Лента событий ВААК
«Гәыкала». Агрба Харитон.
Адуней апсуа-абаза конгресс агIвычIвгIвыс джьащахъваква ъагIадырчважвауа апроект «Гәыкала» архъйитI. Ауат ауагIи хIари йацыхIчпауа апроекткви айгвара багъьи хIадыркIылитI.
УахьчIва йадыгIгалыз ахъвы апны дсасыпI бокс Адуней федерация IBA аверсияла килограмм 67-дза зчакьуа абоксерква рквтала адуней ачемпион Агрба Харитон.
Апсны апны йгаз йсабихъа, йъачIвагIа шгIалихыз, спорти атгIачви шизадкIылуа, йабашталагIвчва шгIайцхърагIауа датшагьи щарда гIайхIвитI зынгьи йгIаламхас абоксер.
АААК Мыкв кыт апны диспансеризация акIвнаршатI
Адуней апсуа-абаза конгресс Мыкв кыт агIвапхьартакI рапхьагIвчва диспансеризация рзадргалтI. АцIайква йырпшытI апедиатрква Хибба Азамати Мелетян Кнарики, аневролог Конджьариа Саида, ареабилитолог Агрба Арзадин, аэндокринологква Гуниа Радмили Джьыкрба Хамиди, Зарандиа Юрий, аофтальмолог Сангулиа Фатима, аоториноларинголог Халбад Рица йгьи акардиологква Бондарева Ирини Лакрба Оксани ЭКГ ахъызхуа амедахща Нарманиа Эвелина дрыцта. АгIвапхьартакI йрыцIу саби 130-гIв раъара знархараквала йапшым аъачIвагIагIвчва гIаддырпшырныс лшара раутI.
ЙшцIасхаз апшта ари акция абзихагIвчвагьи алан. Ари азын айъазагIвчва йырцхърагIун Айба Оксана, Барганджиа Александра, Гергая Сария, Геркен Мария, Дудукчян Сабина, Дудукчян Самира, Клипина Ксения, ХIаджьымба Александр йгьи Хашиг Айнар.
Диспансеризацияла апроект Адуней апсуа-абаза конгресси Апсны згIвадарахчарала а-Министерстви йацыта йдырхъйитI. Ауи айъазарта квтаква ъану акъалаква йырчвыхъару акытква рапхьагIвчва йнардзу медицина цхърагIара шрадзуш йазынархапI.
АААК «Ирӡтәым» проект йауата айчважвара акIвнаршатI
Адуней апсуа-абаза конгресси Джугелиа Инни йацыта йдырхъйауа апроект «Ирӡтәым» нхитI. Ари азын ауи экскурсия ргIапсра йтагылата йакIвшатI. ЧIлоу аквтанай апхьарта апхьагIвчва СогIвым апны гIвмузейкI – Бейгуаа Омар йыхьыз зхъуи Апсны а-Банк амузейи – рпны йаъан.
Бейгуаа дштурыхдырыгIв-кIавкIаздырыгIвыз, дшбызшвадыргIвыз, дшпублицистыз, Трыквшта йту апсуаква рыцIа йгIарылхIвуз дшрыуазаджвыз йауацIыхта йгIайхIватI атдзы-музей адиректор Габелиа Дмитрий. Щарда ргIатI апхьагIвчва апсуа диаспора йрыуата зыхьыз дута йзыргаз антахьгьыт ауысхагIвчва – апхьахьаква, аполитика уыснкъвгагIвчва, асуратчпагIвчва, агIвгIвчва, аспортсменква – рыхъазгьи.
Ауи амщтахь акъала хъада асасчва хвыцква Апсны а-Банк амузей йцатI, ауаъа акъраль апны ахчата йныкъвуз руысла ахабар джьащахъваква йрыздзыргIвра йахъазымкIва йазалху аджыпхала ахча жвгъайква гIатдрышвтырнысгьи лшара раутI. Арат амдараква рымщтахь асабиква дырра шIыцли алахIвара пшдзаквали йырчвыта рпны йцахтI.
