Лента событий ВААК
АААК Джьырхва кыт апны йапхъахауа медицина цхърагIарала тшыбжьара акIвнаршатI.
Адуней апсуа-абаза конгресс айъазагIв дъадзаным агIвычIвгIвыс йапхъахауа цхърагIара шйурадзушла йызкьазууыз атшыбжьара акIвнаршатI. Ари азын ауи Джьырхва кыт аквтанай апсуа апхьарта апны йадыргалтI.
ЙгIадрайгваз МЧС аъачIвагIагIв Амычба Индира апхьагIвчва агIвычIвгIвыс дмахта дкIахIазтын йа йхъа амара ташызтын, йыбыгIв шIчIвазтын, удын йыквшвазтын, йща гIаджвыквлызтын йучпуш, эпилепсия зхьуа дгIаквшвазтын ушицхърагIуш ралхIвтI.
Ауи акIвымкIвагьи а-Конгресс агвып апхьарта согIата агIвычIвгIвыс уихьпшра ахъазла йатахъу зымгIва зту азкIкIра арттI, йапшым агвжвайыгIва гIаншараква рагIан йучпуш ашвъабгъьы йанытагьи йаздрыхIазыртI.
АААК апроект асквш 2022 адзын агIан йджвыкврыжьтI. АгIвычIвгIвыс йапхъахауа цхърагIара шйурадзушла атшыбжьараква Апсны акытква рапхьартаква рпны АААК ЙхIаракIу асовет аунашвачпагIв Эгьзакь Мусса ахчала дацхърагIауамца йадыргалитI.
