Лента событий ВААК
РОССИЯ ФЕДЕРАЦИЯ АПСНЫ РЕСПУБЛИКА АХЪАХВИТРА ЙАЦНАКIИЩТАРА 15 СКВША ЪАЦIУА АХЪАЗЛА АААК ЙХIАРАКIУ АСОВЕТ АУНАШВАЧПАГIВ ЭГЬЗАКЬ МУССА ЙХIВАХIВРА ТШАЗЫНАРХАРА
15 сквша цIуата Апсны адуней апны йалархIвауа йцатI
Асквш 2008 август а 26 атшын Россия р-Президент Медведев Дмитрий Апсни ГIвадахь Осетии рхъахвитра ацкIра ауысла аунашва мачвы ацIайцIатI. Ауаъа йнанаркIыта ареспубликаква руагIахъаква рылкIгIаракви ргвбайари рхчауа адуней азазаъащаква рыргIапсра апны зхъа йахвиту къральыгIвата рхвитнагIаква йырзабакIныс лшара раутI.
Агвла ду йацкIра апсуа уагIа йырцIабыргта ртахъыраква йшрыщту адуней зымгIва йднарбатI, антахьгьыт акъральквагьи швапхата йырзалтI. Россия амщтахь ареспубликаква рхъахвитра йацыркIтI Никарагуа, Венесуэла, Сирия, Науру, датшагьи ООН йалу акъральква.
Арат ажвыхвсквшагьи России Апсни радгылра агIвкъралькIгьи рбзира алата йгIамгIвайситI, акультура амдара йацхърагIитI. Ауи ацынхара абзирала адуней шабгу йхъылапсу апсуа-абаза уагIахъа атшадкIылра амгIва йыквгылтI.
Датша зджьакIгьи йрапшым ауагIахъа рцIаскви рыбызшви гIащаквыжьра ахъазла апхъахьыла уыс щарда хIпыраркIвапI, ауаса зъара гIахIдахIвхьайа йагIвсыз асквшква руацIа! ХIбайараква мачI-мачI йазхIкIкIыхуамца хIара хIтурых гIащаквхIыргылхитI, йагIвсыз хIхчауамца хIацыта хIуачIвымш хIазычIвырхъитI. Арат азазаъаща пшдзаква йанакIвызлакIгьи аджв аджв хIнапIква ауацIыхта хIшипылуаш апшта тшауацIырхуашта сгвыгъитI.
Ухъахвитра йанацыркI амшла, бзи йызбауа Апсны!
Уыдуней мамырызтI, щардала укъагIатI!
Агрба Харитон йащтагIайуа йайсра август а 26 йакIвшуштI
Ари асабша Москва йаргвану Серпухов къала апны бокс бзи йызбауа зымгIва рыхъаз гIаншара дудздза аъазлуштI – «IBA ачемпионква рыцIх».
Анкъвакъвра август а 27 йдыртлапIауа Бокс а-Дуней мшы йазынархапI.
Адуней йагъьу абоксерква дрылата дайсуаштI зыжвлала йапсыуу апрофессионал спортсмен, АААК йалу Агрба Харитон. ЙчкIвыныркIву айсыгIв айгIайра щарда гIайдахIвхьатI: Европа хъвмарраква рпны йгIвбахауа агыларта йкIытI, Россия ачемпионатква рпны гIван рызна согIа тигатI. BoxRec арейтингла ауи Россия йауу йласдзу абоксерква рквта йгIвбахауа агыларта йымапI.
Агрба ЮАР йауу, щарда йайсхьаз Ндонгени Ксолисани дйыцайсуаштI. ГIарбарата йакIвшуш айсра хвраундкI йнайуаштI.
ЗымгIвадзугьи хIычкIвын йыхъаз швгвква шврыцхIарныс, йларпшыгу анкъвакъврагьи швапшныс шваквгIазшIыхIтитI! Ауи Йапхъахауа аканал апны 23:20 йалагата йгIадырбуштI.
ХIабашталагIв пшдзата дайсыта айгIайра гIатигарныс йзыхIтахъпI!
