Анасыԥи аманшәалареи аҳәса зегьы ирзеиӷьишьеит Адунеизегьтәи аԥсуа-абаза конгресс Иреиҳаӡоу Ахеилак ахантәаҩы Мусса Егзакь Жәларбжьаратәи аҳәса рымш — март 8 аҽны.

Иадныҳәылараҿы иара иазгәеиҭеит, Жәларбжьаратәи аҳәса рымш —  аҳәса рахь иҳамоу апатуқәҵара аарԥшреи, иџьашьахәу рыԥшӡареи рыҟәымшәышәреи атәы даҽазныкгьы азгәаҭареи анҳалшо мшуп ҳәа.   

«Ари аныҳәамш еснагь аԥхарра ацуп: ҳанацәеи, ҳаҳәсацәеи, ҳаҳәшьцәеи, ҳаԥҳацәеи. ҳколлегацәеи рахь иҳамоу агәыбылрала иҭәуп», — иҳәеит иара.

Егзакь иазгәеиҭеит, аԥҳәыс ауаажәларраҟны ихадоу аҭыԥ шаанылкыло атәы.

«Аԥсҭазаара иацызҵо шәара шәоуп, шәгәыбылреи, шәыхӡыӡаареи ҳагхом, еснагь ацхыраара шәазхианы шәҳавагылоуп, доусы шәзанааҭқәа рҿы аихьӡарақәа аарԥшуа, убри аамҭазы ахәышҭаара аԥхара еиқәырхауа, аҩнаҭа абареи, ахәыҷқәеи рааӡареи еилашәыгӡоит», — иҳәеит АААК Иреиҳаӡоу ахеилак ахантәаҩы.

Иара лымкаала иазгәеиҭеит ахшара рацәа змоу анацәа рџьабаа, иааџьоушьаратәы зегьы ирыхьӡо — рыԥшӡареи рыҟәымшәышәреи шрымацгьы ишаанхо.

«Аҳәса роуп аԥсҭазаара ақьиареи, аԥшӡареи, ахаареи, агәыӷра лашареи рыла изырҭәуа. Аҳәса зегьы насыԥ рымазарц рзеиӷьысшьоит», — ҳәа иадныҳәалара хиркәшеит Мусса Егзакь.

Жәларбжьаратәи аҳәса рымш — атәылақәа жәпакы рҿы ныҳәак аҳасабала иазгәарҭоит есышықәса хәажәкыра 8 рзы, 1975 шықәса инаркны.