Лента событий ВААК
Мусса Егзакь ашәҭшьыҵәрақәа шьҭаиҵеит Пискаревтәи амемориалтә ҧсыжырҭаҿы
Ленинград иаланхоз ауаажәлари ахьчаҩцәеи рыхьӡ агәалашәаразы, иахьа Пискаревтәи амемориалтә ҧсыжырҭаҿы еизеит зқьҩыла петербургааи ақалақь асасцәеи.
Ашәҭшьыҵәрақәа рышьҭаҵара ацеремониа рхы аладырхәит АААК Иреиҳаӡоу ахеилак Ахантәаҩы Мусса Егзакь дзаҧхьагылаз, Санкт-Петербург иҟоу аҧсуа диаспора ахаҭарнакцәа.
600-ҩык инареиҳаны Аҧсны аҵеицәеи 800 инарзынаҧшуа Ҟарачы-Черқьессиа аҵеицәеи Ленинград ахьчара иалахәын. Урҭ ирызкны Пискаревтәи аҧсыжырҭаҿы иқәдыргылеит амемориалтә ҭӡы.
Ҟарачы-Черқьессиатәи Ареспублика ахада Рашьыд Темрезови ҞЧА Жәлар Реизареи (Апарламент) рыхьӡала ацеремониа алахәцәа иҭахаз рмемориал амҵан ашәҭшьыҵәрақәа шьҭарҵеит.
Иара убасгьы Ленинград зыхьчоз Аҧсны аҵеицәа ргәалашәаразы Адунеизегьтәи аҧсуа-абаза конгресс ахьӡала ашәҭқәа шьҭарҵеит.
Атеатр аҿы ахәылҧаз: АААК иацнаҵоит ақыҭа школхәыҷқәа рзы апроект
Адунеизегьтәи аҧсуа-абаза конгресси С. Ҷанба ихьӡ зху Аҧсуа драматә театри иацырҵоит еицырзеиҧшу апроект «Атеатр аҿы ахәылҧаз». Уажәы уи рхы аладырхәит Бамбора ақыҭа ашкол аҵаҩцәа.
Аҧсны зҽаҧсазтәыз ажурналист актриса Елеонора Коӷониаҧҳа асасцәа аекскурсиа рзымҩаҧылгеит - атеатр аҭоурых аҟнытә аинтерес зҵоу ахҭысқәа лгәалалыршәеит, аҧсуа ҟазараҿы зышьҭа нзыжьыз аспектакль хадақәа дрылацәажәеит. Лара ахәыҷқәа ирзеиҭалҳәеит артистцәеи, атеатр амаҵ азызуа егьырҭ аусзуҩцәеи рџьабаа пату шақәҵатәу, аспектакль анцо аҭынчра аилагара шыҟамло, асценаҿы иқәгылоу рахь аҳаҭырқәҵара шаарҧштәу.
Анаҩс ашколхәыҷқәа акулисақәа рнаҩсан иҟоу ддырбеит, уаҟа дара атруппа алахәцәа ирабадырит, аспектакль ақәыргылареи артист изанааҭи ирызкны адырра ҿыцқәа роуит.
Ахәылҧаз ахҭыс хаданы иҟалеит арежиссер Алхас Шамба иқәиргылаз аспектакль «Мирандолина».
Атеатр аҿы аныҟәара анаҩсан, атеатр аҟны аус зуа абуфет аҿы апроект алахәҩцәа ирыдыргалеит ачеиџьыка.
