Лента событий ВААК
Эгьзакь Мусса Пискарев чвахъабага нышвынтара апны хIврапшдза щтIайцIатI
ЙкIвыршаз Ленинград ахчагIвчви абзазагIвчви рхъмаштылра чIахI аквырцIарныс йахьчIва акъала абзазагIвчва йгьи асасчва зкьыгIвпхьадзара Пискарев чвахъабага нышвынтара йгIайтI.
АхIврапшдза щтIацIара йалан АААК ЙхIаракIу асовет аунашвачпагIв Эгьзакь Мусса запхъа дгылаз Санкт-Петербург йту апсуакви абазакви ргвып.
Апсны йауата айсчва 600-гIв райхIа, Къарча-Черкес йауата 800-гIвы раъара айсытI Ленинград ахъазла. Ауат йырчвахъабагата Пискарев нышвынтара Ахъмаштылра аллея апны ахъмаштылга гъвква кIыдпI.
Къарча-Черкес Республика а-Хъада Темрезов Рашид йгьи КЧР АуагIа Райззара (а-Парламент) рыхьызла ацеремония йалакваз КЧР йауата йаладзыз рчвахъабага хIврапшдза алапа азыщтIарцIатI.
Йара ауи апшта Адуней апсуа-абаза конгресс ахьызла ахIврапшдзаква щтIарцIатI Ленинград зхчауата зхъа щтIазцIаз Апсны йауаз айсчва рыхъазлагьи.
ХъвлапныкI атеатр апны: АААК акытква рапхьагIвчва рыхъаз проект архъйитI
Адуней апсуа-абаза конгресси Чанба С. йыхьыз зхъу Апсуа къральыгIва драма театри «ХъвлапныкI атеатр апны» проектт ацдырхъйитI. Ари азын ауи йгIаланакIтI Бамбора кыт апхьагIвчва.
Актриса, Апсны апны гIатгара зму ажурналист Когониа Элеонора атеатр апны экскурсия акIвлыршатI, апсуа азъазара апны щта ду гIанызжьыз аргылчIвква дгIарыквчважватI. Ауи ацIайква йгIаргвынлыргIвытI артисткви атеатр анахьанат анхагIвчви ргIапсара хвы азыбара шатахъу, аспектакль ъадзацауа дауыш ухъуырга йшамуаш, асцена апны йгIахъвмарквауа хвы рыквцIачIву.
УацIыхъван апхьагIвчва асцена ащтахьла йыкIвырдашан атруппа йалакву йрабадыртI, аргылчIв агIаныршари артист йъачIвагIи йырпщылу джьащахъвара щарда рдыртI.
Ахъвлапын йагIаншара хъадата йалтI арежиссер Шамба Алхас йыргылыз «Мирандолина» спектакль апшра.
Атеатр апны амдара ацIыхъва йнадырдзауата ацIайква абуфет йдырцан хъагIата йдырчатI.
