Ахәыҷқәа рзы аԥсуа бызшәа аҵара аметодика ҿыц шьақәнаргылеит иагьӡырнагеит Баграт Шьынқәба ихьӡ зху аԥсуа бызшәа аҿиара агәыҳалалратә фонд.
Ҳаамҭа иақәшәо аԥсуа бызшәа аҵара аметодика ҿыц цәырнагеит Баграт Шьынқәба ихьӡ зху аԥсуа бызшәа аҿиара агәыҳалалратә фонд Аҟәа, нанҳәа 25 рзы.
Афонда адиректор Леуан Миқаа еиҭеиҳәеит, еицырдыруа арҵаҩцәеи аԥсуа бызшәа аспециалистцәеи злаз аусуратә гәыԥ арҵагашәҟәқәеи аметодикеи реиқәыршәара аус шадырулоз ҩышықәса инареиҳаны. Агәыԥ анапхгаҩыс дыҟоуп АААК Иреиҳаӡоу ахеилак алахәыла, аԥсуа бызшәадырҩы Виачеслав Чрыгба (Чрыгба иара убас Баграт Шьынқәба ихьӡ зху афонд ахантәаҩысгьы дыҟоуп – аред.).
Аспециалистцәа аусура ианалагоз зназы иҭырҵааит адунеи еиуеиԥшым абызшәақәа рҵаразы иҟоу, еффективра зцу аметодикақәа. Апрограмма ҿыц ҷыдала ахәыҷқәа аԥсуа бызшәа дырҵара иазынархоуп.
Абри аметодика ашьақәыргылара импульск аҳасабала иазыҟалеит шықәсқәак раԥхьа имҩаԥгаз аҭҵаара. Усҟан Виачеслав Чрыгба гәыԥҩык аспециалистцәа идыԥхьаланы иҭиҵааит ашколқәранӡеи ашколтә қәреи ирыҵанакуа ахәыҷқәа рыбжьара ахатәы бызшәа адырра аганахьала аҭагылазаашьа зеиԥшроу. Аҭҵаара иаанарԥшит Аԥсны ақалақьқәа рҟны инхо 70% ахәыҷқәа аԥсуа бызшәа шырзымдыруа.
«Убас еиԥш апрактика шьақәгылеит, аԥсуа бызшәа ззымдыруа ахәыҷқәа ахәыҷбаҳчахь ирышьҭуеит абызшәа здыруа инарываргыланы, гәыԥк ахь еицырышьҭуеит, актәиқәагьы рхатәы бызшәа шьҭыркаарц. Аха, ишаҳбо еиԥш, аамҭа кьаҿк ала аԥсшәа здыруа ахәыҷқәагьы урысшәала мацара ацәажәарахь ииасуеит. Убри аҟнытә ҳҿаԥхьа дҵас иқәҳаргылеит аԥсуа бызшәа ззымдыруа ахәыҷқәа иҷыдоу аметодикала абызшәа дҳарҵарц, абызшәа здыруа «ирыламырҩашьакәа», - ҳәа еиҭеиҳәеит Леуан Миқаа.
Афонд адиректор иазгәеиҭеит аметодика ҿыц ззынархоу «аԥсуа бызшәа ззымдыруа ахәыҷқәа» шракәу.
«Ҳара еилаҳкааит хышықәса зхыҵуа ахәыҷқәа абызшәа дырҵарала ишалагатәу. Аметодика х-ҩаӡаракны еихшоуп. Раԥхьатәи ззынархоу хԥа-хәба шықәса зхыҵуа ахәыҷқәа роуп. Актәи аҩаӡара иаҵанакуа арҵаратә комплекс хиоуп, уи аԥышәара иахысуеит Аҟәатәи хаҭалатәи ахәыҷбаҳчақәа рҟны», – ҳәа адырра ҟаиҵеит Миқаа.
Ари агәаҭаратә проект алахәцәас иҟалоит 150-ҩык инареиҳаны ахәыҷқәа.
Аметодика ҿыц аҟны абызшәа арҵара комплексла иазнеиуп ҳәа азгәалҭеит апрограмма аиқәаршәаҩцәа ируаӡәку Лиуба Цәеиԥҳа. Арҵара апрограмма еиқәыршәоуп арҵагашәҟәқәа хәба рыла, урҭ ируакуп урокцыԥхьаӡа еихыршәшәаны иахьеилыргоу арҵаҩы ицхыраагӡагьы.
«Ҳара алагарҭатә ҩаӡара хацҳаркуеит, уи хә-шәҟәык рыла ишьақәгылоуп. Шәҟәык арҵаҩы изкуп, егьырҭ аԥшьба – ахәыҷқәа: акласстә шәҟәы, аусуга шәҟәы, нас ажәабжьқәа еидызкыло аԥхьара ашәҟәы. Дара зегьы сахьала иҩычоуп. Иҟоуп иара убас аудио- видеоурокқәа. Урҭ аус рыдулараан ахәыҷы дҭыхуеит, ақьаад гәылаԥиҟоит, арԥшьшьара инапы алакуп, ажәакала, дызхысыз аматериал гәникылоит. Арҵара апроцесс зегьы ахәмарратә форма амоуп», – лҳәеит Цәеиԥҳа.
Лара иацылҵеит аметодика гәыԥ-гәыԥла аусура ишазынархоу.
«Агәыԥ рацәак идумзароуп, 12-ҩык ахәыҷқәа иреиҳамкәа. убасҟан ауп ҳарҵаратә программа иахәҭоу алҵшәа анаиуа», – лҳәеит аспециалист.
Виачеслав Чрыгба, иколлегацәа ражәа харҭәаауа еиҭеиҳәеит ахәыҷқәа шыхәыҷӡоу абызшәа дырҵара аеффективра зацу.
«Ҳара ашколқәранӡатәи аҩаӡарала ҳалагеит, избанзар ахәыҷы хԥа-ԥшьба шықәса анихыҵуа ауп абызшәа анышьҭикаауа. Анаҩс ҳара ҳгәы иҭоуп алагарҭатә школ аҵаҩцәа рзыҳәангьы аметодика аԥҵара. Ҳара ҳметодика ииашаҵәҟьаны ишьаҭанкылатәуп. Ара иаагоуп арҵаҩы иҟаиҵаша зегьы: аҽаршьцыларақәа, ажәақәеи афразақәеи, ахәмаррақәа, ашәақәа, аҭыхра, еиуеиԥшым адҵақәа. Изхысуа аматериал уажәи-уажәи еиҭаҳәахоит аҽаршьцыларақәеи, ажәеинраалақәеи, ашәақәеи рҿы, иара убас DVD аҟынгьы», - иҳәеит агәыԥ анапхгаҩы.
Чрыгба иажәақәа рыла, аметодика аус адызулоз аспециалистцәа «алҵшәа бзиа аиуп ҳәа агәыӷра рымоуп».
«Шықәсык ала иаҳбарҭахоит аметодика аус шауа. Ҳара ҳазҿу аус қәҿиаратәхоит ҳәа ҳазыԥшуп. Шықәсык ала ахәыҷқәа рхатәы бызшәала ацәажәара иалагоит ҳәа агәыӷра ҳамоуп», - иҳәеит аҵарауаҩ.
Баграт Шьынқәба ихьӡ зху аԥсуа бызшәа аҿиара агәыҳалалратә фонд аҟны ԥхьаҟагьы ргәы иҭоуп ахәыҷқәа қәҿиарала аԥсуа бызшәа дырҵара иазку иҿыцу, ихырҳагоу азнеишьақәеи аметодикақәеи раԥҵара иацырҵарц.
шәҭалароуп, ма шәыҽҭажәыҩроуп.