Адунеизегьтәи аԥсуа-абаза конгресс аҵыхәтәантәи хымз ирылагӡаны Аҭыԥантәи аҟәшақәа русура аихшьаалақәа ҟанаҵеит.ирылагӡаны Аҭыԥантәи аҟәшақәа русура аихшьаалақәа ҟанаҵеит.
Адунеизегьтәи аԥсуа-абаза конгресс аԥсуа қыҭақәа хәба рҿы –Оҭҳара, Уарча, Мгәыӡырхәа, Калдахәара, Ҷлоу иаарту аҭыԥантәи аҟәшақәа рымчала аҵыхәтәантәи хымз рыла апроект дуқәа фба нанагӡеит. Проектцыԥхьаӡа зызку, ишынагӡаз атәы инарҭбааны еиҭарҳәеит АААК Аҭыԥантәи аҟәшақәа ркоординаторцәа Дмитри Жьибеи Валери Берзениеи.
Дмитри Жьиба еиҭеиҳәеит Калдахәара ақыҭан имҩаԥгаз аусура алҵшәақәа ртәы. АААК уаатәи ашкол-интернат ианаҭеит аспортзал азы аинвентар. Ари апроект анагӡараҿы ацхыраара ҟаиҵеит Адунеизегьтәи аԥсуа-абаза конгресс ҩызарыла иазыҟоу Денис Оҭырба.
Иара убас Калдахәара Аконгресс амчала еиҭашьақәыргылан амашьынаангыларҭа. Ари амашьынаангыларҭа иҷыдоу архитектуратә стиль амоуп. Уи аиҭашьақәыргылараҿы ацхыраара иаҳәеит ақыҭауаа рхаҭақәа.
«Ҳара (Аконгресс) аремонт азы иаҭахыз аргыларатә материалқәа ааҳхәеит. Аусурақәа мҩаԥыргон аҭыԥантәи анхацәа. Зегь ҟаҵаны ҳаналга арҽхәаԥхьыӡқәа маҷымкәа иҳаҳаит. Ақыҭауаа ишырҳәо ала, акыршықәса игәыгәҭажьны иҟаз аангыларҭа ҩаԥхьа ухы иаурхәартә иҟалеит», – иҳәеит Дмитрии Жьиба.
Калдахәара иҟоу АААК Аҭыԥантәи аҟәша анапхгаҩы Саҭбеи Чыкәбар иажәақәа рыла, аҟәша иалнаршеит аҭыԥантәи амҵәышәымпылтә командазы аформа аахәара. Иара убас Чыкәбар имчала аратәи ашкол абиологиа акласс еиқәыршәан еиуеиԥшым апрактикатә усқәа рымҩаԥгаразы иаҭахыз амаҭәашьарқәа рыла.
«Азныказы, арҭ апроектқәа хәыҷушәа угәы иабар ҟалоит, аха уи ус акәым. Абас иҟауҵо раԥхьатәи ашьаҿақәа агәы узҭарҵоит: ақыҭауаагьы иҟаҳҵари иҵегь ҳаиӷьхарц азы, ҳхы ҳабахәари ҳәа ихәыцуа иалагоит. Уажәнатә иазԥхьагәаҭаны иҳамоуп адәахьтәи арыцқьаратә усқәа, ҳаԥхьаҟагьы иҟаҳҵарц иаҳҭаху рацәоуп», – иҳәеит Аҭыԥантәи аҟәша анапхгаҩы.
Дмитри Жьиба ишиҳәаз ала, хара имгакәа АААК аҟны ргәы иҭоуп Калдахәаратәи ашкол абиологиа акабинет азы амикроскоп аахәара.
Иахьазы Аконгресс аусзуҩцәа рнапы злаку Уарча ақыҭан абаҳча-парктә зона аиҿкаароуп. Араҟа ахәыҷқәа рыхәмарырҭа-дәы еиҿкаахоит, иара убас воркаут-адәгьы: ақыҭауаа арҭқәа даараӡа ирҭахны иҟан.
Уарча иҟоу Аҭыԥантәи аҟәша анапхгаҩы Анрик Ломиа еиҭеиҳәеит, ақыҭаҿы ахәыҷқәа ахьыхәмарша ҳәа иалкаау ҭыԥк шрымамыз, убри аҟнытә аҭыԥантәи ауааԥсыра Аконгресс иадҵаалеит абри аус аҿы ацхыраара ҟанаҵарц.
«Ҳқыҭаҿы ахәыҷқәа маҷым, урҭ ахьыхәмарша, иахьыҩша-иахьыԥаша хазы дәык еиҿкаазарц ҳҭахын. Ҳаҳәара абас ахаҵгылара ахьаиуз даара ҳгәы иахәеит. Еиҳаракгьы анацәеи абацәеи. Ақыҭауаа доусы илшо ала адгылара ҟарҵарц рҭахуп. Зегьы Аконгресс иҭабуп ҳәа азаарыцҳауеит», – иҳәеит Ломиа.
Ҷлоу ақыҭан АААК ақәԥаҩцәа рзал аремонт ҟанаҵеит. Аконгресс Аҭыԥантәи аҟәшақәа ркоординатор Валерии Берзениа еиҭеиҳәеит уи аҩыза аҳәара шроуз ақыҭауаа рҟынтә аиԥыларақәа руак аан.
«Ақыҭаҿы дрымоуп азыҟаҵаҩ Ҭемыр Џьапуа, аспорт знапы алаку ахәыҷқәагьы ыҟоуп, аха аспортзал рымамызт. Аҭыԥантәи ауааԥсыра рхала аспортзал аҭыԥ азылырхит, ацхыраара иазыхиаз азыҟаҵаҩцәа ааргеит Аҟәантәи. Аремонт ҟарҵеит Аҭыԥантәи аҟәша ахаҭарнакцәа, ҷлоуаа рываргыланы», – ҳәа еиҭеиҳәеит акоординатор.
Ҷлоу иҟоу аҭыԥантәи аҟәша анапхгаҩы Ансоу Ануа иазгәеиҭеит ақыҭауаа аспорзал аартра акырӡа ишазыԥшу. Иара иажәақәа рыла, АААК аус ацура аӡәырҩы ргәы шьҭнахит, ақыҭа иахәара иҵегь апроектқәа нарыгӡарц рҭахуп.
«Ари акрызҵазкуа усуп, ауаа адгылара шрымоу деилнаркаауеит, ақыҭақәа зегьы ирҭахуп ус еиԥш иҟоу адгылара. Ҳшәыцхраар ҳҭахуп ҳәа иахьа иарбан кыҭазаалак уахьнеилак, аҭыԥантәи ауааԥсыра иаразнакала иувагылоит. Ауаа Аконгресс иҟанаҵо аусқәа рбоит, аинтерес рымоуп, иалацәажәоит иахьааидгыло», - иҳәеит Ануа.
Акоординатор Валери Берзениа адырра ҟаиҵеит, ақәԥаҩцәа рзал аартра хара имгакәа ишазыԥштәу, азыҟаҵаҩгьы ахәыҷқәа рыдкылара, аус рыдулара дшазыхиоу.
АААК Оҭҳара ақыҭа актив рԥыларақәа руак аангьы иит хыхьтәи иеиԥшу аидеиа – аҭыԥантәи ашкол аклассқәа руак аремонт азура. Ари аус зегь ргәы иақәшәеит аҟнытә лассы инагӡан – мызкы аҩнуҵҟала акласс ахәыҷқәа аднакылартә еиԥш ихиан.
«Ашкол дууп, ахәыҷқәа рхыԥхьаӡара есышықәса иацлоит, аклассқәа зегьы урыҩналартә иҟамызт. Убри аҟнытә аҵарашықәс алагамҭаз аклассқәа руак аремонт ҟаҳҵарц ҳаӡбеит. Ацхыраара дуӡӡа ҳаиҭеит Аҭыԥантәи аҟәша анапхгаҩы Амиран Бжьаниа, иара убас ақыҭа активгьы. Аконгресс аргыларатә маҭәахәқәа ҳзаанагеит, егьи зегьы ақыҭа аҷкәынцәа рнапала иҟарҵаз ауп. Ақыҭауаа рымчала иахьыҟарҵаз гәахәароуп, ашколхәыҷқәагьы цхыраауан», – иҳәеит Берзениа.
Уажәшьҭа дук хара имгакәа АААК ари ашкол аҟны иаарту аурокқәа мҩаԥнагоит: аекологиа, ақыҭа арҿиара, аԥсуа-абаза жәлар рҭоурых, Кавказ ҳаиашьаратә жәларқәа рҭоурых уҳәа атемақәа ирызкны.
Мгәыӡырхәа ақыҭан Адунеизегьтәи аԥсуа-абаза конгресс амчала акәашаратә зал аремонт мҩаԥысуеит абыржәтәи аамҭазы. Аконгресс ари апроект анаднакылозгьы аҭыԥантәи анхацәа ргәаҳәара шьаҭас иҟанаҵеит, дара ирҭахын ахәыҷқәа арҿиара аганахьала раамҭа ахьырхыргаша ҭыԥк еиҿкааны ирымазарц.
«Аконгресс ахахьы иагеит аремонт актәи аетап ахацыркразы иаҭахыз амаҭәахәқәа раахәара. Аремонт ахаҭа ҟарҵеит Аҭыԥантәи аҟәша алахәцәеи ақыҭауаа гәыԥҩыки. Аргылараҿы аԥышәа змаз реиԥш ари аус иазааԥсеит згәы азыбылуаз, ацхыраара ҟазҵарц зҭахыз ауаагьы. Агәыӷра ҳамоуп хара имгакәа ари ауада адашьмаҿы ахәыҷқәа ықәԥраауа икәашалап ҳәа», – иҳәеит Валери Берзениа.
Аҭыԥантәи аҟәша анапхгаҩы Марта Џьыкырԥҳа иазгәалҭеит ақыҭауаа Аконгресс аӡбахә шраҳахьоу, уи хықәкыс иамоу аԥсуа-абаза жәлар реидкылара шакәу шырдыруа.
Лара еиҭалҳәеит, ҳазҭоу ашықәс лаҵара 28 рзы Аконгресс ахаҭарнакцәа Мгәыӡырхәа аиԥылара шымҩаԥыргаз атәы.
«Ақыҭа уадаҩрақәас иамоу ҳрылацәажәон, ашкол апроблемақәагьы. Аконгресс ахаҭарнакцәа акәашаратә зал аремонт ҟаҳҵоит ҳәа иаԥшьыргеит. Нанҳәамза анҵәамҭазы афымцалашара аагаразы иаҭаху амарҭхәқәа аахәаны иаҳзышьҭарҵеит. Ҳара ҳҟынтә иаҭахыз аремонт иаго аргылараатә маҭәахәқәа рсиа ашьақәыргылара акәын. Мызкы аԥҳьа ус еиԥш иҟоу асиа еиқәҳаршәан Валера Берзениа иаҳҭеит», - лҳәеит Џьыкырԥҳа.
Лара иазгәалҭеит, Аконгресс аусура аҵак ду шамоу, еиҳаракгьы апроблема азнеишьа аганахьала, избанзар АААК «ауаажәлар ргәы иҵхо гәалас иамоуп». Убри иацҵангьы илҳәеит, апроблемақәа рацәоуп аиҳабыра урҭ зегь рыӡбара ианахьымӡо ыҟоуп ҳәа.
«Ақыҭақәа ҭыгалатәуп, ақыҭа школқәа ацхыраара рыҭалатәуп, ҳаԥсуа бызшәа, ҳатрадициатә культура еиқәхар ҳҭахызар. Ҳқыҭа ахьӡала иҭабуп ҳәа расҳәар сҭахуп Аконгрессаа ҳапроблемақәа иахьрыдҵаало, аха уи аҿгьы иаанымгылақәа – рыӡбара иахьаҿу азы», - лҳәеит Џьыкырԥҳа.
Адунеизегьтәи аԥсуа-абаза конгресс активла аус ауеит аԥсуа қыҭақәа рҿы. Абри ахырхарҭала инагӡоу Аконгресс апроектқәа зегьы ақыҭауаа рхаҭақәа алахәуп. Дара роуп ирҭаху, ргәы ззыҳәо, ма уадаҩрас ирымоу атәы зҳәо, уи ашьҭахь Аконгресс ацхыраара ҟанаҵоит аус анагӡараҿы. Ақыҭақәа рҿы аусура хықәкы хадас иамоуп – ауаа рхаҭақәа рхы иахәартә еиԥш аҟаҵара, доусы илшо ала аусура ргәы азҭаҵара. Азныказы апроектқәа шьоукы-шьоукы рымҽхак хәыҷӡоушәа иубар шалшогьы, ақыҭауаа рхаҭақәа ишазгәарҭо еиԥш, анырра ӷәӷәа рынаҭоит. Аҭыԥантәи аҟәшақәа рнапхгаҩцәа ирҳәоит, апроект хәыҷ анагӡара ашьҭахь ауаа иҵегь ҳқыҭа иазеиӷьу иҟаҳҵари ҳәа аҟәша ишадҵаало.
Иахьатәи аамҭазы Адунеизегьтәи аԥсуа-абаза конгресс Аԥсны иахьаҵанакуа Аҭыԥантәи аҟәшақәа 30 аанартхьеит. АААК аамҭа-аамҭала Аҭыԥантәи аҟәшақәа рнапхгаҩцәа ирԥылоит, ауаажәлар проблемақәас ирымоу еилнакаауеит.
шәҭалароуп, ма шәыҽҭажәыҩроуп.