Аоперативтә штаб адырра ҟанаҵеит Аԥсны аҩнуҵҟа зегь раԥхьа акоронавирус зыдбалаз апациент дыбзиахеит ҳәа.
Аԥсны ачымазара ҿкы COVID-19 зыхьыз раԥхьатәи ауаҩы игәы бзиахеит ҳәа мшаԥы 17 рзы адырра ҟанаҵеит Ауааԥсыра акоронавирус рацәыхьчаразы аоперативтә штаб. Ахәышәтәра акурс амҩаԥгара ашьҭахь апациент ҩынтә агәаҭара дыхрыжьит, уи алҵшәақәа рыла, акоронавирус уаҳа ицәа иалам ҳәа шьақәырӷәӷәоуп.
Аоперативтә штаб аиҳабы ихаҭыԥуаҩ, Аԥсны агәабзиарахьчареи асоциалтә еиқәыршәареи рминистр ихаҭыԥуаҩ Алхас Кәанџьариа еиҭеиҳәеит, апациент макьана Гәдоуҭатәи араионтә хәшәтәырҭа хадаҿы дшаанхо, аҳақьымцәа иҵегьы иҭагылазаашьа иацклаԥшлоит, аха иааиуа амшқәа рзы илҩаара ргәы иҭоуп.
«Акоронавирус змоу егьырҭ ҩыџьа ачымазцәа макьанагьы рыхәышәтәра мҩаԥысуеит. 1925 шықәса рзы ииз апациент лыҩны лҽыԥхьакны дыҟоуп. Аҩыџьагьы рҭагылазаашьа уацәшәартә иҟам», – иҳәеит Кәанџьариа.
Иара адырра ҟаиҵеит убасгьы ииасыз уахыки-ҽнаки рыла ачымазара амазааразы агәаҭара ишахысыз жәаҩык ауаа. Акоронавирус аӡәгьы идбаламызт.
2020 шықәса хәажәкыра 24 инаркны Аԥсны аиҳабыра ауааԥсыра акоронавирустә ҿкы COVID-19 рацәыхьчаразы аԥкрақәа аланагалеит – иаанкылоуп ауаа рацәа еизызго аусмҩаԥгатәқәа, иаркуп аҵаратә усбарҭақәа, аҳәынҭқарратә усбарҭақәа русура ҳәааркуп, иаркуп аџьармыкьақәеи ахәаахәҭратә ҭыԥқәеи, афатә-ажәтәи ихымԥадатәу атауарқәеи ахьырҭиуа аҭыԥқәеи аԥҭекақәеи рыда, ауааԥсыра реиҭанеиааира ԥкуп, иара убас егьырҭ аԥҟарақәа алагалоуп.
Хәажәкыра 28 раахыс атәылаҿы иалагалоуп Аҭагылазаашьа ҷыда: аамҭала иаркуп аԥсуа-аурыс ҳәаа адипломатцәеи аруааи рыда атәымуаа зегьы рзы, зыԥсадгьыл ахь ихынҳәуа Аԥсны атәылауаагьы аҳәааҿы ргәаҭара акыр ирӷәӷәоуп.
Аԥсуа наплакцәа иаԥырҵаз агәыҳалалратә хеилак «Ҳара ҳаидгылоуп» алахәцәеи Москватәи аԥсуа диаспора ахаҭарнакцәеи алаҳәара ҟарҵеит Аԥсны ауааԥсыра акоронавирус раҿагылараҿы ацхыраара рыҭаразы аԥара шеизырго. Иахьазы еидкылоуп 55 миллион мааҭ инарзынаԥшуа аԥара.
Аԥсны акоронавирустә чымазара ҿкы COVID-19 аҿагылараҿы ацхыраара азҭарц зҭаху зегьы рзы алшара ыҟоуп рыхәҭалагала ҟарҵарц – Москватәи Аԥсуа Диаспореи «Ҳара ҳаидгылоуп» ахеилаки ирымоу реквизитқәа рахь доусы илшо алаҵарала Аԥсныи Урыстәылатәи Афедерациеи рҟынтә, иара убас Адунеизегьтәи аԥсуа-абаза конгресс ареквизитқәа рахь – Ҭырқәтәылантә, ма Аконгресс асаит аҟны онлаин-ԥарашәара амҩаԥгара. Еизгахо аԥара зегьы Аԥсны ауааԥсыра аҿкы чымазара рацәыхьчареи ргәабзиара ашьақәыргылареи иазкхоит.
шәҭалароуп, ма шәыҽҭажәыҩроуп.