Аԥсуа қәԥаҩцәа аԥхьахәтә ҭыԥқәа ааныркылеит Урыстәыла аҩадахьтәи аҳҭнықалақь аҟны имҩаԥысуаз атурнир аҿы.
Саид Барганџьиа
Зхы иақәиҭу аиқәԥара аклуб «Абаза» еиднакыло аспортсменцәа, Аҟәеи, Тҟәарчали, Очамчыреи ақалақьқәа рҟынтә ақәԥаҩцәа аԥхьахәҭә ҭыԥқәа ааныркылеит Санкт-Петербург имҩаԥысуаз Асовет Еидгыла ачемпион Владимир Радионов ихьӡ зху VI-тәи зхы иақәиҭу аиқәԥара атурнир аҟны.
Зхы иақәиҭу аиқәԥара Афедерациа ахада ихаҭыԥуаҩ Аҟәатәи еизгоу акоманда азыҟаҵаҩ Игорь Бераиа, ииасыз аицлабрақәа ахәшьара рыҭауа, иазгәеиҭеит аԥсуа қәԥаҩцәа даараӡа ибзианы ишазыҟаҵаз. Иара излаиҳәаз ала, аԥсуа қәԥаҩцәа аиааирақәа ргеит, дара рындаҭлаҩцәагьы азыҟаҵара бзиаӡагьы шрымазгьы.
«Актәи аҭыԥқәа ааныркылеит Сандро Харчлааи Самуил Џьынџьуеи, аҩбатәи аҭыԥқәа ааныркылеит Вахтанг Акабеи Нестор Ҵулукиеи, ахԥатәи аҭыԥ игеит Алан Аԥшьлаа. Аспортсменцәа зегьы аиааирақәа ргеит доусы рыкапантә категориақәа рҟны. Дара разыҟаҵаҩцәас иҟоуп Мурман Харчлааи Ҳаџьараҭ Гадлиеи, насгьы дара зегьы зхы иақәиҭу аиқәԥара аклуб «Абаза» иатәуп. Арԥарацәа аиқәԥара бзиаӡа аадырԥшит, аҵыхәтәанынӡа хьаҵрада еиқәԥон», - иҳәеит азыҟаҵаҩ.
Бераиа адырра злаҟаиҵаз ала, атурнир иалахәын адунеи еиуеиԥшым атәылақәа рҟынтәи 200-ҩык аспортсменцәа инареиҳаны, Америкеи, Бырзентәылеи, Белоруссиеи, Естониеи уҳәа реиԥш иҟоу уахь иналаҵаны. Иара иажәақәа рыла, атурнир аҩаӡара ҳаракны имҩаԥысит. Еизгоу акоманда азыҟаҵаҩ убри инацҵаны иҳәеит, аԥсуа спортсменцәа афинанстә цхыраара шриҭаз Адунеизегьтәи аԥсуа-абаза конгресс Иреиҳаӡоу ахеилак ахантәаҩы, зхы иақәиҭу аиқәԥара аклуб «Абаза» ахада Мусса Егзакь.
Мусса Егзакь ихаҭа зхы иақәиҭу аиқәԥаразы аспорт азҟазас дызлаҟоу ала, атурнир иалахәыз аԥсуа спортсменцәа рықәҿиара ахә ҳаракны ишьеит. Иара инаҵшьны иазгәеиҭеит ақәԥаҩцәа қәыԥшқәа иаадырԥшыз алҵшәақәа рыла азыҟаҵаҩцәа рыштаб аусургьы асистема шамоу, ахаҭабзиара шыҳараку аҳәара шулнаршо.
«Ҳара ҳашкол аҟны (зхы иақәиҭу аиқәԥара аклуб «Абаза» - аред.) аспортсменцәа даараӡа ибзианы иазыҟарҵоит. Сара зегьы ирзеиӷьысшьоит ари аҿы иаанымгылакәа иреиҳаӡоу ақәҿиарақәа ирызцаларц. Еснагь иаҭахуп аолимпиатә ҳамҭа аиура аҽазышәара. Сара изласыԥхьаӡо ала, ҳара иҳамоуп «адауаԥшьқәа», ақәԥаҩцәа рацәаҩны, зегьы иреиҳау аолимпиатә пиедестал иқәгылахьоу», - иҳәеит Егзакь.
Иара игәы излаанаго ала, аԥсуа қәԥаҩцәа ԥхьаҟатәи аҿиаразы аԥеиԥш бзиақәа рымоуп, аха ақәҿиара дуқәа уоурц азы ирацәаны аџьабаа батәуп.
«Ара иаҭахуп алеишәа, адисциплина, узҿу аус гәыкалаҵәҟьа ҳаҭыр узақәзароуп. Еснагь иугәалашәозароуп убираҟ шухьчо, уара иуеиԥшзарц зҭаху аҷкәынцәа шуҿыԥшуа. Абри астимул еснагь иумазароуп, иааирацыԥхьаӡа иаргьы иазҳалоит», - иҳәеит АААК Иреиҳаӡоу ахеилак ахантәаҩы.
Аԥсны зхы иақәиҭу аиқәԥара перспективақәас иамоу далацәажәо, иара иазгәеиҭеит Аԥсны анҭыҵ ицо, зҭаацәарақәеи зазыҟаҵаҩцәеи ирцәыхарахо аспортсменцәа ҷыдала аус шрыдулатәу, «ухызхуа ахьырацәоу ақалақь дуқәа рнырра ибжьнамхырц азы».
«Аспорт иацәхьаҵуеит. Абри аганахьала аус утәуп. Ҳәарада, ибзиахон Аԥсны аҩнуҵҟа азыҟаҵара бзиаӡа аиуразы иахәҭоу аҭагылазаашьақәа зегь аԥҵазҭгьы», - иҳәеит Егзакь.
Асовет Еидгыла ачемпион Владимир Радионов ихьӡ зху VI-тәи зхы иақәиҭу аиқәԥара атурнир мҩаԥысуан Санкт-Петербург, ԥхынҷкәын 13 инаркны 15 рҟынӡа. Аиааирагаҩцәа иранашьан адипомқәеи амедалқәеи
шәҭалароуп, ма шәыҽҭажәыҩроуп.