АААК Гагра ахақәиҭтәра амш азы аиабшьра аинвалидцәа рассоциациа «Аԥсны» иалоу аветеранцәа аҳамҭақәа рзыҟанаҵеит, иара убас Гагратәи ахәышәтәырҭа аковид ҟәша ацхыраара анаҭеит.
1992-1993 шықәсқәа рзтәи Аԥсны жәлар рџьынџьтәылатә еибашьраҿы Гагра ахақәиҭтәра амш иазкны, жьҭаара 6 рзы Адунеизегьтәи аԥсуа-абаза конгресс аиабшьра аинвалидцәа рассоциациа «Аԥсны» иалоу аветеранцәа аҳамҭақәа рзыҟанаҵеит – ателербага, арԥхагақәа, ахызақәа рынаҭеит.
Аконгресс ахаҭарнак Изольда Ҳагԥҳа еиҭалҳәеит акциа шеиҿкааз Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь инапынҵала.
«Ҳара иахьа абра ҳааит, акыр иаԥсоу ҳветеранцәа аныҳәа рыдаҳныҳәаларц , агәабзиара рзеиӷьаҳшьарц, ҩаԥхьа рҿаԥхьа ҳхырхәарц, рлакҭа ҳҭаԥшны иҭабуп ҳәа раҳҳәарц рыԥсадгьыли рыжәлари рзы иҟарҵаз зегьы азы», – лҳәеит Ҳагԥҳа.
Аконгресс акоманда, уи ахантәаҩы Мусса Егзакь аԥхьа днаргыланы, иаадырԥшыз азҿлымҳаразы иҭабуп ҳәа реиҳәеит ассоциациа анапхгаҩы, Аԥсны жәлар рџьынџьтәылатә еибашьра аветеран Гела Ванача. Иара иазгәеиҭеит аветеранцәа ас еиԥш ирыхӡыӡааны ианрызнеиуа агәахәара ҷыда рнаҭоит ҳәа.
«Зегьы ишәыдысныҳәалоит аныҳәа. Аҭынч ԥсҭазаара ҟалааит! Хазы иҭабуп ҳәа расҳәоит Аконгрессаа, ҳгәы иахәеит ҳахьышәхамшҭуа», - иҳәеит иара.
Аибашьра аветеран Нана Акабагьы Адунеизегьтәи аԥсуа-абаза конгресс аусзуҩцәа иҭабуп ҳәа ралҳәеит аветеранцәа рыхьӡала, абас еиԥш иҟоу акциақәа ирыбзоураны ауаажәлар ҳарҭахны ҳхы ҳбоит, ҳәа азгәалҭеит лара.
«Иҭабуп ҳахьышәгәалашәо, уи акраанагоит ҳа ҳзы. Шәадныҳәалазааит аныҳәа!» - лҳәеит Акаба.
Гагра ахақәиҭтәра амш ақлақь иамшны иԥхьаӡоуп, абри аҽны Адунеизегьтәи аԥсуа-абаза конгресс ақалақьтә хәышәтәырҭа аковид ҟәшаҿы зҽызхышәтәуа апациентцәа ирыхәаша амедицинатә маҭәахәқәа рынаҭеит.
«Ахәышәтәырҭа аковидтә ҟәшаҿы ихәарҭахаша амедицинатә маҭәашьарқәа рызнаҳгеит. Апациентцәа зегьы агәабзиара рзеиӷьаҳшьоит, агәыӷра ҳамоуп ҳара ҳлагала хәыҷгьы абри аҿкчымазара иақәԥо аҳақьымцәа акала иарманшәалап ҳәа», – лҳәеит Изольда Ҳагԥҳа.
Гагратәи араионтә хәышәтәырҭа аҳақьым хада ихаҭыԥуаҩ Заира Харабуеи аковид ҟәша аиҳабы Ирма Барцыци аколлектив зегь рыхьӡала ироуз ацхырааразы Аконгресс иаҭабуит.
«Иҭабуп ҳәа шәаҳҳәоит шәахьҳазҿлымҳау азы. Ҳара изаҟаразаалакгьы ацхыраара ҳаигәырӷьоит. Акоронавирус аҿагылараҿы ацхыраара мыцхәы ҟалаӡом», - лҳәеит Харабуа.
Адунеизегьтәи аԥсуа-абаза конгресс аусураҿы имаҷымкәа аҭыԥ ааныркылоит агәыҳалалратә проектқәа. АААК уажәаԥхьагьы Аԥсны аџьынџьтәылатә еибашьра аветеранцәа ирызку акциақәа еиҿнакаахьеит, имҩаԥнагахьеит. Апандемиа алагеижьҭеи Аконгресс иалшо ала ирыцхраауеит Covid-19 иаҿагыланы иақәԥо – ахәышәтәырҭақәа реиԥш, ари аҭагылазаашьа уадаҩ аекономикатә хҟьа-ԥҟьақәа зныԥшызгьы.
шәҭалароуп, ма шәыҽҭажәыҩроуп.