Лента событий ВААК
Апсны йауу апхьагIвчва «Артек» йаъан.
Дызда «Артек» дцарныс згвы йтамыз? Абар, сквшышвкI йнайгвгъауата апхьагIвчва мильуанпхьадзара ари асабиква рдуней квта гвалата йрымапI, йауа ухIварыквын, ауи запш аъам, адуней шабгу аныла-арыла йауу ацIайква ъабадыруа, йъарызхIауа тшпсщартапI. Апсны йаъу Россотрудничество ауысхарта хIреспублика ацIайквагьи «Артек» йабаркIу акоманда йрыуахарныс лшара рнатитI. Адипломат ацынхара апкъ йтата, Адуней апсуа-абаза конгресс ЙхIаракIу асовет аунашвачпагIв йаппарат унашва ахъызцIауа Таниа Кан далата сынчIва АААК йапхъахауата Апсны йауу асабиква радгалра, рщтийра, рнадасра йадынхалуан.
Июль а 16 йгIашIарышвта август а 4-дза ареспублика йапшым арайонкви акъалакви йрыуу, 14-17 сквша йырту чкIвынчвати хIвсысати гIважви жвагIв райхIа «Артек» йаъан. Ауат йрыуата ажвыхвыгIв а-Конгресс рхъпшылуан. Апсны йауу ацIайква алагерь йагIбахуз акьазу йалашватI, ауи апрограмма азгIвадара рыбагъьара, аспорт тшадкIылра, арыпхьара нархара змаз ауысквала йалан.
Кърым апны мыш гIважви закI анырга амщтахь агвып рпны йгIайхтI. Август а 9 «Артек» йаъакваз СогIвым йаъу Москва Атдзы айззарта пещ апны йрынйатI. Анйара йалакваз рлахIвараква абархIвуан, шIыцрата йырдырыз рхIвун, ацара адызгалыз йрачважвун, апхъахьыла амурадква лырхуан.
«Съацаз закIыта сайгвыргъьитIта! Сара йапшым акъральква йрыуата гIвзачва щардагIв саутI. Ауаъа хIъадырцакваз, амдарата, датша уыста йхIзадыргалыз лахIварата йгIасыларцIаз шIала йгьсзыхIвушым. Кьангьаш гьазгIазгуам шIыцрата йыздырыз, тшыззызбжьаз зымгIва апхъахьыла йшгIасыхъвахуаш», – лхIватI апроект йалаз Адлейба Мария.
«Артек» адуней ашIыпIа щарда йгIартыцIыз чкIвыныргIа гIайтI, швабыж йхIымагIальаматын ауахьауат ауагIахъаква рцIасква гIдырырныс. ХIаргьи апсуа гIахIвыщаква, ахъвмарщаква дхIырбатI, ауагIахъа культураква рфестиваль апны хIтурых, хIгвбайара, хIкъраль апшдзара хIгIарыквчважватI», – ллахIвараква хIыцагIвылшатI Хагба Вероника.
Асквш 2025 агIан «Артек» сквшы 100 ахъыцIуаштI, ауи агIан ауаъа йгIвмильуаныгIвкIхауата тшпызщуш йпылырныс ргвыгъатI. Йалырныс ауыпI ауи швыуа заджв йакIвхарныс!
АААК «Аимадара» проект акIвнаршауаркIвитI.
Асабиква ртшпсщара заман дырра шIыц рауата йшыргуш йазынарху Адуней апсуа-абаза конгресс апроект «Аимадара» апкъ йтата Тхьына кыт апхьагIвчва гIамдара мшы рзадыргалтI. АпхьагIвчва 80-гIв Гагра къала апны ауагIахъа дельфинарий, Мгвыдзырхва кыт йаъу «Апсны парк» этнопарк, Аацы кыт апны «Прайд» асльан парк йцатI.
АцIайква райхIарагIв ауатква йапхъахауата йырбатI. Экскурсия джьащахъвала йырчвыз амш ауи йалаз зымгIва лахIвара щарда гIарыланацIатI. АцIайква, дара йшырхIвауала, «щардала ргвы йгIатахуш» рлахIвараква аджв аджв йайхIвхуан.
«ХIара дельфинарийгьи, этнопаркгьи, асльан паркгьи йапхъахауата хIаъан. Ауаъа йыгIбаз зымгIва анцIрала хIгвква йгIартахушшва йыгIбитI», – йхIватI амдара йалаз заджвы.
Ари «Аимадара» проект йаланакIуа сынчIва йпщбахауа гIамдарапI. ЙащтагIайуа аэкскурсия мшы ари амыз тымцIскIва Арасадзыхьи Баслахви кытква рапхьагIвчва рыхъазла йадыргалуаштI.
