Трыкв Республика агвчIагIвчпара йгьи ажвлара адкIылараква АААК швапха гIархъырхын Апсны йауу атгIачваква йырцхърагIатI. Ауат ракция йахьызпI «Агвы хIазынадзапI».
Барганджиа Саид
Трыкв Республика агвчIагIвчпара йгьи ажвлара адкIылараква «Апсуара» йгьи «Абазамара», Кайсери къала апны йаныргIалу КIавкIаз культура квта йгьи агвчIагIвчпара адкIылара «Киараз» «Агвы хIазынадзапI» ахьызта акция акIвдыршатI. Ауат мурадта йрыман Апсны апны зхъахIара мачIу атгIачваква йырцхърагIарныс.
Ауи аунашва АААК ахабарргарта портал йгIарайхIвтI «Апсуара» гвып адгалагIв Сельчук Сымсым.
Ауи йшгIаликIгIазла, акция ъадзакIвшуз цхърагIарата йгIазырггатI «хIатланкъвгагакI азна йнадзауата» асабикви адукви рыхъазла чгIвыча, ахъвмаргаква, датшагьи йыззыбжу апкъыгIваква.
«ХIара цхърагIара йазыбжу атгIачвакви асабикви рпхьадзара аныгIдыр, ауат рсуратква аныгIба йджьахIщауата хIхъагвы абгъатI. Ауат асуратква уагIа щардагIв ргвы дрыпшкатI. Ари ауыс гвалымста хIазыгIанхарныс гьхIтахъымызтI. ТшадхIкIылын йщаквхIыргылтI акция джвыквхIцIарныс», – йхIватI адгалагIв.
МызкIы аурала ажвлара йгьи агвчIагIвчпара уысхартаква, акыт рбзазагIвчва, Трыкв апсыуа-абаза диаспора йалакву рапхъанчIви псадгьыл апны йбзазауа рабашталагIвчва рыхъазла цхърагIара адыргалуан.
«ЙгIалкIгIара атахъыпI щардагIвы Лагъь КIавкIаз ауагIахъаква йрыуамызтынгьи акция йшацыркIыз. АчгIвычаквагьи анахьанат апкъыгIваквагьи Апсны агвчIагIвчпара адкIылара «Киараз» йырзыгIгахьатI», – йхIватI Сымсым.
Трыкв Республика апсыуа-абаза диаспора йалакву акция «Агвы хIазынадзапI» апхъалагьи ари йапшу датша цхърагIара адыргалхьатI. СынчIва январь мыз агIан йджвыквылтI «Агвы апхара» зхьзу акция. Ауи адыргалтI АААК, «Алашара» адкIылара йгьи Трыквшта апсыуа культура квтаква рфедерация. РыцIа паса, асквш 2018 сентябрь мыз агIан, Трыквшта йтабзазауа хIабашталагIвчва йазыркIкIын Апсны йауу атгIачваква йрырттI чгIвыча комплектта 1200.
швталра йа тшаншвцIара атахъыпI.