Ԥхынгәымза 23 рзы Аԥсны иазгәарҭеит Аҳәынҭқарратә бираҟ амш. Уи аныҳәамш есышықәса амҽхак ҭбааны иазгәарҭоит адунеи иқәынхо аԥсуа-абаза жәлар зегьы.
Аҩаша, ԥхынгәымза 23 рзы, шәаҳәаралеи кәашаралеи Аҟәа иазгәарҭеит Аԥсны аҳәынҭқарратә бираҟ амш. Аныҳәа еиҿнакааит Адунеизегьтәи аԥсуа-абаза конгресс.
Убас, ахәылԥаз иаҭааз зегьы рзы еиҿкаан иҷыдоу аныҳәатә баннер ахьгылаз афото-зона, уаҟа згәы иаҭахыз зегьы рфотосахьақәа ҭырхыр рылшон. Иргылан асахьаҭыхҩы Диана Воуԥҳа иаԥылҵаз милаҭ маҭәала еилаҳәоу афигурақәеи, аԥсуа-абаза диаспора ахьынхо атәылақәа зныԥшуа ахсаалеи.
Еиҿкааз аныҳәатә концерт аҟны, ахәылԥаз асасцәа рзы иқәгылеит – Оҭар Хәынцариа ихьӡ зху амилаҭтә арҳәагақәа роркестр, амузыкантцәа Ҭемыр Ҳагбеи, Мадина Кәарцхьиаԥҳаи.
Автономтә советтә социалисттә республика Аԥсны 1978-шықәсазтәи Аконституциа аԥыхны, 1925-шықәсазтәи Аԥснытәи ССР Аконституциахь ишиасуа атәы алаҳәара ҟаҵаны, 1992 шықәса, ԥхынгәымза 23 рзы, Аԥсны Аҳәынҭқарра Иреиҳаӡоу Асовет ишьақәнарӷәӷәеит ҳаамҭазтәи Аԥсны абираҟ. 2005 шықәса инаркны Аԥсны Аҳәынҭқарра абираҟ амш официалла иазгәарҭоит ԥхынгәымза 23 рзы.
шәҭалароуп, ма шәыҽҭажәыҩроуп.