"Ацқьа хәмаррақәа" рымҩаԥгаразы ҭыԥс иалхын Гәымсҭа аԥшаҳәа иавоу адәы. Аицлабра алахәцәа асакьқәа аашьҭыхны, анапхазқәа рхаҵаны агәам аизгара иалагеит: асаркьа аԥҽыхақәа, апластик, ақьаад, аихаҷамаҷа уҳәа — акомандақәа акәаталақәа роуан еизыргаз агәам категориас изҵазкуа, насгьы иара ахьынӡарацәоу еиԥш. Астатистика уахәаԥшыр ауан аицлабрақәа ирызку аофициалтә саит аҟны. Ақәыԥшцәа ражәақәа рыла, ас еиԥш иҟоу ахәмаррақәа рыԥсадгьыл бзиа ишырбо, ишахӡыӡаауа аарԥшра иазҳәоуп.

«Аҿар ҳара ҳакәзар, уаҵәтәи амш ҳнапаҿы иҟоуп, убри аҟнытә ҳаԥсадгьыл шәҭыкакаҷуа аҟаҵара ҳашьҭазароуп. Уи адагьы, аицлабра аҽалархәра еснагь алахҿыхра ацуп, аҩызцәа ҿыцқәагьы урҳауеит», — лҳәеит апроект иалахәу руаӡәы Лаура Михаленко.

«Ҳтәыла иахәара акыр сзыҟаҵозар, исылшо акаҿы саангылаӡом. Насгьы сара арахь сааит сҩызцәа срыцны. Схы заласмырхәри?» — лҳәеит аицлабра иалахәыз Мила Ԥиԥиа.

Аекологиатә акциа аиҿкаара иазааԥсеит Адунеизегьтәи аԥсуа-абаза конгресс аусзуҩцәа Хьерсон Симониеи Шьазина Бганԥҳаи, иара убас ахаԥшьгаратә гәыԥ «Азеиԥш лшарақәа рдунеи» аԥҵаҩы Алиас Акаба. Ахарџь ахахьы иагеит Аекологиатә, апатриоттә ааӡара иазку арегионбжьаратә ауаажәларатә еиҿкаара «Ацқьа хәмаррақәа». Аԥсны ари аҩыза аус аиҿкаара аидеиа цәырҵит ҳазҭоу ашықәс ааԥынразы Санкт-Петербург имҩаԥысуаз Х Неватәи жәларбжьаратәи аекологиатә конгресс аҟны.

«Ари еиԥш акциақәа ҳтәыла иаҭахны иҟоуп, избанзар ҳаԥсабара блахкыга ахылаԥшреи ахьчареи агымзароуп. Макьаназы раԥхьатәи ашьаҿақәа роуп иҟаҳҵаз. Ҳаԥхьаҟа еиҳагьы ҳусқәа рымҽхак ҳарҭбаап ҳәа агәыӷра ҳамоуп», — иҳәеит АААК Аҭыԥантәи аҟәшақәа аус рыдулара аҟәша аспециалист Хьерсон Симониа. 

Аицлабра алахәцәа агәам аизгарахь ииасаанӡа атеориатә хәҭа иахысит: Санкт-Петербургынтә иааз акуратор Стелла Тихонова ари аҩыза ахәмаррақәа рымҩаԥгара аганахьала илымоу аԥышәа дазааҭгылеит. Алҵшәа бзиа ҟаларц азы, аҭыԥи аамҭеи иашаны иалхтәуп, иахьынӡауа ирацәаҩны ауаа алархәтәуп, асаити амобилтә хархәагеи аус рыдулашьа дырҵатәуп. Аҿар абарҭ атеориатә дыррақәа ахьроушаз ауада еиқәнаршәеит Аԥсны иҟоу Росструдничество ахаҭарнакра.

«Сынтәа иазгәаҭаны иҳамоуп СНГ атәылақәа жәаба рҟны аус зуа Евразиатәи ацқьара аклуб амҩаԥгара. Ҳара аԥышәахысрақәа мҩаԥаҳгоит ҭагалан иахымгакәа агәаҭаратә еицлабра ҳзеиҿкаарц, уи абзоурала хара ҳамцакәа, Аԥсны аҩнуҵҟа ахәмаррақәа реиҿкааҩцәа еиҵаҳааӡалоит. Ари аус ҳәаак аманы иҟаӡам, зехьынџьара иааукәыршаны иурыцқьалар ҟалоит», — лҳәеит Стелла Тихонова.

Аицлабра иалҵшәахеит 76 кьыла агәам-сам ақәгара, уи ахәҭак аҩынтә хархәарахь инашьҭхоит. Зегь раасҭа ирацәаны агәам еизызгаз алахәцәа аҳамҭақәа роуит.