Адуней
апсуа-абаза
конгресс

Санкт-Петербург, «Гранд Каньон» тшауацIыхырта квта апшцIа апны Петербург йауу йбергьльу аскульптор Гарапач Константин йчпаз «АжвгIванд айачIваква» зхьзу асин шIыц гIахъыртIытI.

Аджьаз йгIалху акомпозиция зхрихыц зыргъвгъвата ажвгIванд йалу айачIва гIакIынзырцра зтахъу атшыгIв шIа дгIанарбитI. Ауи атурасы гIазхъырхыз Нарт эпос афыр хъада Сасрыкъви ауи йтшы Бзоуи ракIвпI. Сасрыкъва алащцара апны ахьта йащуаз йайщчва аджьаль йгIашIигитI, ауи йгIакIницIаз айачIва нартргIа рымгIва днарбитI, айныжвква рпны йайщчва рыхъаз амца гIайгъычитI.
 
Ари атурых агIвычIвгIвыс адуней дыззыкву йагIарбагапI. АпхъанчIви локI апшта «АжвгIванд айачIваквагьи» йгIахIгваладыршвитI: акъаругьи ахъашыгIврагьи магIны анрыму ауат ауагIа йанырзынхауа – пхара, лашара, гвыгъара анрызгIаргуа – акIвпI.
 
«ХIара «Гранд Каньон» атгIачва, асабиква, ауат рызхIара йырзынарху уатыквта акIвпI йшгIанхIыршаз. Асин шIыц хIысасчва гIанарайгвауата дзачIвызлакIгьи магIын ду зму азцIгIара йнатитI: ачIвыйа уара айачIваква уырзынадзарныс уызхIвапсауа, убзазара мурадта йамайа? Аджьауап закIыпI: ухъашыгIври укъаруи ауагIа зымгIва рыхъаз йгIаурысабапырныс», – дацIачIвагъватI «Гранд Каньон» гIанзыршаз «Алашара» адкIылара апрезидент, АААК ЙхIаракIу асовет аунашвачпагIв Эгьзакь Мусса.
 
Гарапач Константин йшихIвазла, апроект йгIаныцIуа – ахабарыжвква угвы ацчпата ушрызхъвыцуаш акIвпI: айачIваква ауаъа агIвычIвгIвыс ймурад хIаракIква йыргIарбагахитI, ауи йаццауата ауат ауи йгIатгараква йырхIварыбзатагьи йалитI.
 
Аскульптура «Гранд Каньон» тшауацIыхырта квта агьагьара йдыргылхьу асинква – «Асквш агIамтаква», «Асабиква мамыр рытра», «Агвышхвара агIалцIырта» – йрыцахъуата йгIарылалтI. Ауат шалу зынгьи зыхв ымдзуа абайараква: ангIалра, мамыр, бзира, апшдзара азгIашыкъра йгьи йгIадзынгылуа абанпара райгвыгIвра – хъгалра ъарыму уатыкв гIандыршитI.

Апроект ашвахIвагIвчва шIаква ргIаура йгьи цхърагIара драдзара йазынархапI: ауат джыпхакI йтагылам арыпхьара программа йаланакIуа атшыбжьараква йрылазлуштI, анкъвакъвраква йшрылалуаш швапха дырхIарныс рылшуштI.

Анкъвакъвра ахъвква октябрь ауацIа Москви СогIвыми рпны хноминациякIла йакIвшуштI: «Солота опера ашвахIвара», «Гвып хвыцта ашвахIвара», «Амакъымасра азъазара». Ауат йрылал йауаштI 18 сквша уалагата сквш 45-дза йырту амакъымршIыйагIвчва. РыцIа бзита тшгIазырбаквауа апроект магIын ду зму йахъвыта йалуа агала-концертква йрыларцIуштI. 

Анкъвакъвра культура нархара зму агIаджвыквцIараква р-Президент фонд ацхърагIарала йгIанлыршатI РФ апны гIатгара зму артистка, Апсны Республика ауагIа рартистка, «Ахьдз-Апша» орден II астепень нкъвызгауа Москва йаъу «Геликон-опера» музыка театр асолистка Гыцба Алиса.

Анкъвакъвра йадгалагIвпI

Апсны Республика а-Правительстви культурала а-Министерстви.
Анкъвакъвра йацхърагIаквауа йрылапI Эгьзакь йфонд.

Адуней апсуа-абаза конгресси Ростов шта йаланакIуа Каменск-Шахтинский къала йауу хъахIара гIагра мурад змам «Асоциал гIаджвыквцIараква рыжвлара квта» адкIылари асквш 2025  апны апхьагIвчва ажвлара проектлыхра ащатаква йырзыбжьарала апроект алдыргатI. ЙцIыхъвахуз гIашIасгата йалтI Ткъварчал район йаланакIуа Уаквым кыт ацара. 

Асквш ауацIа адгалагIвчва Апсны агIапхьартакI рпны гIвба-гIвба мшы йнайлуз атшыбжьараква акIвдыршатI. Ауат апхьартаква йрыуан АдзыгIвбжьа, Мгвыдзырхва, ПакIващ, Аацы, ЩащикIвар, Уаквым кытква йгьи Ткъварчали Гали рквтанай апхьартаква. Йъацуз апхьартипхьадза апны гIвымшкI руацIа интенсив адыргалуан. Йапхъахуз амш атеория йазалхызлун – проектлыхрала абжьагIвчва  гIархъпшылуамца апхьагIвчва гвып-гвып тшыршунта гвыпипхьадза дара рпроектква лырхуан. ЙгIвбахуз амш апроектква ауатыкв йгIатарцIунта йрыквчважвалун, ауи амщтахь йазалхыз акомиссия рыцIа йнардзаз йгьи йатахъыз агIаджвыквцIараква йдырхъйарныс йгIалнахуан. УахьчIвала ауат айгIайра зыртыз апроектква рщарда абзазара йаларжьхьатI.

Жвлара проектлыхра ащатаквала апроект а-Конгресс агвып асквш 2024 йгIашIарышвта йындырхитI. Асквш 2025 агIан ауи «Асоциал гIаджвыквцIараква рыжвлара квта» АНО ацхърагIарала РФ апрезидент грантква р-Фонд ахчала йдырхъйауа апроект «НКО азхIара атып: Апсны» апкъ йтата йакIвдыршауа йалагатI.

АпхьагIвчва тшъарбжьаз йахъазымкIва датшагьи хачIв ду архъйатI ауи: ЩащикIвар, Аацы, ПакIващ, Уаквым кытква рапхьартаква рпны къвльайта йагвныргIву жвлара уатыкв гIаншара ахъазла аъащаква щаквгылтI. Ауи абзирала апхьагIвчва рпроект гIаджвыквцIараквагьи йрыцыркIтI, къвльайта йагвныргIву ажвлара уатыквквагьи гIандыршатI.

АдгалагIвчва йыргвыгъапI апроектла анхара йгIайуа асквш агIангьи йнадырдзарныс.