Адуней
апсуа-абаза
конгресс

 Гвымба Р. йыхьыз зхъу Апсны акъральыгIва филармония апны «Агвала йазцауа ачIвырхъа» фестиваль агала-концерт акIвшатI. Йапшым агIахIвыщаква, агIахIвчва разъазара, афаша пшдзакви уагIала йырчвыз апещи – аконцерт йалазгьи йапшуазгьи рыхъаз гвыргъьахъв пшдзата йалтI. Апсуа, аурышв уагIахъа гIахIвраква, ауыжвгIанчIви гIахIвыщаква – запшномерызлакIгьи напIасра дула йнардасуан. Афестиваль асогIа хъади ахча согIи Москва йауу агIахIвчва рансамбль «Ритмы детства» («Асабихъа амакъымква») йгьи Гвдауыта йауу агвып «Аураща» йагIвыршатI. ЙайгIайыз агвыпква, ауат йрылу дзачIвызлакIгьи, абжьагIвчва хIрайхIвахIвитI, апхъахьылагьи ршIыйарала адахIвраква рзыхIтахъпI! Аконцерт йзымцаз йдучвам асуратгIвыра йапшырныс йхIрайгвитI.

Акомпания аблог апны аонлайн-атакIга апсуа, авар, чачан, асатин бызшваква рылата шIыцта бызшва 110 шгIалахаз ахабар аргатI. АцхърагIага лызхыз йшырхIвауала, зынла ари апшта бызшва щарда зынгьи йгьгIаламхIасызтI – уызланха йауаш абызшваква рпхьадзара гIванла йалахIата ухIва ауаштI.
Ажва кIьыдаквагьи ажванахъаквагьи урышв бызшва йгIахъухта апсуа бызшвала йатаукIырныс, йа апсуа бызшва йгIахъухта урышв бызшвала йатаукIырныс ужвы йара айчважвага йтауцIауа ацхърагIага апынгьи асайт адескопт версия апынгьи йуылшуштI.
Google Translate абызшва шIыцква «анардырныс» йацхърагIатI PaLM 2 «йнапIылачпару акъыль» ргIапсга. Ауи амальла акомпания апны абызшваква рпхьадзара зкьыдза йнадырдзарныс ргвыгъапI.

Апсны апны асабикви чкIвыныргIи гIахIврала рыршIыйара II адуней фестиваль «Агвала йазцауа ачIвырхъа» акIвшитI. Ауи Россия йапшым ашIыпIаква йгIартыцIыз артист шIата гIвышвыгIв раъара алапI. ЖвамшкI йакIвшауа афестиваль апрограмма тшыбжьара, ларпшра, культура нархара зму ауысква аланакIитI. Апсни России йауу агIахIвчва гвыпква йцIыхъвахауа ргала-концерт Гвымба Р. йыхьыз зхъу Апсны акъральыгIва филармония апны июнь а 29 агIан йакIвшуштI. Афестиваль шакIвшауа, артист шIаква тшыззырбжьаз, агала-концерт апны апшыгIвчва йырбуш – аратква зымгIва хIрепортаж йгIашвнахIвуаштI.
ХIара асабиква рыршIыйара йазырхIара, чкIвыныргIа рквта йызгIваду бзазащи ъадаб-намыси тшауацIдрыхра йазынарху агIаджвыквцIараква хIгвы йалахIауа йрыцхIкIитI.

Йыншаз ачвгьахара йгIалцIла Дагъстан апны июнь а 24, а 25, а 26 джьабара мшызлуштI. Ареспубликагьи акъральгьи хIаргьи хIрыцджьабитI.

Июнь а 23 ахъвлапын Махачкъали Дербенти рпны учвапсаква зрыкIьазызуа чвгьахара ншатI: агвымхахъшаква ауагIа, акьльисаква йыргвыквстI. Полиция анхагIвчви амамыр бзазагIвчви хъщгIахатI. Йаладзыз ауагIа ртгIачваква, ареспублика абзазагIвчва зымгIва ргвакъвпра рыцагIвхIшитI. Зарар зквшваз зымгIва ласыта рзгIвадара гIащаквдыргылхныс рзыхIтахъпI.

Ари атеррорист акт уагIахъа щарда ъабзазауа ареспублика апны ажвлара рацзакIыра цIахътшра мурадта йызму йырчвгьахарапI. ЙанакIвызлакIгьи апшта, ачвгьахагIвчва йкърарсызру амальква гIадрысабапитI: абджьар змам, льажьа змам ауагIа йыргвыквситI. Аурышв йгьи аджьут кьльисаква ргвыквсра ажвлара апшIагылра гIахъшахъырщтра ртахъыта йадыргалтI. Россия зыбызшваквала, здинквала йапшым ауагIахъаква ъабзазауа къральпI, араъа дзачIвызлакIгьи Нчвата квырмыш ззичпалакIгьи пIатIу йыквырцIитI. АцIарсыгьыгIвчва рмурад гьгIардахIвуашым, ари ачвгьахара адызгалызгьи йзырхъйазгьи рквнага йанйуштI.

Атерроризм квпшырата йамазлакIгьи – агIвычIвгIвара ргвбайара ащатаква тшпынхIвата йырзалуа уыспI. Ауи кьангьаш аламкIва чвгьахарапI. ХIара йхIхIальу анагра, агвчIагIвра, хвы азазыбара йрапшу хIбайараква рыщата гьцIсуашым. Йаргьи ауат абайараква ракIвпI йанакIвызлакIгьи ачвгьара йайгIайуа.

Швгвакъвпра швыцагIвызшауа, йшвыцызкIуа Абаза-апсуа конгресс ЙхIаракIу асовет аунашвачпагIв Эгьзакь М.ХI.

Нева урам йыквгылу «Ажурналист йтдзы» апны апсуа-абаза диаспора рлитература хъвлапны акIвшатI. Ауи йалази сасыта йгIадгылызи ажва, азъазара, агвбайара рдуней йалалтI.
Ахъвлапын апны рахIа йгIалукIгIуш уыста йалтI зталант йгIайззаз йрыцагIвызшаз, Россия йту, йбергьльу апсуа гIвгIвы йгьи ауысагIв Делба Владимир Михаил йпа йгIвыра «Акьльиси астадиони апарки рбжьара» апрезентация. АгIвгIвы Аурышв ПЕН-квта, Россия алитераторква радкIылара, Апсны асуратгIвгIвчва радкIылара, ЮНЕСКО йаланакIуа асуратгIвгIвчва р-Дуней Федерация дрылапI.
Ауи йакIвымкIвагьи ауатыкв йгIаталтI Анчва йхъвыкI злу ауысагIвчва, агIвгIвчва, ашвахIвагIвчва шIаква. Асасчва аргвыргъьатI йдучвамыз авикторинагьи – ауи ауат апсуа-абаза уагIахъа рлитератури ркультури шырдыруа днаррхъвыхтI.
Алалра напIасра дула йалагатI. Абарауаса йгIайззаз зымгIва ари анйара адызгалыз йшырзыразу гIадырбатI. Ахъвлапын йалаз зымгIва рыхъазла алахIвара пшдзаквали гвышхварали йырчвын.

Апхьахьа хьзы гIалыртырныс ащта йтагылу КIарма Марйана Адыгея къральыгIва университет апны «Абаза бызшва абызшващарадара аъаща апны: асоциолингвистика йгьи алингвокультура хъатаква» темала диссертация лхчатI.https://abaza.org/abq/1170

 Гвдауыта къала акультура Тдзы апны акомпозитор Ванача Гиви йхъмаштылра ахъвлапын акIвшатI. Ауи адыргалтI ажурналист, АААК йаланакIуа Апсны апхIвысква р-Координация совет аунашвахъцIагIв Бебиа Екатерини Гвдауыта апны йаъу Апсны ауагIа р-Абашта айсра акъральыгIва музей адиректор Джьыкьырба Гвагвыци. Ахъмаштылра ахъвлапын йгIадгылтI амакъымгIаныршагIв йцриква, йыгIвзачва, йыцынхакваз, арайон абзазагIвчви аунашвачпагIвчви.
Алалара йалан Къарча-Черкес йгIатыцIта йгIайыз асасчвагьи: абаза кытква рпхІвыс советква р-Координация совет аунашвахъцІагІв ХвытІ Ирина, Абаза муниципал район апхІвыс совет аунашвахъцІагІв Ачбокъва Зурида, АлбыргІан кыт апхІвысква рсовет аунашвахъцІагІв Абаза Аминат, «Алашара» адкIылара анхагIвчва – «АтгIачви асабикви» хъвшара аъачIвагIагIв ЛагIвычв Инни «АзгIвадари адемографии» хъвшара аунашвахъцIагIв ХвытI Артури.
Ахъвлапын апны амакъымршIыйагIв пхата дгIаргвалашвахуан, ауи йбзазара йгьи йыршIыйара амгIва йаквчважвун.
Ванача Гиви сквшщарда дзунашвачпагIвыз «Рица» вокал-ъамапсыма гвып ррепертуар йалу уарадквакI гIархIватI – зымгIвадзугьи бзи йырбауа «Рица» ашвагьи рылата.
АмакъымршIыйагIв йпхIачкIвын Аниса дйыцта «Аминат» ашва рхIвауата Бебиа Екатерина йанылцIаз, лархив апны йгIанхаз авидео йгIайззакваз адырпшытI.

Ванача Гиви дуысагIвын, дмакъымгIаныршагIвын. Ауи уарад 30 райхIа алайцIатI, ауат йрыуата ауагIа рахIа йрылалтI «Рица», «Ахвра ашва», апсуа айсчва йырзынарху ашваква рабаркIыра, датшагьи.

«Алашара» Дуней адкІылара ауысхагІвчва ажурналист Бебиа Екатерина йлыцта СогІвым къала апны йгІаныршу «Апсны анчва амамыри ажвлара захвари рыхъазла рымгІвайсра» адкІылара ахъвшара ауысхарта йаъан.

Асасчва йгІарпылтІ Апсны ауагІа р-Абашта айсра йаладзыз айсчва ранчва Хашба-Кучубериа Ламара, Кецба-Асландзиа Джульетта йгьи зхъатала йайсыз Гвымба-Агвмаа Аза. Анйара пхата йакІвшатІ. Ауи йалата айсра йгІаквчважвуз агІагвалашвахраква йрыздзыргІвуаз заджвгьи рыладзква гьырзымкІуазтІ. Зхъа щтІазцІаз айсчва ранчва ауат йрыцхІагІаз архъвыхраква рыгІамта йырхътысыз гІархІвахуан. ЙрыквчважватІ зпачва аналадз зхъатала айсра йпшцІалта айгІайра зхъвы алазцІаз апхІвысквагьи.

Ажвлара мгІвайсра йалакву йгІалыркІгІатІ згвы азшІытрала айсра йгІалалыз ачкІвынчва рфыррагьи. Ражваква йрызгІайыз асасчва йырзынадырхауата ауат апсуаква рхъахвитра азабакІра апны айщчвата йгІарыцІагылыз ауагІахъаква зымгІва йшырзыразу рхІватІ.

Ари ауыс Адуней апсуа-абаза конгресс апны йгІаныршу Апсны апхІвысква рсовети «Алашара» Дуней адкІылари абаза кытква рпхІвыс советкви йацдырхъйауа апроект апкъ йтата йадыргалтІ.

Анхараква зырхъвыхуаз акомиссия йалан апсуа апхьахьа, ажурналист, агІвгІвы Бебиа Екатерина, арыпхьарали жвлара джьгаррали згІвадарахчарали АААК ахъвшара аунашвахъцІагІв Хагба Изольда, абаза кытква рпхІвыс советква р-Координация совет аунашвахъцІагІв ХвытІ Ирина, Абаза муниципал район апхІвыс совет аунашвахъцІагІв Ачбокъва Зурида, «Алашара» адкІылара культурала ахъвшара аунашвахъцІагІв Джьмакъвыл Нателла, АлбыргІан кыт апхІвысква рсовет аунашвахъцІагІв Абаза Аминат.

Ртдзыхьыз атурых ддырдырта рткъвым йауата зыхьыз бзирала йзыргаз агІвычІвгІвысква рхабарква видеота йгІадырбарныс хачІвыта йрыздыргылтІ АГУ астуденткви ауаъа йыцІалуаш ачкІвынчви ахІвссакви. ЗымгІва шалу анкъвакъвра быжьгІвы журналист шІачва гІалалтІ: Коф-оглы Лана, Амычба Мадина, Бебиа Райана, Гвымба Алена, Читанава Сабина, Харазиа Саида, Ашуба Дауыт. ДзачІвызлакІгьи рткъвымква ртурых цІолата йалалын рынхараква рпны йгІадырбатІ.

Апрезентация аналга акомиссия йалакваз рлахІвараква рзымкІуа анхараква зымгІва ажва бзиква рзырхІватІ, йызрыхІазырквазгьи анхара къару ду ъаларцІаз ахъаз йшырзыразу рархІвтІ. Анкъвакъвра йалаз зымгІвагьи рыхьызква зну ачІахІра грамотакви а-Конгресс агвып йрыздрыхІазырыз асогІакви – АААК адамыгъа зну афутболкаква, адзыжвгаква, абрелокква – рырттІ.