Лента событий ВААК
Жвлара проектлыхра ащатаквала тшыбжьара акIвшатI Аацы кыт апны
АААКи хъахIара гIагра мурад змам «Асоциал гIаджвыквцIараква рыжвлара квта» автоном организации йацдырхъйауа апроект акIвшауаркIвитI. Ауи апшта, Аацы кыт аквтанай апхьарта апхьагIвчва рыхъазла жвлара проектлыхра ащатаква тшырзыбжьарала апрограмма алдыргатI. ЙгIалкIгIара атахъыпI асквш 2025 агIан ари йгIвбахауа кытта йшцаз.
ЙъакIвызлакIгьи апшта атшыбжьараква гIвымшкI йакIвшатI, йаргьи атеория йгьи апрактика хъвквала йалан. Йапхъахуз атшын абжьагIвчва Цквитариа Мати Абыда Наиди рдырраква апхьагIвчва йрыцагIвыршатI, ацIайква рхъвыцраква ззынадырхуш ауысква гIалыркIгIарныс йырцхърагIатI. ЙгIвбахуз амш апхьагIвчва ауыс акврыдзраква рпхьадзауа тшырбжьатI, гвып-гвып тшыршан рпроектква лырхтI йгьи ауатыкв йгIатарцIатI.
Аацы аквтанай апхьарта апны йакIвшаз атреннинг йгIанарыцIсыз апроектква рнархараква щардан. АпхьагIвчва йапшым апроблемаква гIащтIырхтI – медпункт гIахътIра апны угIалагата апхьарта абиблиотека гIаршIыцра йгьи книга апхьарта клуб гIаныршарадза. Ауаса айгIайра зыртыз апхьарта спорт ъамапсымала йадгалрала апроект акIвпI – апхьагIвчва райхIарагIв ауи напIы азыщтIырхтI.
Жвлара проектлыхрала атшыбжьараква Адуней апсуа-абаза конгресс Апсны акытква рпны асквш 2024 йгIашIарышвта йакIвнаршитI. Асквш 2025 агIан ауи йгIалалтI Ростов шта, Каменск-Шахтинский къала йауу хъахIара гIагра мурад змам «Асоциал гIаджвыквцIараква рыжвлара квта» автоном организация. Апроект апхьагIвчва проектлыхрала анхара йгIаланаркIра, ауат рхъвыцщи рыршIыйари тшауацIдрыхра йырзынархапI.
