Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь инапы зҵаиҩыз адҵа инақәыршәаны, АААК Аппарат аилазаашьаҿы амаҵуара ҿыц аԥҵоуп – аппарат анапхгаҩы ихаҭыԥуаҩ, аинформациатә политикеи аимадарақәеи рҳәаақәҵаҩ ҳәа, ари амаҵура даҭоуп Ҭенгиз Ҭарба.

Имаҵура ҿыц дахцәажәо Ҭенгиз Ҭарба еиҭеиҳәеит, аринахыс АААК азҿлымҳара ҷыда шарҭало аинформциа аларҵәареи, Аконгресс имҩаԥнаго аусқәа рыӡбахә аиҭаҳәареи.

«АААК Иреиҳаӡоу ахеилак ахантәаҩы Мусса Егзакь аинформациатә политика астратегиа хада аликааит, уи инақәыршәаны АААК акоманда русура аларҵәара аиулароуп. Убри аҟнытә сара хыдҵас исымоуп абри астратегиа анагӡашьа ахылаԥшра аҭара, иара убасгьы зеиԥшла аинформациатә политика аҳәаақәҵареи аимадарақәеи снапы иануп», – иҳәеит Ҭенгиз Ҭарба.

Иара иацицеит Аконгресс агеографиа аиҵыҵра ишаҿу, иҿыцу арегионалтә, аҭыԥантәи аҟәшақәа аатуеит, ари апроцесс аанкылахаӡом ҳәа. Абри инамаданы, адунеи аҿы иаартхо аҟәшақәа зегьы аинформациатә политика аганахьала рзеиԥш координациа азҵаара цәырҵуеит.

Ҭенгиз Ҭарба – еицырдыруа афонд «Ишьхатәылоу Аԥсны» аԥҵаҩ иоуп. Аԥсны иазку ихатә цәыргақәҵақәа мҩаԥигахьеит Италиа, Германиа, Урыстәыла, Сан-Марино, Приднестровие. Иара ҩынтә дыриааихьеит ателеканал «Моя Планета» апремиақәа «Аныҟәара иазку апрофессионалтә фото- видеорепортаж» аноминациала.

Ԥшьышықәса аус иуан Аԥсны Адәныҟатәи аусқәа рминистрраҿы Аинформациа аҟәша аиҳабыс, иара убас Анапынҵа ҷыдақәа назыгӡо ацҳаражәҳәаҩс. Аус иуан убасгьы Аԥсны атуризм аминистрра аинформациатә ҟәша аиҳабыс.

Ҭенгиз Ҭарба урыстәылатәи акоммерциатә еилакқәа рнапхгаҩысгьы дыҟан. Жәохә шықәса инареиҳаны аус иуит амаркетинг ахырхарҭала, еиуеиԥшым аидеиақәеи абрендқәеи раларҵәаразы иҟоу аинструментқәа рылшарақәа рыҭҵаара аганахьала.