Лента событий ВААК
АААК «Аимадара» проект апкъ йтата Аацы йауу апхьагIвчва апшдзараква ддырбатI.
АшIыпIа хъвшараква рыцынхарала Адуней апсуа-абаза конгресс ахъвшара «Аимадара» проект апкъ йтата Аацы йаау апхьагIвчва 40-гIв амдара рзаднагалтI. Асабиква йапхъахауата Уатап кыт йаъу АбраскIьыл йхIатшпи Моква акьльиси ддырбатI.
Амдара культура нархара змаз ахъвы аналга хъвмарра нархара нанауахвтI. АгIамдараква рымщтахь ацIайква спортла йанкъвакъвтI, ауагIахъа хъвмарщаквалагьи йхъвмартI.
«Аимадара» проект АААК асквш 2019 агIан йджвыквнацIатI. Ауи акытква рпны йбзазауа чкIвыныргIа Апсны ашIыпIа джьащахъваква дырбара нархарата йамапI. ЙащтагIайуа амдара июнь а 3 йаквдырпшитI. Ауи Арасадзыхь йгьи КвтIол кытква рсабиква йырзадыргалуаштI.
АААК Джьырхви Бгарджвани кытква рпны апхьагIвчви арыпхьагIвчви рдиспансеризация акIвнаршатI.
Адуней апсуа-абаза конгресс Гвдауыта район йаланакIуа Джьырхва кыт аквтанай апхьарта апны диспансеризация акIвнаршатI. Ауи йгIаланадыркIтI Бгарджван аквтанай апхьарта апхьагIвчвагьи. ЗымгIва шалаз 70-гIвы райхIа йырпшытI. Ари АААК йаднагалта йъацаз йбыжьбахауа кытпI.
ЙанакIвызлакIгьи апшта анхара гIвхъвыкIта йшан. Апхъапхъа апхьагIвчва ща рылырхын йдырхъвыхтI. УацIыхъван ауат агIарбараква рымата ацIайква йапшым айъазагIвчва йгIаркIылстI.
Ауат йырпшытI акардиолог Качарава Ирма, аотоларинголог Халбад Рица, аневролог Конджариа Саида, аофтальмолог Сангулиа Фатима, апедиатрква Уатырба Ангелини Рогова Натальи, аэндокринолог Джьыкьырба ХIамида йгьи Апсны ареабилитологква радкIылара йалу Агрба Арзадин. Асабиква ЭКГ рхъырхтI. Йанырпшы амщтахь аъачIвагIагIвчва чIыдата йырхъвыхра атахъыта йырбаз зымгIва ауи йызлагIакIылсуаш швъа рырттI.
Адиспансеризация акIвыршара йалан СогIвым амедицина колледж апхьагIвчва Хашба Сария, Джанелидзе Алиса, Атулян Диана, Тулумджян Рузанна, Яйлян Анастасия йгьи Пархоменко Дарья. Ауат айъазагIвчва архъвыхра агIарбараква ашвъаква йырнырцIарныс йырцхърагIун.