Лента событий ВААК
«Гәыкала». Харитон Агрба.
Адунеизегьтәи аҧсуа-абаза конгресс иацнаҵоит апроект «Гәыкала» - аинтерес зҵоу ауаа рыҿцәажәарақәа рыла ишьақәгылоу аинтервиуқәа рсериа. Зыӡбахә ҳамоу - апроектқәа ҳацымҩаҧызго, ҩызара ҳзызуа ауаа роуп.
Иахьатәи аҭыжьымҭа асас - абокс азы Жәларбжьаратәи афедерациа IBA аверсиала, зыкапан 67 килограмм еиҳам аспортсменцәа рыбжьара адунеи ачемпион Харитон Агрба.
Аҧсны ихигаз ахәыҷра, азанааҭ шалихыз, аспорти аҭаацәареи шеилаигӡо, иџьынџьуаа ацхыраара шриҭо уҳәа егьырҭ атемақәа дрылацәажәоит уаҩ дыззымиааиц абоксиор.
АААК Мықә имҩаҧнагеит адиспансеризациа
Адунеизегьтәи аҧсуа-абаза конгресс имҩаҧнагеит адиспансеризациа Мықәтәи ашколқәа ҩба рҵаҩцәа рзы. Ашколхәыҷқәа ргәабзиара гәарҭон ахәыҷтәы ҳақьымцәа Азамаҭ Хьыббеи Кнарик Мелетлиани, аневролог Саид Конџьариа, ареабилитолог Арзадин Агрба, аендокринологцәа Радмила Гәыниаҧҳаи Ҳамида Џьыкрҧҳаи, Иури Зарандиа, аблаҳақьым Фатима Сангәлиаҧҳа, аоториноларинголог Риҵа Ҳалбадҧҳа, акардиологцәа Ирина Бондаревеи Оксана Лакрҧҳаи, урҭ ацхыраара рылҭон «ЭКГ» амедиаҳәшьа Евелина Нарманиаҧҳа. 130-ҩык инарзынаҧшуа аҩ-школк рҵаҩцәа ирылшеит акомплекстә ҟазшьа змаз амедицинатә гәаҭара ахысра.
Уаанӡа ишаҧыз еиҧш, уажәгьы апроект иалахәын аволонтерцәа. Уажәазы аҳақьымцәа ирыцхраауан Аиҧҳа Оксана, Барганџьиаҧҳа Александра, Гергаиа Сариа, Геркен Геркен, Дудукчиан Сабина, Дудукчиан Самира, Клипина Ксениа, Ҳаџьымба Александр, Ҳашыг Аинар.
Адиспансеризациа иазку апроект еицынарыгӡоит Адунеизегьтәи аҧсуа-абаза конгресси Аҧсны Аҳәынҭқарра Агәабзиарахьчара аминистрреи. Уи хықәкыс иамоуп ақалақьқәа рҿы иҟоу амедицинатә усбарҭақәа зцәыхароу ақыҭа школхәыҷқәа зхаҭабзиара ҳараку амедицинатә цхыраара рыҭара.
АААК имҩаҧнагеит апроект «Ирӡтәым»
Адунеизегьтәи аҧсуа-абаза конгресси Инна Џьугьелиаҧҳаи еицымҩаҧырго апроект «Ирӡтәым» аусура иацнаҵеит. Уажәазы уи мҩаҧысит аекскурсиа аформала. Ҷлоутәи абжьаратә школ аҵаҩцәа мҩахыҵит Омар Беигәаа ихьӡ зху амузеи Аҧсны Абанк амузеи рахь. Аҭоурыхҭҵааҩы-кавказҭҵааҩы, абызшәадырҩы, апублицист, апоет, Ҭырқәтәыла иҟоу аҧсуа диаспора инарылукааша ахаҭарнак иаҳасаб ала Омар Беигәаа ихаҭара дахцәажәеит аҩны-амузеи аиҳабы Дмитри Габелиа. Ашколхәыҷқәа ирзеиҭарҳәеит аҧсуа диаспора егьырҭ ахаҭарнакцәагьы рыӡбахә. Уахь иаҵанакуеит аҵарауаа, аполитикатә усзуҩцәа, асахьаҭыхыҩцәа, ашәҟәыҩҩцәа, аспортсменцәа.
Анаҩс асасцәа қәыҧшцәа Аҧсны Абанк амузеи иаҭааит. Уаҟа дара ирзеиҭарҳәеит еиуеиҧшым аҧарахкқәа рыӡбахә. Анаҩс, асасцәа ирыҭан алшара ауасҭага ҷыдаҿы рхала аҧараҿырпы аҧҟаразы. Адырра ҿыцқәеи ацәанырра лахҿыхқәеи рыла иҭәыз аекскурсиа ашьҭахь алахәцәа аҩныҟа ихынҳәит.
