Адуней апсуа-абаза конгресс ауысхагIвчва нхара уысла Трыквшта йъадзаныз Анкара апны анйараква акIвдыршатI
Барганджиа Саид
Адуней апсуа-абаза конгресс аунашвачпагIвчва КIавкIаз акультура квтаква рфедерация агIащтийыгIвчва йрынйатI. Октябрь а 23 атшын ауат Трыквшта апны Йазалху хъвдаквцIара нкъвызгауа Россия ащтийыгIв Ерхов Алексей Анкара апны йынйатI. КIавкIаз акультура квтаква рфедерация ахъада Яшаро Асланкайа йанишIашва, АААК ЙхIаракIу асовет аунашвачпагIв Эгьзакь Мусса йшихIвазла, ауат гIаджвыквцIара щарда руысла йшагвынгIвуа гIабергьыльхатI.
«Ужвы йхъахIцIитI хIуагIахъаква рбзира знархару уыс щарда хIырхъйарныс ахъазла хIацчIвырхъарныс шхIылшуш», – йхIватI ауи.
Анйара йалан Апсыуа культура квтаква рфедерация агIащтийыгIвчва гвыпгьи адкIылара рунашвачпагIв Аквсба Атанур драпхъагылагIвта.
«ХIара тгIачва дукIта хIщаквгылапI. ЙгIахIырбатI хIшагIвшам. Йхъаду хIадызкIылуашта йацхIырхъйара атахъу йацыхIчIву ауысква ракIвпI. Йара джыпхакI хIтагылата хIымгIвайсуаштI», – йгIаликIгIатI Эгьзакь Мусса.
Ауи йгIацицIахтI АААК, Апсыуа квтаква рфедерация, КIавкIаз квтаква рфедерация рацынхара апны хачIв щарда рпахь йшщтIу. «ГвынгIвырапI ужвы йхIчпауа йгIанарбауа гIвагвана ду хIшыквылгIвацауа шакIву. ЧхIарагьи къраргьи хIызбжьата джьгарта хIынхара атахъхуштI, йхIчпауа шабгу хIуагIахъаква руачIвбзазара, йгIадзынгылуа хIабанпараква йшырзалху гIахIгвынгIвуата», – йхIватI йцIыхъвахауата АААК ЙхIаракIу асовет аунашвачпагIв.
ЙатахIхIвахпI ТрыквчIвыла апны КIавкIаз культура квтаква рфедерация йгIацIанакIуа аквтаква 53 йшнадзауа, ауат КIавкIаз ауагIахъаква йрыуу уагIа зыкь 50 райхIарагIв шгIарыцIанакIуа.
Анкара апны АААК ауысхагIвчва Трыкв Республика апны Йазалху хъвдаквцIара нкъвызгауа Россия Федерация ащтийыгIв Ерхов Алексей йынйатI. Анйара апхъала АААК ащтийыгIвчва ахIврапшдзаква щтIарцIатI ауи йапхъала йынхуз, асквш 2016 агIан террор гIаншарала заджьаль йанйаз Карлов Андрей йчвахъабага син апны.
А-Конгресс архъйагIв секретарь Гицба Инар йшгIаликIгIазла, Ерхов Алексей йанишIашва асхъан ауат Трыквшта апны АААК апрограммакви ахачIвкви рырхъйара знархару уыс щарда йабаркIыта йрылапштI.
«Абаза уагIа ргIахчари ртшауацIнарыхри знархарата магIны зму акультура проектква Трыкв Республика апны абзазара йалажьра ауысла а-Конгресс ркъару аларцIауата хIшацынхуш амальква хIрылачважватI», – йхIватI Инар.
Адуней апсуа-абаза конгресс ауыснкъвгагIвчва октябрь а 21 нхара уысла Трыкв Республика йцатI, ауат ауаъа октябрь а 25 атшындза йаъазлуштI. Ауат амшква руацIа ауаъа а-Конгресси Трыквшта ажвлара йгьи адиаспора адкIыларакви рацынхарала йалыргу ахачIвква лырхырныс рмурадпI.
Йара ауи апшта йалыргата йлырхра рмурадпI Трыквшта апны а-Конгресс ауысхартаква рыргIапсщи Трыквшта апны АААК анхарала ахачIвкви.
швталра йа тшаншвцIара атахъыпI.