Апсуа бызшва агIахчара зпщылу абаргвыраква, АААК амурадкви ахачIвкви, а-Конгресс анхара аъазара шатахъу ауысквала йгвгIанаграква гIайхIватI Апсны агIвымакъраль уысквала йаминистрыз, АААК ЙхIаракIу асовет йалу, афилология наукаква рдоктор, апрофессор Чирикба Вячеслав.
АААК ЙхIаракIу асовет йалу, Апсны агIвымакъраль уысквала йаминистрыз, йбергьльу афилолог Чирикба Вячеслав АААК ахабарргарта портал ахъазла дгIачважвауата ауагIахъа бызшваква рхчара зпщылу абаргвыракви ауи ахачIвы шуырхъйуш амалькви руысла йгвгIанаграква гIайхIватI, ауылагьи адуней апны апсуа-абаза уагIахъа адкIылралагьи а-Конгресс йахъвдакву даквчважватI.
Ауи дйачважватI Барганджиа Саид.
- Вячеслав Андрей йпа, уара угIачважваракI апны а-Конгресс апсуа-абаза уагIахъа «хIыззцауа аглобализация йаламдзуата рыбызшвагьи ргвбайарагьи шгIархчуш» йазынхауата ухIватI. АуагIахъа гIащаквыжьра апны АААК уыста йархъйауа рыцIа йауацIыхта угIаквымчважвума.
- Адуней апсуа-абаза конгресс адуней йыкву, зцри тшгIва Апсны йаъу апсуакви абазакви адызкIылуа организацияпI. КIавкIаз ахва хъада апсуакви зайхIара Къарча-Черкес апны йбзазауа абазакви агIвнашитI. Амшын хIари Трыквшта йту апсуа-абаза диаспори йгIахIбжьалитI. ХIайщчва аъапI Сирия, Иордания, Египет, Америка, Австралия, Европа акъральква рпны. ХIуагIахъапхьадзара йгIаквухырквын щардадза йнадзауа ауи адиаспора закIыта йапщылазларныс йазыбжапI.
ХIара мурад хъадата йхIымугьи ауагIахъа рацзакIыра гIащаквыжьра акIвпI. Апсуа-абаза уагIахъа этноскIпI, хIыбызшвагьи закIыпI. ХIара, хIабанпараква зымгIва, хIапщыламкIва амаль гьамам, уагIахъа хвыцгьи дугьи «хIабасабата йызлагауа» аглобализация хIаназцауа агIамта хIуагIахъара гIащаквыгIжьра, хIапхъанчIвиква йынкъвыргуз агвбайара гIахIхчата хIгIариква йырзгIаныгIжьра хIборчпI. Са сшапшуала, ари акIвпI хIынхара йамурад хъаду.
- Ауи уазынадзара шпатахъу? Апсуа-абаза диаспора йгIарыцIанакIуа зымгIва адкIылра апны а-Конгресс йазачпушйа, йачпарагьи атахъыйа?
- Ужвы абадырга амаль шIыцква, Интернет аъапI. Ажва гьалам, йара аглобализациягьи аконтинентква зымгIва рпны йбзазауа ауагIа апызщылуа ргIапсра мчыпI. Са йшызбауала, ауатква зымгIва гIарысабапта хIабадырра тшауацIнахIрыхра, йхIрыбагъьара, анйартаква гIаныршата згIальаматраква аквшвауа – нхара уысла акIвызтынгьи – агвыпква тшырзазкIкIуата йчпара атахъыпI. Культура нархара зму йапшым айззараква рпны хIабабарыквын бзипI. Ауатква зымгIва аконтинентквала хIшхъылапсугьи йаныргIал йауаштI, ауаса, ажва гьалам, хIабабауата хIайчважваларквын рыцIа йагъьпI. Ауат йрапшу анйараква акIвшитI Апсны, КъЧР, Трыквшта рпны. СгвыгъитI Сирии Иордании рпны аъащаква анщаквгылра ауаъагьи хIзанйалушта.
ХIуагIахъа йырмурад хъаду хIуагIахъара гIащаквыжьра акIвпI. Араъа апны адемография хъатагьи магIын ду амапI. ХIара хIмачIыгIвпI, заъара хIмачIу аъара хIкъаругьи мачIхитI. ХIара рыцIа хIщардагIвхара атахъыпI, ауи агIан хIуагIахъа мчызлуштI.
ЙгIвбахауа ахъата – хIыбызшва, апсуа бызшва, абаза бызшва, йазакIу хIапсуа-абаза бызшва акIвпI. ХIара асквшышв квтаква рагIан хIакъвгахатI, ауаса хIабагвынгIвыркIвитI. [Абызшва агIахчара ауысла] аъаща гвыргIва гIауыланацIауата йаъапI. Ауи аъаща апсахрагьи Адуней апсуа-абаза конгресс амурадква йрыуазакIыпI.
- Атурых йшгIахIнарбауала, ауагIахъа рыбызшва йазныйуа рызныйитI: абызшва аныдзра ауагIахъагьи ауи йащтацитI. ХIара щардала йыгIгIалитI апсуа бызшва шыдзуа. Ауи ауаса йаъадзума?
- ХIара убых бызшва ашвапха хIыла йыцIапI. Аубыхква апсуаквагьи адыгьаквагьи йраргваныз, йхIчвыхъарамкIва Швача апны йбзазуз уагIахъан. Ауат ауаъа йгьаъахым, рыбызшвагьи гьаъахым, шIыпIаквакI апхъала йызларыпхьуз ахьызква гIанхатI акIвмызтын. Ауаса аубыхква ъамачIгIвым, 15-нызкьыгIв – зкьы 20-гIв йъанадзауа Трыквшта апынгьи убых бызшва заджвгьи йгьидырам. Ажва кIьыдаквакI ракIвпI йырдырхуа. Сара ауаъа кытта йаъу зымгIва, закIы-гIвба ракIвмызтын, сгIарыкIвшатI. Ажва гьалам, ауи уызрынашхыйауа швапхапI.
Ага йгвасразтынгьи, ужвы йшцауа акIвызтын [аубых] бызшва ащтала ауи йаргвану апсуа йгьи абаза бызшваквагьи царныс закIы гьазхIвам. ЙгIауахвырквын, къабардыйа бызшва ауыс зкву рыцIа йагъьпI, йауа ухIварыквын, ауыла рыцIа щардагIв чважвитI, ауаса Адыгея апны ацри бызшва аъаща рыцIа йбаргвыпI.
ХIара рхъвыхра акIвхIыршан, ауи йгIахIнарбаз уарынашхыйитI. Апсны апхьартаква зымгIва рпны – Гагра угIалагата Ткъварчали Очамчыри рпныдза – апычIв класква рапхьагIвчва, асабигIзартаква йцауа асабиква йрыуата зцри бызшва здыруа процент 30 йгьрайхIам. Ауи йгIаныцIуа ачIвыйа? Ауи йгIаныцIуа ауекIвпI: анчва-абачва абызшва бзидздзата йшырдыруагьи рдырраква ргIариква йгьрыртуам. АщардагIв абызшва асабиква йызддмырдыруа ауи гIарыхъвушта йгьырпхьадзумта акIвпI. Йшцауала, Апсны апны апсуаква ркъральыгIва бызшва «йгьазыбжам». Ауи йузыджьамщауа рыцхIагIарапI.
Сквшы 20 агIвсырквын ауат асабиква духуштIта апсуаква райхIарагIв апсышвала йымчважвахуата йцуштI. Акытква угIархъыкIвшауамцара апсуа бызшва бзита йыздыруа уырзыпшгIара атахъхуштI – уахьчIва ахабаргIвоуква хIшырзыпшгIауа апшта.
АИНТЕРВЬЮ АВИДЕОВЕРСИЯ АРАЪА ШВАПШЫ >>
- Йаргвану азаман ауацIа апсуа бызшва зынгьи йымгахуата йцарныс шварагIвара аъума?
- ЗакIгьи хIымчпузтын ауи хIазцуштI. ХIара 10-15 сквша хIымапI ари аъаща хIпсахра ахъазла. Ауыс ужвыгьи йуызгIацарпуштI. Адуней апны йаъапI абызшва ахчара йазынархаз апрограммаква дахIврала йдырхъйата ауыс щардала рыцIа йанагъьха ашвапхаква. Абызшва йъатадзыз аштаква йанрызцахуагьи ншитI. Ауаса йыншатI Баскония, Каталония, Уэльс рпны.
ГвасрапI, ауаса [Апсны апны] акъральыгIва уысхартаква, ажва ахъазла, арыпхьарала а-Министерства, йырчпауа ауысква рсабапра угвы азыбжахушта йаъапI. Сара апсуа апхьартаква рпны апсуа бызшва ззырдырта йызбаз ауагIа заджвмаджвпI. АйхIарагIв ауаъа йырдыруагьи рхъаштылхитI.
Ссабиква гIасахвпIта, ауат асабигIзарта йъадзамцасыз апсуа бызшва бзидздзата йырдыруан. АсабигIзарта апны ауат «гIвбызшвакIла йчважвауа» йцатI – урышвлагьи йчважвауа йалагатI, апсуа апхьарта йцауа йаналага бызшвакIла ахIа йгьымчважвахтI – апсуа бызшва ршIышвттI. Ауи апсуа бызшва арыпхьарала йщаквгылу аргIапсра закIы йшашIысым йагIарбагапI. ЗакIзаджвыкIгьи! Йджьащахъвадзахугьи зымгIва ауи йъадгылуа акIвпI – министерствадукI шхIымугьи.
Сара ауи уахьчIва йыншата гьсхIвум, ауи йцIыхъвахауа асквшы 20 руацIа йщаквгылыз аъащапI. Йырчпауа зымгIва сабапкI гьалам, амальта йгIадрысабапуа зымгIва бырзаманкI йгIадрысабапуаз ракIвпI, ауаса ауагIа ауыс шырпсахуаш гьырдырам, йырпсахырнысгьи гьыртахъым. Ауат урышвламкIва йымчважвауа асабиква йырпшитIта – йара ауаса йатахъызшва йырбитI. Са йшспхьадзауала, акъральыгIва бызшва амагIныла йкъральыгIва бызшвазара атахъыпI. ХIара йхIымапI асквш 2015 агIан йнарахвыз Апсуа бызшва ауысла а-Хабза, ауаса ауи заджвгьи йгьйырхъйум. Сара кьангьаш гьазгIазгуам апсуа бызшвала уахьчIва йхIыму арыпхьаща уайгвгъах йамуашта йшажвыз, уыжвгIанчIви заман закIылагьи йшаквыргIапсым.
- Ауыс упсах йшпауаш? ЙчпачIвыйа?
- Апсуа бызшва арыпхьаща аметодика псахта шIыц-шIыц йыргIапсхра атахъыпI. Ужвы ари асахIат ауи йзакIымкIва-йгIвбамкIва гвыпквакI адынхалитI. ХIара агIвыма къральква, ауат йгIашIыспхьадзаквазгьи рылата, ршвапха хIхIырдыритI. Са сшхъвыцуала апсуа бызшва асабигIзартаква, апычIв классква, аквтанай апхьарта рпны йшадрыпхьушла апрограммаква лыхIхырквын, ауат апхъапхъа зджьакI рпны йырхъвыхта уацIыхъван акъраль шабгула абзазара йалаужьырквын апсуа бызшва ауачIвамш шцуш бзигвыгъа азуымазла йауаштI. Йара ауи акIвпI, ажва аламкIва, абаза бызшвагьи ауыс зкву.
Ауыс зрыбаргвуа абызшва бзита йыздыруа асабиквагьи асабигIзарта йцауа йаналагара ауаъа зцри бызшва зымдыруа рыквлагIвчва йрыднагалитIта акIвпI. Ауи йгIалцIла ащардагIв йгIаргвынгIвуа урышв бызшвала йчважвауа йалагитI. ЗныкI ахъазла агвыпква ркIьыдара атахъхушзапI – абызшва здыруи йзымдыруи алыхта. Йзымдырквауа акъральыгIва бызшва ахъа угIалагата – агIвыма къральква йгIартыцIыз зджьакI рапшта – йазыбжьара атахъхуштI. Датша амаль гьаъам. Датшата йухIвушызтын, заманкI гIвметодикакIла уынхара атахъхуштI, уацIыхъван ауат абызшва арыпхьарала йазакIу программакIта йалалхуаштI. Йара йухIвушызтын, апсуа бызшва апсуа акъральыгIва – апарламент, апрезидент йунашвахъцIарта, акъральыгIва уысхартаква рынхагIвчва, ашвъаква – йрыбызшвазлара атахъыпI.
-А-Конгресс апсуа бызшва агIахчара йызлацхърагIушта йубауайа?
- Са йшызбауала, а-Конгресс акIвпI ауи рыцIа йзацхърагIуш, йауа ухIварыквын, ауи аконтинентква зымгIва рпны йбзазауа ауагIа аднакIылитI. АпхъаланаскIьара йапщылата швапхата йархIахьу, йзабадыруа, йызцынхауала йгIауахвырквын а-Конгресс уыс ду азахушта йаъапI. АжвапIта, программаквакI ахча рызгIаущтра. Ауи рчпауа йалагахьатI, сшгвыгъауалагьи – йгьашIасуашым.
Ари ахачIвы шуагIахъауысу, апсуакви абазакви зымгIва йшырхачIву тшазыгIдырырквын хIцри бызшва хIзыгIахчуштI. Ахъаз аныла-арыла хIпшцIасуа уыс кIьыдагIвацаквакI рахIа хIымчпузтын закIгьи гьхIылшушым. Ауыс йалакIыта, ргIапсракI йтагылата уадгылра атахъыпI, ауи ахча, аъачIвагIагIвчва ргвып дуква ркъару акврыдзра атахъхуштI. Ауатква зымгIва адыгIгалырквын – йара акIвпIта ауатква хIзадгалуаштI, йадхIымгалкIвагьи амаль гьамам – ауи агIан зымгIва гIахIыдахIвуаштI.
- АзджьакI йшырпхьадзауала, апсуа бызшва абаза бызшва йгIалахаз ажва щарда ачвыдзтI, йара ауи йапшта апсышва йаларкIву ажваквакI абазаква йгьырхIвахуам. Ауи акIвдзума йшаъу? Ауаса йаъазтын алфавит ацапшычIвра хIыбызшваква ргIахчара йахъвуш ауысква йрыуазакIхушзарын?
- Апсны апынгьи КъЧР апынгьи апсуакви абазакви латин гIвыща ангIадрысабапуаз – ауи совет заман агIан акIвын – хIара хIалфавит азакIын. ЖвасквшакI аъара ауаса йнайтI, уацIыхъван абаза гIвыра урышв графика йтадыргылтI, апсуа бызшва – квырджь графика, абарауегIан хIакъвнагатI. УацIыхъван, асквш 1954 агIан, Сталин данпсы амщтахь, хIаргьи аурышв хIарыфква хIрызгIайхтI.
Ауаса ауыс зрыбаргвуа ачIвыйа? Ага агIвалфавиткIгьи урышв хIарыфла йлыхызтынгьи, ауат рчпащаква гьапшым. Ауи йгIалцIла йазакIу алфавит лыхра йгьуыс майрам. ЗымгIва ащайдзадза йпсахра атахъыпI: йа агIвба рыуа закIы хIазцара, йа йхпахауа алфавит лыхIхра. Йара ауи рыцIа йагъьхарнысгьи ауаштI – йхпахауа алфавит гIаныршара – ауи щатата йамазлуш щаквыргылта.
Сара [ауи ауысла] щарда мцIуата сажва гIазгтI. Ужвы латин щатала йлыху, хIдиаспорагьи гIахIыдызкIылуашта йызбауа салфавит апроект гIаквсцIитI. Ауат (агIвыма къральква рпны йбзазауа адиаспораква – аредакция ррытаразга) латин алфавит йащцатI. Ауаса кириллица ащатала йлыху проектгьи атахъыпI – аъачIвагIагIвчва, ажвлара, арыпхьагIвчва, агIвгIвчва, апхьахьаква ауат йрылапшта закIы йазгIайра ахъазла. Йалныс ауыпI йацаъазлуш алфавитква [гIаныршара] атахъхарнысгьи. Сара ауи ауысла зны Ардзынба Владислав Григорий йпа сйачважвун, ауи йхIватI: йаъапIи Молдова, молдаван бызшва – агIвыра кириллицалагьи латиницалагьи йлыхта. Ауасагьи йчпа йауаштI.
АшIыпIахьызква, текстквакI агIвалфавиткIлагьи йыгIгIврыквын хIдиаспора йгIаланакIквауа – ауат рыцIа йщардагIвыпI, [йауа ухIварыквын] апсуаквагьи абазаквагьи Трыквшта апны рыцIа щарда йнадзитI Апсни Черкесшти рпны ацкIыс – араъа йангIайра рпны йаъазшва йырбуштI, анаъа-араъа йкIыду агIвыраква йырну гIаргвынгIвуаштI. Са сшхъвыцуала, ауи хIуагIахъа адызкIылуаш уыс бзипI. Эгьзакь Мусса ХIабальа йпагьи ауи йацикIитI. ХIапшыпI ажвлара, хIыгIвгIвчва, хIапхьахьаква ауи ауыс йшапшуаш. Датшата йсхIвапIта, зныкIдза алфавит хIымпсахуата, йхIыму шхIымумцара йазакIу алфавит апроект латиницалагьи кириллицалагьи йлыхIхта уысквакI рпны ауыгьи ацгIахIрысабапырныс акIвпI хIызквчважвауа.
- Уара агIвымакъраль уысквала уминистрын, анахьанат акъральква Апсны зхъа йахвиту къральыгIвата йшалархIвуш сквшщарда уазынхатI. Йшпаубауа, а-Конгресс анхара ауи ауыс кIарала йзацхърагIушма, агIвыма къральква рбзазагIвчва Апсны чва бзила йгIапшуата йшцуш йахъвушма?
- Апсны зхъа йахвиту къральыгIвата йъаларымхIвауа ашвхIаусыгIва хъадаква йрыуазакIыпI агIвыма къральква рпны ауи кIара ъалрымдыргIауа. Адуней апны заджвгьи йгьидырам Апсны ъану, рыцIа тамамта йсхIвапIта – йыздыруа мачIыгIвдзапI. Ажва гьалам, ужвы апхъала ацкIыс рыцIа щардагIвы йырдыритI. Ужвы Интернет аъапI, ауагIа рыцIа щарда ддырдыритI, Апсны атуристква рыцIа щардагIвыта йгIайитI. Ауаса йаъазтIхIва, ауат хIа йынкъвхIцауа гьырдырам.
Википедия утапшрыквын – аквырджьква хIуыс йшапшуа удыруаштI. Зынла йсхIвапIта, апсуа бызшвала апсуа Википедия ъанымгьи щарда уазнархъвыцитI. Абызшва йшатахъу апшта йгьгIахIрысабапуам, Интернетгьи гIаланакIуата. Ангьльыз бызшвала йгIвыта Апсны йазынарху ахабарква райхIара ауагIа чвымыгъчвала йгIахIзырпшуаш ракIвпI, урышв бызшвала йгIву рыцIа йауаштI. Намыца, француз, итальян, голланд бызшваквала гвымхара щарда хIзыргIвитI. Араъа а-Конгрессгьи хIдиаспорагьи йырчпушта йаъу щардапI, ари аъаща псахта Апсны ахъазла йцIабыргу хабар бзи рыцIа щардата йшгуш апшта. Ауи хIымч аквхъушта йаъапI.
- Абари акIвпIи йазцгIара хъаду – ауи аъаща шпахIзыпсахуаш?
- Ауи акврыдзра щарда зтахъу йгьуысым. Са йшызбауала, а-Конгресс асайт ауи анархарала йынхауа йалагахьатI. Ауи йапшым абызшваквала «йчважвитI», ауи апхъала хIназрыскIьауа чIвырхъа дупI. ЙсхIвапIта, МИД апны санынхуз хIаргьи хIсайт цбызшвакIла йынхIырхун. Китай версиягьи хIчпарныс хIазхъвыцуан. Ауи акIвпIта, араъа йучпуш щардапI.
Ауи йахъазымкIва хIуагIа адуней шабгу апны хIазыгIальаматраква надрыскIьара атахъыпI. Трыквшта апны ауи йапшу анхара рыцIа уарыразуашта йакIвшитI. Трыквшта са асквш 1991 йгIашIарышвта сцалун. [Ауи агIан] ауи араса «йчвасысуадза» йаъаз марагIайырта къральын.
Ужвы ауи ласыта тшауацIызхуа къральыгIвапI, зымгIвалагьи уыжвгIанчIви заман йаквыргIапспI. Сара ауаъа санцалуз [асквш 1990-ква рагIан] хIдиаспора йрыуата ауниверситетква йрыцIалуаз чкIвыныргIа мачIгIвын. Ужвы щардагIвдзахатI. [ЙхIаракIу апхьартаква] йгIарылгахьазгьи щардагIвыпI, ауат аправительства, ар, апарламент, анаука йгьи арыпхьара нхартаква нхара йцитI – ауат хIара йхIыгIвычIвгIвыспI, хIуысква ззынкъвцуш ракIвпI – ухIва йауаштI. Трыквшта апны Апсны йшазаъу ауат щардала йырпщылапI. Зъараны ауаъа саъаз – зджьара йгIанымхауата йхIызбзипI – ауагIа рквта ныжьхта аправительства, йапшым апартияква рпынгьи.
Ажва гьалам, Грузиягьи Трыквшта апны мчыта йынхитI, йаргьи ауи алауымхIвушта йгьаъам. ХIдиаспора йгIарылалта рмурадква гIарыларгарнысгьи йащтапI. Ага ауаса йаъазтынгьи, ауаъа хIара рыцIа хIщардагIвыпI, хIара хIцIабырггьи аквырджьква рчIвы ацкIыс рыцIа йхъахьхитI. Са сшхъвыцуала, Апсны ахъазла ауи гIалцIырта дупI. ЙаъапI Иорданиягьи, ауаъагьи хIадкIылараква – агвхъауа, апсуа, абаза организацияква – бзита йынхитI. Ауат хIрабадырхьатI, хIрыцынхитI.
Ужвы абар, Анчва йхIвузтын, Сирия апынгьи амамыр щаквгылхпI – айсра ацIыхъва йшазцауа уаквзыргвыгъауа аъапI. Ауаъагьи хIдиаспора хIымапI – агвхъауаква, апсуаква, абазаква. Европа апны апсуаква, адыгьаква, абазаква щардагIвыпI. Германия апсыуата 15-нызкьыгIв – зкьы 20-гIв раъара тапI, райхIарагIв, гвынгIвырапI, Трыквшта, Сирия йыртыцIкваз ракIвпI. Абарауат ркъаруква адкIылра атахъыпI.
Ауи ужвы Эгьзакь Мусса ХIабальа йпа йхъпшылра йацIата йыншитI. ЧкIвыныргIа рквта анхара мчыта йакIвшитI. А-Конгресс апны йынхитI Таниа Кан, Гицба Инар, Алшундба Инвер, Реквава Темур – МИД апны сызцынхаз ачкIвынчва гIальаматква щардагIвыпI ауаъа. Ауат агIвыма къральква рпны йынхахьаз, абызшваква здыруа, апсышва бзита йыздыруа, адуней политика ззалцауа уызгIвымсхыз ъачIвагIагIвчвапI. Са сшапшуала, анхара мчыта йакIвшитI. Ауат сырпшрыквын сгвы гIатгвыргъьгIитI, ауат йырчпауа уыжвласыла бзира щарда гIанарыцIсуашта сгвыгъитI.
швталра йа тшаншвцIара атахъыпI.