Лента событий ВААК
АААК Агвбедии РекIи кытква рапхьагIвчва рызгIвадара рхъвыхра аднагалтI
Адуней апсуа-абаза конгресс Агвбедиа кыт апны диспансеризация акIвнаршатI. Йара ауаъа рзгIвадара дырхъвыхтI РекIа кыт апхьагIвчвагьи. Зща агIарбараква хIазырта йызмаз апхьагIвчви арыпхьагIвчви знархарала йапшымыз аъачIвагIагIвчва ргвып йгIаркIылстI. Ауат йрылан аэндокринологква, акардиологква, педиатр, реабилитолог, невролог, офтальмолог йгьи лор-врач. Ахвыцквагьи адуквагьи йгIарпшытI, йдырхъвыхтI, йчпара атахъу рархIвтI, хьыгIа змата йгIараукваз йатахъу айъазара рзыщаквдыргылтI. Чыдата рхъвыхра йазыбжу ауи йызлагIакIылсуаш швъа рырттI. ЗымгIва шалу адиспансеризация апхьагIвчвата 129-гIвы гIаланакIтI.
Апсны акытква рапхьартаква рапхьагIвчва диспансеризация рзадгалра – Адуней апсуа-абаза конгресс йапроектпI, ауи ареспублика згIвадарахчарала а-Министерства алата йдырхъйитI.
КъЧР йгIатыцIыз аделегация АААК ауысхарта йнашылтI
Къарча-Черкес йгIатыцIыз аделегация зтшын йджвыквылхуашыз АААК ауысхарта йнашылтI. Асасчвагьи адгалагIвчвагьи аквыргъвгъварадъа, ргвква аущтта Апсны апны йырбаз лахIварата йгIарыланацIаз рхIватI, анхара, йырзацалу ахачIвква, йацдырхъйуш апроектква йрылачважватI.
Аделегация Апсны апны рымшква уысла йырчвын, ауат сабапгьи рхатI, ргвгьи йалахIатI, рахIа йхъадахугьи – чкIвыныргIа абадырдыртI, йагIвзачвата йырчпатI.
