ушайъазуш йаквчважватI. Аклуб апны йгIайззаз ан-абачва рпахь дгIачважватI апсихолог, Апсны акъральыгIва университет арыпхьагIв Кортуа Элана. ЙшцIасхаз апшта гIвсахIаткI руацIа йакIвшаз анйара ащарда азцIгIаракви айчважваракви йырзалхын.
Аклуб анхара дъалаз гIалрахауата апсихолог йшгIалылкIгIазла, ари апш джыпха йтагылу айчважвараква ларгванпI: ауагIа араъа йызлачважваз бзита йрыларкIитI, йшпакIву ухIварыквын ауат аъачIвагIагIв рейша тшизынадырхарныс рылшитI.
Аклуб алачIвара шабгу АААК YouTube канал апны швапшы йауаштI>>
«ХIара гвыргIвата йгIаншауа, ан-абачва рыуа ари азгIва рыцIа йгIаздысылуа хIрылачважватI. Датшагьи хIызлачважваз ауи азгIва айъазари уымчмазагIвхарныс ахъазла йнахвчIву амалькви ракIвпI», - лхIватI Кортуа.
АгвкIахIара асиндром – уыжв хIзаман йауацIыху азгIваква йрыуапI. Йара атермин аъачIвагIагIвчва асквш 1974 агIан йщаквдыргылтI, агIарысабапра ззынархаз айъазагIвчва, апсихологква, арыпхьагIвчва, аволонтёрква ракIвын, датшата йухIвушызтын зынхара ауагIа райгвыгIвра йапщылаз. СквшквакI анцIы апсихологква ан-абачва, йалкIгIата анчва, ргвкIахIара шгIаншауа йалачважвауа йалагатI. Ауат ансимшы дакъикъапхьадза рсабиква йрыцпI, уыс щарда дырхъйитI, йапымшвтуата джьауапкIра ду шынкъвыргауагьи рылархIвитI.
Асиндром агIаншаща хъвы-хъвы йшата акIвпI апсихологква йшгIалыркIгIауа, хъвипхьадза йара алкIгIараква амапI. АгIвычIвгIвыс ари азгIва шгIайыдсылыз гвы айтызтын ауи йагIарбагапI майрата йтара дъатыцIуа – акъарусызра, агвалымсра, агIапсара дъазайгIамиуа, агвыжвкIра агьиква. Араса йангIаншара ауи апсихолог йа апсихотерапевт тшырзынайырхара атахъыпI.
ЙшIу ан Пачулиа Оксана йанакIвызлакIгьи Ан-абачва рклуб анхара далапI. Ауи па хвыцкI длымапI, уыжвласыла йгIвыджьхауа длауаштI.
«Адырраква йалыргата йангIауыларцIауа йагвныргIвыта йуылаукIитI. Ари азынгьи ауаса акIвапI йшаъаз. Элана йгIалхIватI азгIва мачI-мачIымцара йшуылашуа, ауи шгIауыдсылыз узырдыруа аъащаква, уабакIра шатахъу. ГвынгIвырахатI ауи азгIва уайгIайырныс шуылшуш. Анйара зымгIва хIыхъазлагьи сабап алан, йшпакIву ухIварыквын ауи дзачIвызлакIгьи хIыхъазла йшварагIварапI», - лхIватI Оксана.
Ажурналист Шамба Алиса амаль лымата Ан-абачва рклуб анйараква гьагIвылщтуам. Ауи йшылпхьадзауала, аклуб анйараква рбзирала ан-абачва рдуней бзита йалыргата йщаквгылитI.
«ЙахьчIва анйара абзирала йыздыруазшва йспхьадзуз гIаншара щарда шIыц-шIыц срызхъвыцхтI, йсыласхIватI. ГвынгIвырапI зымгIвалагьи йхIазыру ан-абачва шаъам, йанатахъхара цхърагIара уахIвара шатахъу, йуылаухIвара атахъыпI агвкIахIра згIвата йшщаквгылу, ауи ушзайгIайуаш, йгIауыдымсылырныс ахъазла амаль шуызнахвуаш. Арат ауысквагьи датшагьи щарда хIрылачважварныс хIылшатI йахьчIва», - лхIватI Шамба лгвгIанаграква хIыцагIвылшауата.
Ари азын аклуб алачIвара ан-абачва йырхъазымкIва ахIвссаквагьи алан, йагIахарквын ауатгьи анхуштI. ЛгвгIанаграква хIыцагIвылшатI Жиба Щазина.
«Саргьи спхIвыспI, апхъахьыла аныта ссабиква сыгIзуштI, ауи ахIатырла швабыж йсымаджьащахъвата Ан-абачва рклуб анйара салан. Апсихолог йылхIвазгьи араъа йаъаз анчва рхабарквагьи санрыздзыргIвы йгIасгвынгIвытI асаби дгIадзынзыргылуа ан лчва йтшауа шмачIым. Араъа йызгIаз апхъахьыла йшгIасыхъвахуаш кьангьаш гьалам. Ан-абачва рджьауапкIра дупI, асабиква ргIадзныргылра йахъазымкIва даргьи рхъагвы аквыта йбзазара атахъыпI, рхъауысгьи ргвы ззыщтIу ауысквагьи рзынардзауата», - араса йылпхьадзитI апхIвыспа.
Адуней апсуа-абаза конгресс йаланакIуа а-Дискуссия клуб йазалху проектта йгIаннаршатI Ан-абачва рклуб. Ауи анхара ноябрь а 30 атшын йджвыквылтI. Аклуб йалалырныс рылшитI анчва, абачва зымгIвагьи. АдгалагIвчва йшырпхьадзауала, ауи ауысла йхъаду «азыгIальаматри, атахъыри» ракIвпI.
швталра йа тшаншвцIара атахъыпI.