Саид Барганџьиа

Адунеи зыхьӡ ахыҵәахьоу асахьаҭыхҩы Леонардо да Винчи иан мрагыларатәи ахылҵшьҭра змоу тәызар ауан. Абас еиԥш атеориа шьаҭаиркит афилологиатә ҭҵаарадыррақәа рдоктор, апрофессор, Адунеизегьтәи аԥсуа-абаза конгресс Иреиҳаӡоу ахеилак алахәыла Виачеслав Чрыгба ишәҟәы «Катерина лымаӡа. Леонардо да Винчи иан дазусҭадаз» аҟны.

«Ари агипотеза сгәы иҭыхон, избан акәзар сара издыруан усҟантәи аамҭазы Аԥсныи Амшын Еиқәа иаҿықәу ачерқьес тәылақәеи рҟынтә Италиаҟа ауаа рыҭира амҽхак шыҭбааз, – ҳәа азеиҭеиҳәеит Чрыгба АААК апортал. – Убри аҟнытә Мрагыларатәи ахылҵшьҭра змаз аҭыԥҳа Катерина даԥсыуазаргьы ҟалон. Ари аверсиа зегь реиҳа аҵабырг иазааигәоуп».

Апрофессор иҳаилиркааит ари атемала афактқәеи ахәыцрақәеи реидкылара акраамҭа дшаҿыз. «Нас сыхшыҩзцарақәа зегьы ааидкыланы ақьаад ахь ииазгар сҭаххеит, ауаа ирыцеиҩысшарц азы. Абас иит ашәҟәы аҩразы аидеиа», – иҳәеит иара.

Автор иазгәеиҭеит «Аиҭаира аепоха иатәу агени ду» ихаҭара акыршықәса раахыс аинтерес шизцәырнагоз. 

«Агени ҳәа ззырҳәо ауаҩ иҟны сара ианакәызаалак аинтерес сымоуп «иуаҩытәыҩсатә» ҟазшьақәа: дзакә уаҩыз, игәы иҵхоз, аԥсҭазаара еиуеиԥшым аганқәа дышԥарзыҟаз, аполитика, аҟазара, арҿиара дышԥарызнеиуаз, иара ихаантәи аепоха дышԥазыҟаз. Абарҭқәа зегьы еснагь аинтерес ду сызцәырнагон, иара иахьагьы исызцәырнагоит», – ҳәа ҳзеиҭеиҳәеит Чрыгба.

Иара дырзааҭгылеит иара убас ашәҟәазы аматериал аизгараан иԥылаз ауадаҩрақәагьы.

«Ауадаҩрақәа зыдҳәалаз – Леонардо иан илызку аматериал ахьмаҷу акәын: ҩыџьара-хыџьара лыӡбахәқәа ҳәоуп, акы-ҩба документ узыԥшаауазар бзиоуп – уаҳа акгьы. Егьи зегьы ишиашоу илыдҳәалам шаҳаҭрақәоуп, урҭ зегьы рхыԥхьаӡараҟынтә еизаку ҭоурыхк злыҵша алхреи, нас реишьҭаргылареи ус имариамызт. Аха агәыӷра сымоуп уи ахықәкы акыр исзынагӡеит ҳәа», – ациҵеит Чрыгба.

Ашәҟәы «Катерина лымаӡа. Леонардо да Винчи иан дазусҭадаз» автор аус адиулон 2015 шықәса раахыс. Ашәҟәы ҭыҵит ҳазҭоу ашықәс рашәарамзазы, нанҳәамзазы Аҟәа аӡыргара мҩаԥысит. Ашәҟәы аҭыжьра алыршахеит Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь ицхыраарала.

Ашәҟәы атираж 1500 цыра ыҟоуп, уи аахәара ҟалоит урыстәылатәи, белорустәи, украинатәи, ҟазахтәи аинтернет дәқьанқәа рҟны.

Виачеслав Андреи-иԥа Чрыгба – аԥсуа лингвист, аполитикатә усзуҩы, 2011 шықәса жьҭаарамза 11 инаркны 2016 шықәса цәыббрамза 20 рҟынӡа Аԥсны Адәныҟатәи аусқәа рминистрс дыҟан. Афилологиатә ҭҵаарадыррақәа рдоктор, апрофессор ҳәа ахьӡқәа ихҵоуп, Аԥсны Аҭҵаарадыррақәа ракадемиа иҵабыргу алахәыла, Аҭакзыԥхықәу, азинмчра нагӡа змоу Аԥсны Аҳәынҭқарра ацҳаражхәаҩ, Кавказ ажәларқәа рбызшәақәеи, рҭоурыхи, рмифологиеи ирызку ашәҟәқәеи астатиақәеи равтор.