Асквш 2020 агIаталымта Адуней апсуа-абаза конгресс ЙхIаракIу асовет аунашвачпагIв Эгьзакь Мусса а-Конгресс асквш 2019 агIан йшынхаз даквчважватI.
ЙтыцIуа асквш 2019 йцIыхъвахауа амшква рагIан АААК ЙхIаракIу асовет аунашвачпагIв а-Конгресс ахабарргарта анхагIвчви йари райчважвара апны адкIылара асквш ауацIа йшынхаз хвы аквицIатI.
– Мусса ХIабальа йпа, щарда мцIуата АААК апресс-конференция апны угIачважвауата уара а-Конгресс агвып рынхара «бзита» йупхьадзатI. Ауи «бзидздзапI» – азухIвара ахъазла йазымхъайа?
– А-Конгресс ахачIвква архъйауа йалагагIвацатI, ауи йгIалцIла агIарбараква бзидздзата ухIварныс пасаркIвапI. Са йшспхьадзауала, а-Конгресс агвып бзидздзата йынхата анхIзыхIвуш апсуа йгьи абаза тгIачвипхьадза шбзазауа аныгIдырра, хIалата ауат рбзазаща шагъьхуш хIазынхауа хIанцара агIан акIвпI.
– ЙгIаталуа асквш 2020 агIан кIара швпсахырныс гьшвгвыгъамма – ажвапIта, а-Конгресс алаща йа анхара адгылща йырзынархата?
– А-Конгресс анхагIвчва – йашIамсуа тшызпсахуа, ауагIахъа ртшауацIыхрала ахачIвква йшырзынхуш йазычпазара атахъу гвыппI. Йаъу агIалцIыртаква рыцIа къвльейта йгIахIрысабапуамцара анхара агIарбараква шагъьхIчIвуаш йанакIвызлакIгьи хIащтапI. Анхара адгылща акIвызтын – ауи гьхIпсахуашым, араъа хIара щатата йхIзалитI «Алашара» адкIылара ажвлара рбзазара ахъатаква зымгIва гIазцIазкIуа анхарала Къарча-Черкес апны быжьсквша руацIа йархIаз ашвапха.
– А-Конгресс ахабарргарта портал анхара ушпапшуа? Ауи хачIвыта йаздыргылыз шпархъйауа?
– Ахабарргарта портал а-Конгресс агвыпгьи йгIадрысабапуа амальквагьи йуызрылымхуаш хъвыкIта йалитIта, «бзипI» – анхIхIвауа ауи анхарагьи йазыхIхIвитI. УыжвгIанчIви аъащаквала йгIауахвырквын а-Конгресс амурадкви ахачIвкви ауагIа йрылагара, апсуа-абаза уагIахъа йгIарыцIанакIуата адуней шабгу апны йбзазауа зымгIва «хIызларабадыруаш цхIа» хъцIара ауысква рпны ахабарргарта портал анхара зымгIва рапхъа йгIагылитI. Апортал алшараква цIгIва гьрымам, хIаргьи ауат рыцIа-рыцIа гъагъата йгIахIрысабапуамцара хIуагIахъа йырзынарху, ауыс йахъвуш ахабарква щардата йапшым абызшваквала интернет йштазлуш хIазынхуштI.
– Асквш 2019 агIан АААК ашта йгьи ашIыпIа хъвшара шIыцква гIахъыртIытI. Ауат рыуа азджьакI асквш ахъа йгIаншан уысквакIла тшгIадырбарнысгьи йахадзатI. Ауат рынхара хвыта йаквуцIарызйа?
– Апхьадзараквала йгIауахвырквын Апсны Республика апны а-Конгресс ашIыпIа советква хачIвыта йлыхIхыз аъара йгьхIзынамырдзатI, ауаса сара кьангьаш гьазгIазгуам асквш 2020 ауацIала ауи шахьхIрыдзахуаш. УахьчIвала йгIалукIгIа йауаштI Гвдауыта къала-фыр апны йгIаныршу ашIыпIа хъвшара, ауаъа абзазагIвчва сабап злу апроектква йащтацауата йдырхъйитI. Ауи акъала йауата йхIыцызкIквауа а-Конгресс анхара злащаквгылу ацIасква, апроектква рырхъйаща ласыта йгIаргвынгIвытI. Даргьи йъабзазауа ашта бзи йъарбауа йгIалцIла ажвлара рыхъаз бзира рзыхитI.
– Апсуа йгьи абаза бызшваква тшауацIыхра драура ауысла йгIашвыдахIвйа?
– АъачIвагIагIвчва рцхърагIарала абаза бызшва арыпхьащала аметодика цхърагIагаква йзакIымкIва-йгIвбамкIва йгIацIхIщттI, авидео апхьара сахIатква адыгIгалтI, ауагIа бзи йырбауа амульфильмква атахIкIтI, ашва шIыцква алахIцIатI, абаза бызшвала фильм хъыхIхитI. Асквш ауацIа Апсны анаукаква р-Академии хIари хIацыта абызшва тшауацIнарыхра йазынарху апрограмма хIырхъйун, асквшква 2020-2026 рагIан хIыздынхалуаш ауысла абаза йгьи апсуа лингвистква йлырхын абызшва агIащаквыжьри тшауацIнарыхри йырзынарху апрограмма хIымапI. Апхъахьылагьи абызшва тшауацIнарыхра ауыс йалкIгIу гватра азынахIырхуштI.
– АгIвыма къральква рпны а-Конгресс анхара шпаубауа?
– ЙтыцIуа асквш 2019 агIан агIвыма къральква рпны апсуа-абаза диаспора рыцынхарала йлыхIхыз ауысква зымгIва абгата йхIырхъйатI. ХIащчви хIахщчви ъату акъральква рпны ашта хъвшараква ргIахътIра асквш 2020 агIангьи хIынхара анархара хъадаква йрыуазакIызлуштI.
– ЙтыцIуа асквш ауацIа АААК анхара уапшыхуата дахIвра хъадата йгIалукIгIарызйа?
– Асквш 2019 ауацIа ажвлара йрыхъвуш уыс щарда хIчпатI, ауат закI гIарылукIгIарныс баргвыпI. Ажва аламкIва ауат йрыуапI Апсны Республика апны йакIвшаз «Абаза» культура-спорт фестиваль, «Абаза уагIахъа ркультура амши» «Апсны Республика акъральыгIва баракъ амши», АААК а-Дискуссия клуб агIаныршара, Евросоюз акъральква рпны ашта хъвшараква ргIахътIра датшагьи щарда.
– Уара ухъатала АААК апны уынхарныс гвышхвара гIауылазцIауайа?
– Сара йсцрийу тгIачва дута йызбауа суагIа йрызсыму цIгIва змам абзибара. СаргвышхвитI гIвычIвгIвысипхьадза, сабипхьадза йахьыла джьауап скIуата схъа йазсыргылыз ахачIвы, сдыргвышхвитI уахьчIва абзазара йалажьра атахъу хIапхъанчIвиква ргвыгъараква, саргвышхвитI Анчвата йдуу йгIасызхъайцIаз закIгьи йапшым ахъвдаквцIара. Сара ажваламкIва уысла абаза этнос атшгIащтIыххра, хIгвбайари хIцIаскви рыбагъьара, абызшва тшауацIнарыхра, абзибари абзири рчIвы хъахьхара, Апсни России руачIвымш лашаразлара сазгылапI.
– ЙгIаталуа асквш агIан абаза уагIа уызларызхIвахIврызйа?
– Гвылагьи псылагьи йсцрийу абаза этнос йгIацIанакIуа зымгIва! Асквш шIыц тгIачва гвыргъьарапIта – швунагIваква рпны хъгалра рымазтI абзибара, азгIвадара, амамыр, апхара. ЙгIаталуа асквш 2020 агIангьи багъьата, хIнапIква абаркIыта хIынасып амгIва хIтагылата хайырла хIымгIвайстI.
швталра йа тшаншвцIара атахъыпI.