Лента событий ВААК
Жəабран цIас атурыхи уахьчIва йшынкъвыргауи
Жəабран (жвабран) – сквшыкI апны зны – Ачгара ду апхъала – йдыртлапIауа гвыргъьахъвпI. Ауи ацIас ащайдзаква хIуагIа рапхъанчIви гIамта йгIаджвыквылитI.
Эгьзакь Мусса абоксер Агрба Харитон дйынйатI
Эгьзакь Мусса Россия йауу, зыжвлала йапсыуу апрофессионал абоксер, АААК йалу Агрба Харитони ауи йбжьагIвы Дотдаев Руслани дрынйатI.
МартI ахъа Агрба Харитон Мексика йауу Боррего Хосе Мигель дйайгIайын Бокс а-Дуней адкIылара (IBA) апны килограмм 67-дза зчакьуа рквта адуней ачемпионра дазабакIырныс хвитнагIа гIатигатI.
Аспортсменква ауи апшIагылра шакIвшаз, ларпшра дута йшалыз рхIватI – бокс айсраква «Сириус» федерал шта апны ЧквыныргIа р-Дуней фестиваль апкъ йтата йакIвшатI.
Агрба йшихIвазла, бокс дъадзайсуа агIамта апны ауи рахIа магIын ду змаз йгьи рахIа йбаргвыз апшIагылран. Ауи агIан апш зынгьи заджвгьи дгьгIакIыдйымкIылсызтI, ауаса атшыбжьара мчкви апсихология рыбагъьари щтадъа йгьымдзтI – асудьяква зымгIва йацшIакIта Харитон дайгIайта йщаквдыргылтI. СынчIва мурад хъадата йпахь йыргылуа IBA ачемпион йхьапщ мъа гIатгара акIвпI.
Агрбагьи Дотдаевгьи Мусса ХIабальа йпа йъарыцикIуа, йгватра ъарыгимырхауа ахъаз йшизыразу йархIвтI, ауи апш гвып мчи цхърагIари рымата адуней ачемпионра шгIатыргуш гIалыркIгIатI.
Мусса ХIабальа йпа аспортсменгьи абжьагIвгьи рмурад гIардахIвырныс рзитахъта драйхIвахIвтI. Ауи йшихIвазла, Агрба Харитон спорт апны йымгIва йыла гьахъихуам, ауи йайрышра, йчхIара, йгвы амч йбитI, дахIвра шйымазлушгьи кьангьаш гьазгIайгуам.
