Аныҳәа мҩаҧыслоит ажьырныҳәамза 3-8, иамҽханакуеит иакымкәа Аҧсны араионқәа.
Есма Голанӡиаҧҳа
Афестиваль амҩаҧгарҭақәа рыбжьара ҭыҧ хадоуп амилаҭтә парк «Аҧсны». Уи аҵакырадгьыл аҿы аҧсуа уасҭацәа ицәырыргеит еиуеиҧшым аалыҵқәа - акыцлыхқәа, аҳәызбақәа, амузыкатә рҳәагақәа, арыжәтәқәа, аџьемқәа, амилаҭтә чысхкқәа. Афестиваль алахәцәа зегьы ирылшоит афатәқәа ргьама абареи агәаларшәагатә сувенирқәа раахәареи.
Афестиваль апрограмма иаҵанакит хкы рацәала амузыкатә қәгыларақәа, ацәыргақәҵақәа, аџьармыкьақәа, амастер-классқәа, иара убасгьы зегь реиҳа иблахкыгаз - аҳауатә мпышҭала аҧырра.
Ҭыҧцыҧхьаӡа ауаа ргәалаҟазаара шьҭырхуан аӡынтә ныҳәа ду дыргас иаиуз амандаринатә композициақәа. Ацитрустә арт-обиект хада гылоуп Аҟәа, Аҧсуа драматә театр аҿаҧхьа.
Ари аҩыза ашықәс Ҿыцтә аҧсаӡ џьашьахәы аибыҭаразы рхы иадырхәеит тоннаки бжаки иреиҵамкәа амандарина. Хә-метрак иҟаз аҧсаӡ аҳаракырала адунеитә рекорд шьақәнаргылеит.
Афестиваль еиҿнакааит Иавтономтәу икоммерциатәым аиҿкаара асоциал-культуратә проектқәа рцентр «Аҵла».
«Афестиваль ахықәкы - зеиҧш ҟамлац аӡынтә ныҳәа аиҿкаара, адунеи акультуратә сценаҿы Аҧсны аҵакы аизырҳара, аҧсуа культуреи аҵасқәеи рабадырра, ақыҭанхамҩа аҿиара ацхыраара, аӡынратәи аамҭазы атуристтә ҟәшеи атәыла аекономикеи рырҿиара роуп», - ҳәа азгәалҭеит афестиваль аиҳабы Светлана Габуниаҧҳа.
Уи лажәақәа рыла апрограмма еиқәыршәоуп дасу игәы иақәшәо ҧсыршьагак иҧшаартә еиҧш.
Афестиваль «Амандарин» хыркәшахоит ажьырныҳәамза 8. Уи иамҽханакуеит иакымкәа атәыла араионқәа. Амилаҭтә парк анаҩсангьы аусмҩаҧгатәқәа еиҿыркаауеит асовнхара «Софиа», иара убасгьы аплиаж «Марнеро». Алахәцәа ирыдыргалоит аҧсуа естрада аиаҵәахәқәа рықәгылара, ирылшоит ахыц ала ахысраҿы рхы аҧышәара, ацитрус аарыхырҭақәеи, еиуеиҧшым ацәыргақәҵақәеи, атематикатә хәылҧазқәеи, амастер-классқәеи рҭаара. Афестиваль аҳәаақәа ирҭагӡаны, ажьырныҳәамза 4 амилаҭтә парк аҿы имҩаҧысуеит Адунеизегьтәи аҧсуа-абаза конгресс иазнархиаз аетнографиатә фильмқәа рыхәаҧшра.
шәҭалароуп, ма шәыҽҭажәыҩроуп.