Лента событий ВААК
АААК Апсны аэтнографияла алекцияква акIвнаршауаркIвитI
АшIыпIа хъвшараква рыцынхарала Адуней апсуа-абаза конгресс ахъвшара Апсны аэтнографии атурыхи йырзынарху алекцияква акIвнаршауаркIвитI. ЙхътIу алекцияква ареспублика апхьартаква рпны йадыргалитI. Йызкьазууыз айчважвара акIвшатI Гвдауыта район йаланакIуа Квланырхва кыт апны. Ауи акIвлыршатI атурыхли этнографияли АГУ акафедра адоцент, атурых наукаква ркандидат Тарба Сима. Айчважвара апсуакви абазакви рпны асабиква бжьарала ацIасква йырзынархан. ХIызту асквш ацIыхъвадза ужвыгьи гIвлекциякI акIвшара атахъыпI.
Санкт-Петербург апны Апсны Республика Ахъахвитри АйгIайри рысквш 30 йазынархаз гвыргъьахъв хъвлапны акIвшатI
Апсны Республика Ахъахвитри АйгIайри рысквш 30 йазынархаз агвыргъьахъв хъвлапны «Гранд Каньон» атшауацIыхра шта йаланакIуа «Плоды Просвещения» («Апхьара агIарбараква») театр апны йакIвшатI. Айззара гIахъитIытI Адуней апсуа-абаза конгресс ЙхIаракIу асовет аунашвачпагIв, Къарча-Черкес а-Парламент аунашвачпагIв йтарагылыгIв, «Алашара» Дуней адкIылара апрезидент Эгьзакь Мусса. ЙгIачважвара апны ауи аветеранква, дара-дара айсра йпшцIалыз айсчва, айгIайра зкъару алазцIаз зымгIва дшырзыразу йхIватI. Айззара йалан Апсны Республика Ахъахчара аминистр йтарагылыгIв Бжаниа Давиди Санкт-Петербург Апсуа жвлара йапхъахуз аунашвахъцIагIв Айба Рауфи.
Ахъвлапын йахъв хъадата йалтI Петербург йбзазауа айсчва «Асквшква 1992-1993 рагIан йакIвшаз Апсны ауагIа р-Абашта айсра апны АйгIайра асквш 30» медальква рытра. Ауи акIвымкIвагьи Апсны Ахъахчара а-Министерства аразыра швъаквала рыхьыз рхIватI ареспублика ахъазла гуманитар цхърагIара адгалра йалаз зымгIва. АйгIайра гIатыргищтара сквш 30 ъацIуа ахьызла Эгьзакь Мусса «Апсны апны амамыр ахчара ахъазла» медаль йквнадыргатI.
Ахъвлапын апны асасчва АААК апроект «Сальамшвъа» йахадыргIвазатI. АршIыйара йазалхыз ахъвы апны йгIахъвмартI АААК апны йгIаныршу «Абаза» уагIахъа гIахIвыщала агвыпи ашвахIварала аларпшра проект «Голос» («Бжьы») 10-хуз асквш йалаз ашвахIвагIв Агрба Ани.
