Адуней
апсуа-абаза
конгресс

Апроект хъадата йалазара атахъу Гал къала йапхъахауа аквтанай апхьарта 9-11 аклассква рапхьагIвчва йгIаргвындыргIвытI жвлара проектлыхрала аъачIвагIагIвчва Чкадуа Лани Цквитариа Мати.
Атшыбжьара йапхъахуз амш атеория дырраква йырзынархан, йгIвбахуз амш атренинг йалакваз пщгвыпкIта тшыршан гвыпипхьадза рхъвыцраква проектта йыргIвытI: абиблиотека ахъазла книга хвгIара, аспорт пещ йатахъу ъамапсымала йадгалра, акласс ахIбаква рапхьагIвчва рыхъазла психолог далата атренингква адгалра йгьи апхьарта апны апхьарасахIатква йрыланамкIуата апсуа бызшва йъадрыпхьуш кружок гIаныршара.
Акомиссия ащаквыргылрала, ахча ззалырхуаш апхьарта апны апсуа бызшва акружок гIаныршарала «Гал модерн» гвып йлырхыз апроект акIвпI. 

Жвлара проектлыхрала атшыбжьараква Адуней апсуа-абаза конгресси чкIвыныргIи спорти руысквала АкъральыгIва комитети йацыта йакIвдыршитI.

ГвчIагIвчпара нархара змаз аджинс гIарбарта-аукцион акIвшатI СогIвым апны. Ари ауыс Colors of nation компания Адуней апсуа-абаза конгресс алата асквш 2021 агIан йджвыквнацIаз апроект алахъыргIвахтI.

Акцията йакIвшаз зымгIва ззынархаз шварагIварата йалуа аэкология проблема акIвын. Апроект анджвыквырцIа АААК агвыпи Гагра апсуа апхьарта апхьагIвчви апхьарта апшцIа апны цIла 20 ларцIатI. УацIыхъван Colors of nation компания алата Гагра адзытшпурам апны ауаъа йбзазауа рыхъаз апсабарахчара йазынархаз лекция акIвдыршатI. Ауи адгалагIвчва акъала кофыжвырта «Бриош» апны абатарейкажвква ъазыркIкIуаш тапсарта шдыргылыз гIархIватI.  Алекция аналга балет йгIахIвуа Апса Диана джинсла йыргIвычаз асцена апны дгIахIвытI. Араъа йхIвара атахъыпI алекция анакIвдыршушыз апхъала джинс асхъа йгIалху, йатахъыхым ахIапчыпква азыркIкIуата хабар шдыргаз.

Апроект ашIыпIа абзазагIвчва апсабара апIайри арыхъвашари йшырчвырхчуш, ахIапчыпква тамамта йшгIадрысабапуаш йазынархан. 

Абар ужвы, заманкI анагIвс, йазыркIкIыз ахIапчыпквала апсуа дизайнерква джинс гIарбарта адыргалтI. Адефиле чгIвычагIарбара зъачIвагIу йырхъазымкIва датша хIвсысагьи алан, ауат йрылан зызгIвадара аъаща йгIалцIла зылшараква ахъарысугьи. ЙгIадырбаз ачгIвычаква аукцион йгIатарцIан агIарбара апшыгIвчва ауи йгIаларыжьтI. Аларпшра угвы йгIатахауата йырчпатI амотоцикл йаквчIвата ауатыкв йгIаталыз акIвыршагIви йгIахIвуаз абалерина шIакви. Алалра ашвахIвагIв  Эшба Кристина йылхIваз ауарадла йалдыргатI. АгIарбара йгIатнырхыз ахча шабгаз «Ашана» культура-гвчIагIвчпара фонд йаларцIатI.

АшIыпIа хъвшараква рыцынхарала АААК ахъвшара апроект апкъ йтата Апсны апхьагIвчва ахIбачва айсра уысла апычIв дырраква ъарыртуа йпщбахауа амастер-класс акIвшатI.
«Апсны ахысырта тир» йгIадрайгватI Дурыпщ аквтанай апхьарта апхьагIвчва.

Ахысырта клуб аинструктор Квициниа Феликс ачкIвынчва абджьар шукIуаш, тамата ушгылуаш, ушкIылпшуаш, ушхысуаш гIаргвынйыргIвытI. УацIыхъван ахысырта апны дасузлакIгьи дыррата йауыз уысла йгIайырбарныс лшара йаутI.

Асквш 2024 ацIыхъвадза ужвыгьи гIвтшыбжьаракI акIвдыршарныс ргвыгъапI.

Октябрь а 14 РАН йаланакIуа Антропологии этнографии рмузей (Кунсткамера) апны МАЭ РАН КIавкIаз аэтнографияла ахъвшара йаднагалыз асеминар «КIавкIаз: акультураква рымгIвалысырта» акIвшатI.

Асеминар апны доклад йчпатI Адуней апсуа-абаза конгресс (АААК) апны хабарргарала аполитики абадырракви унашва рхъызцIауа Тарба Тенгьыз. Асеминар анхара далан АААК агвып йрылу Цыжвба Абзагвгьи.

Адоклад ззынархаз Апсны ащхъаква рпны агIвычIвгIвыс йапхъанчIви гылартаква рпны йаъаз аэкспедициякви ашта апны акьристанра атурыхи ракIвын.
Айззара Адуней апсуа-абаза конгресси РАН йаланакIуа Антропологии этнографии рмузейи (Кунсткамера) рацынхара апкъ йтата йакIвшатI. Ауи ацынхара АААК ЙхIаракIу асовет аунашвачпагIв Эгьзакь Мусса ХIабальа йпи Кунсткамера адиректор Головнев Андрей Владимир йпи рбзирала йашIамсуата тшауацIнахитI.

Тарба Тенгьыз «Ащхъа шта Апсны» фонди Апсны Республика культурали атурых-гвбайара тынха хчарали а-Министерстви йацыта йадыргалуа аэкспедицияква дгIарыквчважватI. Ауат архъвыхраква рагIан атурых-гвбайара тынха йаланакIуа шIыпIа 350 раъара гIараутI, ауат йрыуапI Хьымса бхъвы ащапIы апны йгIарауыз швкIы райхIа йнадзауа ахIахъв йгIалху ауыхваракви Дзыхва бхъвы агьабаква рпны бзита йгIащаквхаз ацхIаквкIи.

Тарба Тенгьыз Италия, Германия, Россия, Сан-Марино, Приднестровье рпны Апсны гIазырбауа асурат гIарбартаква адызгалыз дыршIыйагIвпI. Тарба «Моя планета» телеканал «Амдараква йгIарыквчважвауа асурат йгьи авидеорепортаж» номинация апны асогIа гIван йгIатигатI. 

Асеминар апны «Апсны апны акьристанра атурых», «Ащхъа шта Апсны. АгIвычIвгIвыс йапхъанчIви гыларта» фильмквагьи гIадырбатI. Айззара йалакваз Апсны апны акьристанра магIныта йаму йаквчважватI – Апсны ауи адин рахIа пасата тшъауацIнахыз акъральква йрыуазакIыпI. Христос дангIадри амщтахь йапхъахуз асквшышв агIан Христос йайрыпхьаз ашихква Первозванный Андрей, Кананит Симон йгьи апостол Матфий Апсны йгIайын Евангелие ауагIа йрыларгун. Йапхъахуз акьльиса жвлара IV асквшышв агIан Питиунт апны йгIаншатI.

Асеминар ъадылгалыз ахъаз хIразыра ажваква лзынахIырхитI РАН йаланакIуа Антропологии этнографии рмузей (Кунсткамера) КIавкIаз аэтнографияла ахъвшара аунашвахъцIагIв, аистория наукаква рдоктор Албогачиева Макка.

АшIыпIа хъвшараква рыцынхарала Адуней апсуа-абаза конгресс ахъвшара апхьара сквшшIыц апны  «Аимадара» проект джвыквнацIахтI. Апроект йгIвбахауа ашIчIвара апны йапхъахауата амдара йцатI Тванаархув аквтанай апхьарта апхьагIвчва. https://abaza.org/abq/1194

Уарча кыт йауу апхьагIвчва 100-гIвы райхIа диспансеризация апроектла рзгIвадара дырхъвыхтI. https://abaza.org/abq/1187

АААК Aqua quiz йгьи чкIвыныргIи спорти руысквала СогIвым къала аунашвахъцIарта ацта акъыльрыпшгIага-ларпшыга хъвмарра «Абаза» акIвнаршатI. Ауи 14 гвыпкI алан. Квиз апны йыншуз, анкъвакъвраква рпны уыла рахIа йхъызхуаз агIаншараква жвбуштI хIвидео апны.

Ажвлара йгьи аполитика уыснкъвгагIв, аюрист наукаква рдоктор, апрофессор Шамба Тарас Мирон йпа йхъмаштылгата йадыргалуа II Адуней наука-практика конференция акIвшатI Апсны акъральыгIва университет апны. https://abaza.org/1186

Чвыджьба Абзагв Адуней апсуа-абаза конгресс ахьызла Россия Федерация апны Апсны Республика АхIвачIвыгIвчва Руысхарта йаднагалыз агвыргъьахъв анйара далан. Анйара Россия агIвымакъраль уысквала а-Министерства адипломатква рыдынхалрала АунашвахъцIарта Хъада акультура квта апны йакIвшатI, уагIа щардагIвгьи азнаддатI.
Анйара гIахъитIытI РФ апны йазалху хъвдаквцIара зму Апсны Республика ахIвачIвгIвы Квициниа Алхас. ЙгIачважвара апны ауи айгIайри ахъахвитри гIатгара гIапсара ду шапщылаз дацIачIвагъватI, ауи ауыс апны апсуа уагIа рацзакIыри рбагъьари магIныта йрымаз гIаликIгIатI.
Ажва йымата дгIачважватI Россия а-МИД Йпщбахауа адепартамент адиректор Гончар Денис. Ауи апсуаква йырцIасу асасбзибара даквгIашIастI, Апсны Республика йапымшвтуа апхъаланаскIьара магIын ду шаму дацIачIвагъвауата Россия агIвымакъраль уысквала а-Министерства аунашвачпагIвчва рхIвахIвараква йайззаз йгIарылайхIватI.
Алалра йалан Апсны йагIвзу акъральква рхIвачIвыгIвчви рдипломаткви, Россия Федерация акъральыгIва уысхартаква ргIащтийыгIвчва, ажвлара уысхагIвчва, акультура анхагIвчва йгьи Москва йту апсуа диаспора руысхагIвчва.