Адунеизегьәи аԥсуа-абаза конгресс аинформациатә портал апрезентациа мҩаԥысит Аҟәа, цәыббра 18 рзы.

Цәыббрамза 18 рзы Аҟәа иӡыргаз Адунеизегьтәи аԥсуа-абаза конгресс аофициалтә портал хықәкыс иамоуп аԥсуа-абаза жәлар рыӡбахә адунеи аларҵәара. Абри атәы апрезентациаҟны илҳәеит апортал анапхгаҩы, аредактор хада Амина Лазԥҳа. Апортал аусура ишалагаз атәы рылаҳәан Аԥсуа телехәаԥшра астудиаҿы имҩаԥгаз апресс-конференциа аҟны.

Амина Лазԥҳа иазгәалҭеит апортал аҟны ишцәыргахо Аконгресс аусура иазку аинформациеи, аԥсуа-абаза жәлар рхаҭарнакцәа рыԥсҭазаашьа иазку аматериалқәеи. Апортал иааныло зегьы азынархоуп Аԥсны абзиаӡбахә адунеи ахьыгӡара.

«Апортал аҟны ицәыргахо аматериалқәа зегьы агуманитартә ҟазшьа рымазаауеит. Ҳара адунеи иазеиҭаҳҳәарц ҳҭахуп ҳҭоурых, ҳкультура, ҳабзазашьа зеиԥшроу иара убас хьӡи-ԥшеи змоу ҳажәлар рхаҭарнакцәа рыӡбахә. Адунеи ҳхы азеиҭаҳҳәалоит. Иаҳҳәаша ҳамоуп, ҳазхыҽхәашагьы ҳамоуп», – лҳәеит Лазԥҳа.

Лара иазгәалҭеит апортал аматериалқәа ф-бызшәак рыла ишкьыԥхьхо: абаза бызшәа, аԥсшәа, аурысшәа, аҭырқәа, англыз, араԥ бызшәақәа рыла. Иахьазы асаит хә-бызшәатә версиак рыла аус ауеит: араԥ бызшәатә версиа макьана аус адулара иаҿуп, хара имгакәа уигьы аартхоит.

Абри атәы еиҳа инарҭбааны>>

АААК анагӡаратә маӡаныҟәгаҩ Инар Гыцба иазгәеиҭеит апортал аусура – Аконгресс ахықәкы хада – аԥсуа-абаза жәлар рхаҭарнакцәа реизакра анагӡараҿы акрызҵазкуа мыругазаауеит ҳәа.

«Иахьа аинформациатә технологиақәа раамҭазы ажәлар реидкылара иаҳа иашоуп ҳаамҭазтәи акоммуникациатә хархәагақәа рыцхыраарала, раԥхьаӡа иргыланы, аинтернет ресурсқәа рыла. Убри аҟнытә аинформациатә портал азынархоуп адунеи иалаԥсоу ҳажәлар рхаҭарнакцәа зегьы реидкылара, реизааигәатәра», – иҳәеит Аконгресс анагӡаратә маӡаныҟәгаҩ.

АААК аинформациатә портал аус ахьынӡадырулоз шықәсыбжак иалагӡаны еизган аматериалқәа раԥҵаразы аинформациа рацәаны: 50 Гб инареиҳаны аинформациа, 700 даҟьа атекст, зқьы инареиҳаны афото-видео материалқәа.