Лента событий ВААК
АААК Ачандара кыт айъазарта хъвшвыла йацхърагIатI
АшIыпIа хъвшараква рыцынхара апкъ йтата АААК Ачандара кыт апны афельдшер-акушер пункт хъвшвыла йадгалра йацхърагIатI.
АААК йапхъахауа медицина цхърагIара шдурадзушла тшыбжьара Ачандара кыт апхьарта апны йакIвнаршатI
Арыпхьарали жвлара джьгаррали згIвадарахчарали АААК ахъвшара апроект апкъ йтата Ачандара кыт апхьагIвчва рыхъазла МЧС аъачIвагIагIв Амычба Индира далата йапхъахауа медицина цхърагIара шдурадзушла тшыбжьара акIвшатI. Атреннинг апны апхьагIвчва агIвычIвгIвыс йчважь анбылра, данмахра, закI ангIайыцхIара, йыбыгIв аншIчIвара, йща ангIаджвыквылра, датша гвжвайыгIваракI анйызныйра зынла уицхърагIара шатахъу рархIвтI. АцIайква ахвыртаква тамамта йшшIаухIвуш, агIвычIвгIвыс псып шйыурауаш, йгвы уаквымхIауата йшучытIуш ддырбатI. Атшыбжьара аналга АААК ауысхагIвчва апхьарта айъазарта анхагIвчва йапхъахауа амедицина цхърагIара ахъазла йгIаутахъхуш зымгIва зту адеста рырттI, гвжважвагIвакI аныншара йучпара атахъу зну ашвъагьи рызгIанырыжьтI.
АААК агвып боксла анкъвакъвра адгалагIвчва йрылан
Боксла ауагIахъа анкъвакъвра акIвшатI Бзыб кыт апны декабрь а 17 атшын а-Конгресс агвып рцхърагIарала. Атурнир Трыквшта йхъысныс йазадцалхаз апсуакви абазакви рхъмаштылра йазынархан.
Анкъвакъвраква Апсны шабгу йгIатыцIыз абоксерква рылан. Ауат 70-гIвы йнадзун, айсра 35 акIвдыршатI. СогIвым йаъу АААК ауысхарта атурнир йалакваз рыхъазла артшхъвагаква ррыхIазырра йацхърагIатI. КIьыдата йзыразпI а-Конгресс агвып ауи ауыс апны йгIарцхърагIаз Уатырба Денис.
Боксла ауагIахъа анкъвакъвра сынчIва пщынхауата йакIвшатI. Ауи апхъала атурнир Абашта айсра Ду, Апсны ауагIа р-Абашта айсра йрылакваз рхъмаштылра йгьи асквш 1993 мартI агIан агвыквсра йаладзыз айсчва йырзынархан.
