Саид Барганџьиа

Адунеизегьтәи аԥсуа-абаза конгресс ахыԥхьаӡарахь иалаҵаз раԥхьаӡатәи аԥаратә лагалақәа – 18 нызқь мааҭ –  аашьҭын Аконгресс раԥхьатәи алахәцәа рҟынтә ҳәа еиҭеиҳәеит АААК Иреиҳаӡоу Ахеилак ахантәаҩы ицхырааҩ Кан Ҭаниа.

Иара иазгәеиҭеит Аконгресс имҩаԥнаго аусура шазынархоу аԥсуа-абаза жәлар реидкылара ацхраара, амилаҭтә хаҿреи, абызшәеи, акультуреи, ақьабзқәеи реиқәырхаразы, иара убас асоциалтә активра ацхраара.

«Аконгресс алахәцәа рхатә ҿырԥшала абарҭ ахықәкқәа ишрыдгылоу аадмырԥшыр, уаҳа уи ҟазҵар зыхәҭада? Сара сгәы иаанагоит, афинанстә цхыраара аныҟала, Аконгресс иамоу аидеиақәеи апроектқәеи рымҽхаки рыҩаӡареи еиҳа еиҳахоит ҳәа, ус анакәха аԥсуа-абаза жәлар рхаҭарнакцәа зегьы ирыхәара ҟалоит», – ҳәа ациҵеит Кан Ҭаниа.

Раԥхьа алагала ҟазҵаз дыруаӡәкуп Санкт-Петербург ақалақь аҿы АААК арегионалтә ҟәша ахантәаҩы Ҭемыр Рекәаа. Иара иазгәеиҭеит аԥаратә лагалақәа – Аконгресс аусура аиӷьтәраҿы хадара злоу аспектқәа ишыруаку.

«Аконгресс аусура адгылара аҭара – даара акраҵанакуеит, избан акәзар уи аҿаԥхьа иқәгылоу аԥсуа-абаза милаҭ реидкылареи рыԥсҭазаара аиӷьтәреи ирызку ахыдҵақәа ҵҩа рымам. Убри аҟнытә доусы иҳалшо ала ацхыраара ҳзыҟаҵар, абри иԥшьоу аус ҳалахәуп ауп иаанаго, урҭ ахықәкы лашақәагьы акырӡа еиҳа ирласны инагӡахоит», – ҳәа иԥхьаӡоит Рекәаа.

Иара убасгьы иазгәеиҭеит аԥаратә лагала ашәагаа доусы илшарақәа ирықәшәозар ҟалоит ҳәа. Ара ихадароу иара алагала ахаҭа аҟаҵароуп, изаҟаразаалакгьы, избанзар уи иаршаҳаҭуеит азеиԥш ус аҟны ҳшаӡәыку.

Раԥхьатәи алагалақәа ҟарҵеит Ҭемыр Рекәаа, Кан Ҭаниа, Михаил Калинкин, Леван Торчуа, Алиас Аиба, Гета Арӡынԥҳа, Инар Гыцба, Алхас Берулаа, Анжела Патараиа уҳәа убас егьырҭгьы.

Адунеизегьтәи аԥсуа-абаза конгресс – алахәцәа рыла ишьақәгылоу ауаажәларратә еиҿкаароуп, уи ахықәкқәа рынагӡаразы егьырҭ рыбжьара иаҭахуп ахарџьгьы. АААК алахәцәа иара убас агәаҳәара змоу зегьы агәыҳалалратә лагалақәа ҟарҵар рылшоит аиҿкаара акассахь, мамзаргьы «Аҟәа-банк» аҿы иаарту Аконгресс ахыԥхьаӡаратә ԥхьаӡарахь.