Лента событий ВААК
Апсуа уагIахъа хъвмарщаквала а-Федерация йалакву райззара акIвшатI СогIвым апны.
Апсуа уагIахъа хъвмарщаквала а-Федерация йгIвбахауа аконференция акIвшатI Апсны Республика чкIвыныргIи спорти руысквала АкъральыгIва комитет апны.
Анйара йалан АкъральыгIва комитет аунашвачпагIв Хагба Таращ, а-Федерация апрезидент Гвынба Адгвыр, СогIвым апны АААК ауысхарта аунашвахъцIагIв Реквава Темури чкIвыныргIи физкультури рхъвшара унашва ахъызцIауа Берзениа Валерийи, физкультура, спорт йгьи ар апны акъвырльыкъвхара тшазрыхIазыррала арыпхьара а-Министерства ахъвшара аунашвахъцIагIв ТаркIьыл Аслан, аимцакьачара йасуа акомандаква йрылакву йгьи абжьагIвчва.
Уыс хъадата йызлапшыз а-Федерация анатIала алаща лыхра акIвпI. Айкьангьашраква рымщтахь напIщтIыхрала а-Федерация йавице-президентта йалырхтI Берзениа Валерийи ЧIлоу йауу аимцакьачарасчва ргвып рбжьагIв хъада Ануа Ансоуи. Щарда йнамихуата йахъпшылуа асовети а-Федерация асовети йрылазлушгьи дрыбагъьуштI.
Гвынба Адгвыр йгIачважвара апны йгIаликIгIатI а-Федерация йалу акомандаква Абашта айсра Ду апны АйгIайра Амш йазынарху аспорт анкъвакъвраква йшрылазлуш. Ахъвмарраква май а 6 Апсны акъала хъада СогIвым Ахъахвитра аплощадь апны йакIвшуштI. Ауатква ракIвымкIвагьи уыжвласыла а-Федерация адамыгъа ауагIа йднарбуштI.
Апсуа уагIахъа хъвмарщаквала а-Федерация асквш 2024 агIан йгIандыршатI. Йапхъахуз аконференция апны ауи агIаныршара гIаджвыквызцIаз агвып а-Федерация апрезидент далырхтI, аустав дрыбагъьатI.