Адунеизегьтәи аԥсуа-абаза конгресс Аԥсуа университет алархәны Аԥсны ақыҭа школқәа рҟны аетнографиатә лекциақәа рымҩаԥгара хықәкыс измоу апроект хацнаркит.
Селма Базԥҳа
Адунеизегьтәи аԥсуа-абаза конгресс Аҭыԥантәи ахаҭарнакрақәа аус рыцуразы аҟәша амчқәа рыла апроект ҿыц аԥшьгоуп. Аԥсуа ҳәынҭқарратә университет арҵаҩцәа алархәны Аԥсны ақыҭа школқәа рҟны аетнографиатә лекциақәа рыԥхьара иазынархоу.
Раԥхьатәи алекциа мҩаԥысит Ешыратәи абжьаратә школ аҟны хәажәкыра 10 рзы. ари алекциа амҩаԥгаразы ааԥхьара ирҭеит ААУ Аҭоурыхи, археологиеи, аетнологиеи ркафедра адоцент, аҭоурыхҭҵааҩ Сослан Салаҟаиа. Дзыԥхьаз алекциа аԥсууа-абаза жәлар реизыҟазаашьа аҭоурых иазкын.
Аҵарауаҩ иажәақәа рыла, ашколхәыҷқәа Аԥсны аҭоурых атемала акласс анҭыҵтәи адыррақәа рызнагара аҵак ду амоуп, дара рхаҭақәагьы ркультуреи рҭоурыхи еиҳа инарҵауланы аҭҵаара ргәанарԥхоит.
"Дырга бзиоуп ҳәа сахәаԥшуеит, абри апроект аҳәаақәа ирҭагӡаны раԥхьатәи алекциа Аԥсны раԥхьатәи ахада, аҵарауаҩ ду Владислав Арӡынба дзылгаз ашкол аҟны иахьымҩаԥысуа. Ешыратәи ашкол иҭоугьы, ҳашколхәыҷқәа зегьы уи иҿыԥшны, рыԥсадгьыл ажәытә-аҿатә иахьынӡауа ибзианы адырра рҽазыршәалароуп", - иҳәеит иара.
ААУ адоцент иазгәеиҭеит ашкол аҵаҩцәа атема алацәажәара шырҭахыз, иагьшазхиаз, азҵаарақәа шрызцәырҵуаз.
"Раԥхьатәи алекциа темас иаман аԥсуааи ашәуааи реизыҟазаашьақәа ҭоурыхла ишыҿиоз. Ҳара ҳазааҭгылеит ҳмилаҭ ашьақәгылара шымҩаԥысуаз, аԥсуааи ашәуааи рҭоурыхтә лахьынҵақәа зеиԥшраз. Аҵаҩцәа активла рхы аадырԥшит, ари аганахьала ирдыруа, ираҳахьоу рҳәон, азҵаарақәа ықәдыргылон. Сгәы иаанагоит абри аҩыза аинтерактивтә ҟазшьа змоу аформат ҿыц иабзоураны дара разҿлымҳара еиҳагьы иацлоит ҳәа", - иҳәеит иара.
АААК Аҭыԥантәи ахаҭарнакрақәа аус рыцуразы аҟәша аиҳабы Дмитри Жьиба иазгәеиҭеит уажәазы апроект шымҩаԥысло ақыҭа школқәа рҟны аҵара зҵо аиҳабыратә классқәа рҵаҩцәа рзы.
"Адунеизегьтәи аԥсуа-абаза конгресс апроект ҿыц шьақәгылоуп Аԥсны аҭоурыхи, аетнологиеи, аетнографиеи, акультуреи ирызкхо алекциақәа рыла. Ашколхәыҷқәа ирзеиҭаҳҳәоит ажәытәӡатәи аамҭақәа инадыркны иахьанӡа Аԥсны знысыз амҩа, аинтерактивтә ҟазшьала. Алекторцәа ирылдыршоит аҵаҩцәа алекциа радԥхьалара, адырра рызнагара анахысгьы аус рыцура. Ҳара ҳгәы излаанаго ала, ари аҩыза азнеишьа аҿар рганахьала ақәҿыҭра аиуеит, рдырра аизырҳаразы ргәы рыҳәо иҟанаҵоит", - иҳәеит Дмитри Жьиба.
Иара иажәақәа рыла, аетнографиатә лекциақәа ркурс амҩаԥгаразы ааԥхьара роуеит Аԥсны иреиҳаӡоу аҵараиурҭақәа рырҵаҩцәа, иара убас иналукааша аҵарауаа, акультура аусзуҩцәа.
"Алекциақәа ирыԥхьарц ҳара иааҳаԥхьоит аҭоурыхҭҵааҩцәа, аетнографцәа, аетнологцәа. Урҭ изызҳауа аҿар рдырра рымардоит аԥсуа жәлар рҭоурых иазкны ирдыруа рарҳәоит", - ҳәа ациҵеит иара.
Ешыратәи абжьаратә школ адиректор Фатима Сақаниа иазгәалҭеит АААК изԥшьанагаз аҵараиуратә проект хра злоу акакәны ишыҟоу.
"Ишдыру еиԥш, аҵараиура апроцесс иацу ауадаҩрақәа рацәоуп, зны-зынла ашколтә программа мацара аназымхо ыҟоуп ахәыҷқәа рхатә ҭоурых аҵаразы аинтерес ду рызцәырҵуа иҟалартә еиԥш. Арҭ алекциақәа рҟны арҵаҩцәеи ахәыҷқәеи ҭаацәашәала еицәажәалоит, ари аформат иалнаршоит имырхьааӡакәа адырра аҿҵаара", - ҳәа азгәалҭеит аспециалист.
Фатима Сақаниа илҳәеит иара убас, аинтерактивтә лекциа аформат шҿыцу ашколхәыҷқәа рзы, уи аҟынтә еиҳагьы ишаланахало аҭоурыхи акультуреи рыҭҵаара.
Атенографиатә лекциақәа рцикл аҳәаақәа ирҭагӡаны ҳазҭоу аҵарашықәс нҵәаанӡа зынӡа ф-лекциак мҩаԥысраны иҟоуп. Апроект мҩаԥыслоит Аԥсны ақыҭақәа рҟны аус зуа АААК аҭыԥантәи аҟәшақәа аус рыцурала.
шәҭалароуп, ма шәыҽҭажәыҩроуп.