АААК аинфопортал иаԥнаҵеит иагьхацнаркит аԥсшәеи абаза бызшәеи рҵара иазынархоу онлаин-проект.
АААК ихацнаркит ахатәы бызшәа аҵара иацхраауа онлаин-проект «Аԥсышәала ҳцәажәоит / Абазала хIцважвитI». Апроект ҿыц хықәкы хадас иамоуп – иахьынӡауа идуу аудиториа амҽхакра, аԥсуа-абаза диаспора ахаҭарнакцәа зегьы, ҭыԥс иахьынхозаалакгьы, рхатәы бызшәа рҵартә еиԥш алшара рыҭаразы.
Аԥсуа-абаза жәлар ахаҭарнакцәа иахьа адунеи атәылақәа 50 инареиҳаны ирыланхоит. Ари милаҭк ауп, збызшәеи зҵас-қьабзқәеи ашәышықәсақәа иргәылсны иаауа. АААК Иреиҳаӡоу ахеилак ахантәаҩы Мусса Егзакь игәаанагарала, иахьатәи аглобализациа аамҭазы амилаҭтә хаҿреи, ажәытә традициақәеи, абызшәеи реиқәырхара еиҳа-еиҳа иуадаҩхоит.
«Убри азоуп Аконгресс аусура хықәкы хадас изыҟоу абаза жәлар реиқәырхара шьаҭас иамоу ахатәы бызшәа ахьчареи арҿиареи. 2017 шықәса раахыс АААК акоманда активла нап анаркит адиаспора ахьынхо атәылақәа рҟны ахатәы бызшәа аларҵәара аус. АААК аҭыԥантәи, ма арегионалтәи аҟәшақәа ахьаатуа аҭыԥқәа рҿы еиҿкаахоит ахатәы бызшәеи амилаҭтә кәашарақәеи рҵаразы акружокқәа. Убас иахьаатыз ҭыԥқәоуп Санкт-Петербурги Москвеи», – иҳәеит иара.
Онлаин-проект инарҭбааны далацәажәеит Аконгресс аинформациатә портал анапхгаҩы Амина Лазԥҳа.
«АААК аусура ахырхарҭа хадақәа ируакуп абаза бызшәеи аԥсшәеи реиқәырхареи рыҿиареи. Убри аҟнытә аинфопортал адаҟьақәа рҟны абызшәатә проект ахацыркра аидеиа ҳазцәырҵиижьҭеи акрааҵуеит, аха еиуеиԥшым амзызқәа ирыхҟьаны уажәаԥхьа уи анагӡара залымшеит. Имариоу акы аԥаҳҵар ҳҭахын, ҳсоциалтә ҳақәа рхархәаҩцәа хәмаршақә, уадаҩрада хатәы бызшәала афразақәеи аҳәоуқәеи рҳәашьа дҳарҵарц. Абас ицәырҵит апроект «Аԥсышәала ҳцәажәоит / Абазала хIцважвитI», - ҳәа еиҭалҳәеит Лазԥҳа.
Лара лажәақәа рыла, еиҳарак уадаҩрас иҟаз – еиуеиԥшым атәылақәа рҿы инхо, еиуеиԥшым абызшәақәа рыла ицәажәо ҳауаажәлар еицырзеиԥшны ирзыманшәалоу аформат аԥшаара акәын, абызшәа ахаҭа азнагара анаҩсгьы.
«Ҳхархәаҩцәа иахьа инаркны алшара роуеит есыҽны иҭаргалаларц аԥсшәеи абаза бызшәалеи имариоу афразақәа узырҵо авидеоурок кьаҿқәа, егьырҭ ԥшь-бызшәак рахь аиҭагақәа рыцны – англыз бызшәа, араб бызшәа, аурысшәа, аҭырқәшәа», – ҳәа ҳаиллыркааит Лазԥҳа.
АААК аинфопортал есыҽны, аԥсшьарамшқәа аламҵакәа, хԥа-хәба фраза еидызкыло видеоурокк цәырнагалоит, нас амза анҵәамҭазы – мызкала изхысыз зегьы еидызкыло аматериал.
«Ҳара иаԥаҳҵеит убасгьы Telegram аҟны абри апроект иазку аканал «World Abaza Congress ABK/ABQ», ҳхархәаҩцәа рырманшәаларазы, аурок ҿыцқәа аныҟало иаразнак ирбаларц, ирҭаху аурок мариала ирԥшааларц азы», – ҳәа ацылҵеитАмина Лазԥҳа.
Лара еиҭалҳәеит апроект анагӡара шалыршахаз АААК аинфопортал аусзуҩцәеи еиуеиԥшым атәылақәа рҿы инхо ҳџьынџьуааи хәыда-ԥсада рымч аилаҵара иабзоураны.
Убас, арҵаратә материал шьаҭас иазыҟалеит Еиду Америкатәи аштатқәа рҟны инхо ачерқьес диаспора рхаҭарнак Џьонти Иамишьа акыршықәса раахыс аус здиулоз абызшәатә программа. Иара абызшәа арҵаратә программақәа маҷымкәа иаԥиҵахьеит, ааигәа аусурра иалаиргеит 20 бызшәа узырҵо амобилтә цҵа Optilingo, аҟабарда бызшәагьы уахь иналаҵаны. Иамишьи амалаҳәа ари апроект азы Аконгресс иаиҭеит англыз бызшәала еиқәиршәахьаз афразақәеи аҳәоуқәеи рбаза: иааидкыланы 3 500 ажәа инареиҳаны еидызкыло, иахьеи-уахеитәи аицәажәараан реиҳа ахархәара змоу афразақәа 95% шьақәзыргыло. Абри абызшәатә база шықәсқәак инарзынаԥшуа еиқәдыршәон апрофессионалтә ҵара змоу абызшәадырцәа.
«Аконгресс аинфопортал аиҭагаҩцәагьы, ҳара ҳџьынџьуаа, абри апроект хәыда-ԥсада иазааԥсарц рыӡбеит. Аԥсуа бызшәа аус адылулоит Москва инхо афилолог Алина Жьиԥҳа, абаза бызшәа – ҞЧА инхо афилолог Билиаль Ҳасароҟәа, аҭырқәшәа – Ҭырқәтәыла инхо афилолог Елис Аргәын, англыз бызшәа – адипломат, Аԥсны Адәныҟатәи аусқәа рминистрра аусзуҩ Артур Гагәлиа, араб бызшәа – Шьамтәылантә зҭлоурыхтә ԥсадгьыл ахь иааз арепатриант, ажурналист Муҳамед Кәашба», – ҳәа еиҭалҳәеит АААК аинфопортал анапхгаҩы.
Абаза бызшәала афразақәеи аҳәоуқәеи хатәгәаԥхарала дрыԥхьоит ажурналист, икоммерциатәым автономтә еилазаара «Алашара» аинформациа-аналитикатә ҟәша аиҳабы Гьаргь Чкала, аԥсышәала – Амина Лазԥҳа лхаҭа. Авидеоурокқәа рдизаин ҭылхит апортал авидеограф, арежиссиор Илона Хәарҵкьиа.
«Иҭабуп ҳәа расҳәарц сҭахуп абри апроект иалахәу зегьы. Даара сгәыӷуеит ахатәы бызшәа аҵараҿы акыр ицхыраагӡахап ҳәа адунеи иалаԥсоу ҳашьцәа зегьы рзы. Ааԥхьара ҟасҵоит ирҵаз афразақәеи аҳәоуқәеи шырҳәо ҭыхны авидеоқәа ҳзаарышьҭларц, анаҩс урҭгьы ҳдаҟьаҿы иаҳкьыԥхьлоит», – ҳәа лажәа хлырқәшеит Амина Лазԥҳа.
Апроект аамҭала ҩышықәса инаӡоит, анаҩс еиҳа ирҭбаахоит: ахархәаҩцәа абаза бызшәалеи аԥсышәалеи инаӡоу адиалогқәа дырҵарахьы ииасуеит.
Аԥсшәеи абаза бызшәеи рыҭҵаареи рырҿиареи – Адунеизегьтәи аԥсуа-абаза конгресс аусура ахықәкы хадақәа ируакуп. Ари ахырхарҭала Аконгресс иҟанаҵо маҷым: аԥсуа-абаза диаспора ахаҭарнакцәа ахьынхо атәылақәа рҿы абызшәатә курсқәа аартхоит, аԥсуа бызшәеи абаза бызшәеи реиқәырхара азҵаара знапы алаку аҵарауаа-алингвистцәа адгылара рынаҭоит.
шәҭалароуп, ма шәыҽҭажәыҩроуп.