Лента событий ВААК
АААК еиҿнакааит адиспансеризациа Агәыбедиеи Рекеи ашколқәа рыҟны.
Адунеизегьтәи аҧсуа-абаза конгресс Агәыбедиа ақыҭа еиҿнакааит адиспансеризациа. Иара убасгьы амедицинатә гәаҭара иахысит Рекатәи ашкол аҵаҩцәа. Ашколхәыҷқәеи аҵаҩцәеи иарҭаз анализқәа рылҵшәақәа анроу, урҭ ргәабзиара аҭагылазаашьа гәарҭеит еиуеиҧшым ахырхарҭақәа ирыҵаркуа аҳақьымцәа ргәыҧ. Уахь иаҵанакуеит аендокринологцәа, акардиологцәа, ахәыҷтәы ҳақьым, ареабилитолог, аневролог, аблаҳақьым, аоториноларинголог. Амедикцәа ирыцхраауан амедицинатә коллеџь астудентцәеи аволонтерцәеи. Ахәыҷқәеи адуцәеи амедицина-консультативтә цхыраара роуит, иаҭахыз агәаҭарақәа рзымҩаҧыргеит, иақәнагоу ахәшәтәра рзышьақәдырӷәӷәеит. Ауадаҩрақәа здырбалаз апациентцәа ихарҭәаау агәаҭарахь идәықәырҵеит. Зеиҧшла адиспансеризациа иахысит 129-ҩык аҵаҩцәа.
Аҧсны ақыҭа школқәа рҵаҩцәа рзы адиспансеризациа - Аҧсны Аҳәынҭқарра Агәабзиарахьчара аминистрра ацхыраарала Адунеизегьтәи аҧсуа-абаза конгресс имҩаҧнаго проектуп.
Ҟарачы-Черқьесиатәи аделегациа АААК аофис иаҭааит
Ҟарачы-Черқьесиатәи аделегациа аҩныҟа ианыхынҳәуаз аҽны АААК Аҟәатәи аофис иаҭааит. Иформалтәымз аҟазшьа змаз аиҧылара алахәцәеи аиҿкааҩцәеи рныҟәара иадҳәалоу ацәаныррақәа ирзааҭгылеит, иалацәажәеит аусуреи, рзеиҧш ҳасабтәқәеи, еицымҩаҧыргараны иҟоу апроектқәеи.
Аделегациа ахьынӡаҟаз хҭысла даара ибеиаз апрограмма рыман - ргәы иаахәози ихәарҭоуи еиларгӡеит, уи зегьы раҧхьа инаргыланы, аҿар реибардырреи реиҩызатәреи рылшеит.
