Ажурналист Екатерина Бебиаԥҳа лавтортә дырраҭара "Аԥсуара амҩахәасҭақәа" азы длыҿцәажәеит афилологиатә ҭҵаарадыррақәа ркандидат, Дырмит Гәлиа ихьӡ зху Аԥсуаҭҵааратә институт адиалектологиатә лабораториа аиҳабыс иҟаз абызшәадырҩы Емма Кьылԥҳа (1953-2017). Темас иқәгылан - Аԥсуара, аԥсуа культура, ахатәы бызшәа, аԥсадгьыл азҵаарақәа. Аиҿцәажәара анҵан 2009 шықәсазы Аҟәа, Аԥсуа телехәаԥшра астудиаҿы. 

"Аԥсуара шьаҭас иамоу – ауаҩроуп, ауаҩра ахьынӡаҳалоу ҳаԥсуарагьы ҳцәыӡуам. Аԥсуара гәыцәс иамоуп аԥсуа бызшәа. Аԥсуа дарбанзаалак ихаҿы иааигароуп аԥсшәа изымдыркәа инагӡаны дшаԥсыуам. Абызшәа аҳәара актәи аҭыԥаҿы игылоуп, аҩбатәи аҭыԥаҿгьы игылоуп, ахԥатәи аҭыԥаҿгьы убас", – лҳәеит аҵарауаҩ.