Шьазина Бганҧҳа  

Апроект Аҧсны аҭоурых-культуратә ҭынха аларҵәара иазкуп. Уи ахықәкы хадақәа — еизҳауа аҿар Аҧсадгьыл абзиабара рылааӡара, жәлар рҭоурых ахь аинтерес аизырҳара, аҭоурых-культуратә обиектқәа ахәыҷқәа радыҧхьалара. Апроект аҳәаақәа ирҭагӡаны Аҧсны ақыҭа школхәыҷқәа ирылшоит ақалақьтә музеиқәа рҭааара. 

Апроект анапхгаҩы, аҭыҧантәи ахаҭарнакрақәа аус рыцура иазку АААК аҟәша аспециалист Херсон Симониа иажәақәа рыла апроект ҿыцлагалоуп, аха ҧхьаҟа иацырҵап ҳәа игәы иаанагоит.

«АААК Иреиҳаӡоу ахеилак ахантәаҩы Мусса Егзакь ицхыраарала апроект ҿыц хацҳаркит. Мусса Егзакь-иҧа напхгара зиҭо Аконгресс агәыҧ ҷыдала ирыцклаҧшуеит аҧсуа ҿар рааӡареи Аҧсадгьыл абзиабара рылааӡареи ирызку апроектқәа. Ихацҳаркыз апроект ҿыцуп, ҳгәыӷуеит анаҩсгьы иацаҳҵап ҳәа», – иҳәеит Симониа. 

Раҧхьатәи аусуратә ҭыҵра еиҿкаан Уақәыми Арасаӡыхьи рыҟнытә ашколхәыҷқәа рзы. 45-ҩык аҵаҩцәеи урҭ рырҵаҩцәеи рыла ишьақәгылаз агәыҧ Гәдоуҭа иаҭааит Сергеи Дбар ихьӡ зху Аџьынџьтәылатә еибашьра Аҳәынҭқарратә музеи, анаҩс Мгәыӡырхәа ақыҭа иҟоу амилаҭтә парк «Аҧсны» аҵакыра. 
 
Асасцәа иддырбеит амузеи азалқәа. Ахәыҷқәа рыҧсы ӡаны иазыӡырҩуан амузеи аиҳабы Гәыгәыца Џьыкрҧҳа Аҧсны азы зхы иамеигӡаз аҵеицәа ирызкны имҩаҧылгоз аекскурсиа. 

Амилаҭтә парк аҿы ашколхәыҷқәа инарҵауланы рцәа ианырит ҳабдуцәа рҵас-рқьабз, еилыркааит амилаҭтә культура иахәҭаку аелементқәа рҵакы. 

 «Аурокқәа рҿы иаҳзеиҭарҳәоит ҳажәлар анкьатәи рынхашьа-рынҵашьа. Амилаҭтә парк аҿы уи зегьы лабҿаба иаҳдырбеит. Аиҧш зеиҧшу аекскурсиақәа рашьҭахь ҳҭоурых анаҩсгьы аҭҵаара иаҳа-иаҳа ҳгәы ахылоит», – лҳәеит аҵаҩы Миранда Амҷҧҳа. 

Апроект «Аҭоурых амаӡақәа» аҳәаақәа ирҭагӡаны 2025 шықәсазы даҽа усуратә ҭыҵрак ргәиҭоуп, Аҟәа иҟоу Аҧснытәи аҳәынҭқарратә музеи аҭаара азҧхьагәаҭоуп.