АшIыцраква 08.07.2020 22:50 14891

Адуней апсуа-абаза конгресси Согъвым акъала айззара адепутат Харчилава Ираклийи йалата Апсны аквта къала апны асабиква гвыргъьахъв рзадыргалтI.

Барганджиа Саид

Адуней апсуа-абаза конгресси Согъвым акъала айззара адепутат Харчилава Ираклийи йалата июль а 8 атшын "Бзазартажв"-хIва йызпхьауа Согъвым атып апны асаби гвыргъьахъв акIвдыршатI. Ауи цIайта 100-гIвы райхIа азнакIкIытI.

АгвхахIвара ъакIвдыршушызи йанакIвшушызи ахъазгIваца йгьгIалрымхтI. "Абзазартажв" апны пщысквша цIуата сквшигIадза июнь агIан, Асабиква рхчара амш йадахIвуата саби гвыргъьахъв акIвшалун. Ауи адигаллун акъала айззара адепутат Харчилава Ираклий.

СынчIва коронавирус ъагIаджвыквлыз йгIалцIла агвыргъьахъв ахъыргатI, ауаса ауи йаквыргIапсу ужвыгьи мшыкI апхъала йщтIан – АтгIачви абзибари азцIабыргри рымш. ЙцIыхъвахауа асквшква къраль щарда рпны ауи июль а 8 йдыртлапIалитI.

Агвыргъьахъв АААК ахьыла йалаз Санкт-Петербург апны йгIаныршу АААК ашта хъвшара а-Совет аунашвачпагIв Реквава Темур йшихIвазла, сынчIва адепутат агвыргъьахъв адгалра апны а-Конгресс гIайцхърагIарныс дахIватI.

"Ираклий тшангIахIзынайырха хIара зынла ауи йгIаджвыквцIара йацхIкIтI, йаргьи йатахъызла хIацхърагIатI. Ауи акIвпIта, ари АААК йаднагалыз йхпахауа саби гвыргъьахъвпI. ХIара арат йрапшу ауысква йалкIгIата магIны рзыгIбитI, йауа ухIварыквын, хIара йыгIбитI ахвыцква рыхъаз ауатква шнасыпра дуу, ауат гвыргъьарата йтарцIауа, ргвы йшалахIауа", – йхIватI Реквава.

Харчилава Ираклийгьи Адуней апсуа-абаза конгресс дшазыразу гьцIайымкIытI.

"Анчва дырзыразхатI а-Конгресс ЙхIаракIу асовет аунашвачпагIв Эгьзакь Мусса дзахIбу агвып зымгIва сахIвара гвалымста тшъазырымчпаз ахъазла", – йхIватI ауи.

Ргвы йгIатыцIуа ажва пхаква адгалагIвчва йырзырхIвун агвхахIвара йалаз ан-абачвагьи.

Ауи апшта, ЩынкIвба Нанули арат йрапшу агвыргъьахъвква "ракIвыршара швабыж магIны амата" йылпхьадзитI, йалкIгIата – "адуней азгIва гвымха анрылу".

"Асабиква тхаджьитI, ауаса йанаъазара хIаргьи – ауат ран-рабачва – хIыхъазла ауи насыпрапI. Анчва дшвзыразхатI хIъажвбаз, хIара ауи хIгвапапI", – лхIватI ауи.

Ажва гьалам, зымгIва рацкIыс разыра гIазныпщуаз дара асабиква рлактаква ракIвын. Ари амш ауат рыуа дзачIвызлакIгьи йгви йпси йырзынадзатI. АцIайква гIахIвуан, ашва рхIвун, бзи йырбауа амультфильмква рфырква ртурасква йырталыз аниматорква йрыцхъвмаруан, кIартI рхъырхра ахъазла кьазу йгIалагылуан. Ауи апхъала йадыргалхьаз агвыргъьахъвква рагIан йшцIасхаз апшта ауи йалаз зымгIва согIа рызпшуан – асабиква йыргвапхауа ашвъабгъьыла хъвмарра.

Хмаир Кира быжьсквша дыртапI. Ауи араъа лани лаби лыцта дгIайтI. АпхIвыспачкIвын цIыпх йакIвшаз агвыргъьахъвгьи дшалаз лхIватI. Ужвы апшта, ауи агIангьи йылгвапхатI. СынчIва Кира швъабгъьыла ахъвмарра рыцIа йгIалылкIгIатI.

"Сара зымгIва сгвапхатI, швабыж йкьахвын. ЗымгIвагьи Анчва дырзыразхатI", – лхIватI ауи.

Ащи ахщи КвициниаргIа Леони Наали ахъвмарраква зымгIва йрылан, бзи йырбауа амультфильмква рфырква йрыдзхъагылата кIартI рхъырхтI. Наала ахъвмарраква рыцIа дхъырхуан, Леон дгIахIвырныс рыцIа бзи йбун. АчкIвынхвыц йбаз шабгу лахIварата йгIайыланацIаз айшыста хвы аквицIатI:

"Агвыргъьахъв мчын. Сахщи сари бзидздзата агIамта гIгатI", – йхIватI ауи.

Анйара йалаз ужвыгьи заджвы, Качабава Нестор, зынла асабиква дгьрыламылтI, ауаса анкъвакъвраквакI рымщтахь тшгьизымкIхтI. Йара штшихIвахызла, ауи апхъапхъа дпхащун, ауаса зымгIвадзугьи шкьахвуаз аниба дрылалра йтахъхатI.

"Сара зымгIва швабыж йсгвапхатI. Араъа йаъан ашваква, агIахIвраква, ахъвмарра кьахвква. Анчва дырзыразхатI ари амш ахъазла ауи хIзадызгалыз зымгIва", – йхIватI ауи.

СынчIва рыцIа пасата Адуней апсуа-абаза конгресс асабиква рыхъазла агвыргъьахъвква Атара йгьи ПакIващ кытква рпны йаднагалтI, ауаъа Очамчыра арйона йаланакIуа йаргвану акытква зымгIва рсабиквагьи гIайтI. Агвыргъьахъвква сабита 500-гIв райхIа рылан.