Лента событий ВААК
Адуней апсуа-абаза конгресс ЩынкIвба Б.В. йыхьыз зхъу ЧIлоу аквтанай апхьарта апхьагIвчва0 рзгIвадара архъвыхтI.
Акыт дара йдупI, ауи йгIалцIла ари апхьарта апны йынхаз айъазагIвчва ргвып рыцIа йщардагIвын. Ауат йрылан згIвадарахчарала а-Министерства йгIанащтийыз знархараквала йапшым аъачIвагIагIвчва – апедиатрква Азнаурян Амалии Голандзиа Алиси, аэндокринологква АмкIваб Ренати Адлейба Анжели, акардиологква Ардзынба Илони Агрба Шаризани, аофтальмологква Кове Анни Сангулиа Фатими, аневролог Конджариа Саида, ареабилитолог Агрба Арзадин, аневролог, УЗИла азгIва щаквзыргылуа Ходжава Альбина, арентгенолог Берзениа Аслан йгьи амедицина ахщчва Барцыц Мадина, Баркалайа Илона, Цаава Асмат. Адиспансеризация йалан СогIвым амедколледж астудентквагьи. Апхьарта гвал зму, ахъвда ащаныкъвартаква раъаща зладырхъвыхуа УЗИ ргIапсгагьи, КАМАЗ йаквгылу йатдрыпауа флюорографгьи гIаргтI. Аща архъвыхраква зымгIва «MedLife» лаборатория апны йырчпатI.
ЧIлоу апхьарта апны апхьагIвчвати арыпхьагIвчвати 120-гIвы райхIа рзгIвадара дырхъвыхтI. Ауат йанырпшуаз зынла рзгIвадара гIащаквдыргылхра ахъазла йырчпара атахъу рархIвуан, чIыдала йдырхъвыхуан, айъазаща рзыщаквдыргылуан. ЗакI зхьуата йгIардырыз апхьагIвчва ужвыгьи рхъвыхраквакI йгIаркIылсырныс йырщтитI. ЙшалакIу йгIауахвырквын апхьагIвчва рзгIвадара аъаща ауашта йырпхьадзатI. ЙащтагIайуа, йцIыхъвахауа адиспансеризация КвтIол кыт апны йакIвшуштI.
